Շիրակի մարզում կորոնավիրուսի թվերը նվազում են. ինֆեկցիոն հիվանդանոցի վերապրոֆիլավորման անհրաժեշտություն առայժմ չկա

Հունվարին հիվանդացության անկման ֆոնին, շուրջ երեք տասնյակ հիվանդանոցներ վերապրոֆիլավորվեցին ու վերադարձան իրենց նախկին գործառույթներին: Այդ ցանկում էր նաև Գյումրիի ինֆեկցիոն հիվանդանոցը:

Գյումրիի ինֆեկցիոն հիվանդանոցն այժմ թերբեռնված է: Հոսպիտալացված հիվանդները երկու՝ մանկական ու մեծահասակների բաժանմունքներում միասին մոտ 10-ն են: Հունվարի 15-ից Գյումրիի ինֆեկցիոնը վերադարձել է նախկին գործառույթներին ու արդեն ընդունում է ոչ թե կորոնավիրուսով, այլ թոքաբորբերով ու տարբեր ինֆեկցիոն հիվանդություններով պացիենտների:

Թոքաբորբով հիվանդների թեստավորումը թեև հիմնականում բացասական արդյունք է տալիս, բայց գործիքային հետազոտությամբ բժիշկները համոզվում են, որ գործ ունեն կորոնավիրուսի հետևանքով առաջացած թոքաբորբի հետ: Այսինքն՝ Գյումրիի ինֆեկցիոնը հիմա ոչ թե կորոնավիրուսն է բուժում, այլ դրա հետևանքները:

«Շատ են եղել դեպքերը, երբ գործիքային հետազոտությունը ցույց է տալիս վիրուսային թոքաբորբի պատկեր: Շատ հնարավոր է, որ տարել է վիրուսը տվյալ պացիենտը, արդեն լավացել է, բայց բարդությունը դեռ կա և բուժման կարիք կա»,- Shantnews-ին ասել է Գյումրիի ինֆեկցիոն հիվանդանոցի վարակաբան Հեղինե Հունանյանը:

Իսկ կորոնավիրուսի դեպքերի թիվը հունվարից մարզում նվազել է: Հոսպիտալացման ենթականերն ուղեգրվում են մայրաքաղաքի բուժհաստատություններ, որտեղ ընդունում են կորոնավիրուսով հիվանդներին: «Գյումրի» բժշկական կենտրոնի և ինֆեկցիոն հիվանդանոցի տրիաժ ծառայություններում հատուկենտ հիվանդներ են:

«Շիրակի մարզում կայուն համաճարակային իրավիճակ է: Այս պահին մենք ունենք ամբուլատոր բուժման մեջ գտնվող 36 դեպք ամբողջ մարզում, իսկ «Գյումրի» բժշկական կենտրոնի տրիաժ ծառայությունում ունենք ընդամենը 5 նմուշառված հիվանդ»,- Shantnews-ին ասել է Շիրակի մարզպետարանի առողջապահության բաժնի պետ Լեյլի Ասլանյանը:

Հիվանդացության թվերի նվազումը մասնագետները պայմանավորում են կոլեկտիվ իմունիտետի ձևավորմամբ, այսինքն՝ մարզի բնակչության մեծ մասը COVID-19-ով հիվանդացել է, լավացել և հակամարմիններ են ձևավորվել: Սա, ըստ մասնագետների, նվազեցնում է երրորդ ալիքի հավանականությունը:

Այդուհանդերձ, հաստատվող դեպքերի ոչ մեծ աճ բժիշկներն արձանագրում են: Համեմատությունը հունվար ամսվա հետ է: Ըստ նախարարության տվյալների՝ փետրվարի 26-ին և 27-ին Հանրապետությունում հոսպիտալացված հիվանդների թիվն աճել է 44-ով: Ըստ այդմ էլ, անհրաժեշտություն է առաջացել նորից կորոնավիրուսով հիվանդներին ընդունելու համար հիվանդանոցներ վերապրոֆիլավորել: Շիրակի մարզպետարանի առողջապահության բաժնի պետն է նշում՝ առայժմ խոսքը մարզային կենտրոններին չի վերաբերում:

«Այս պահի դրությամբ կոնկրետ թվերն այնպիսին չեն, որ մենք խոսենք Շիրակի մարզում ստացիոնար բուժհաստատությունների վերաբացման մասին: Հայաստանում կան կենտրոններ, որտեղ բուժվում են հիվանդները: Եթե ունենանք այնպիսի թվեր, որ կարիք լինի վերաբացելու, բնականաբար կգնան նաև դրան: Ամենայն հավանականությամբ, կդիտարկվի մայրաքաղաքում մյուս կենտրոնների վերաբացումը: Եթե մահճակալները չբավարարեցին, այդ ժամանակ նոր մարզային կենտրոնների վերաբացման մասին խոսք կլինի»,- ասել է Լեյլի Ասլանյանը:

Գյումրիի ինֆեկցիոն հիվանդանոցը մինչև 102 մահճակալ ծավալելու հնարավորություն ունի: Բայց մինչ հերթը մարզային կենտրոնների վերապրոֆիլավորմանը կհասնի, նախ մայրաքաղաքում են ավելանալու կորոնավիրուսով հիվանդներին ընդունող բուժհաստատությունները: Հիվանդացության ներկայիս տեմպերը հաշվի առնելով, մասնագետները կանխատեսում են, որ մարզերում նման բուժհաստատությունների կարիք առաջիկայում չի լինի:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։