Սպիտակի երկրաշարժն աշխարհում մնում է ամենաուսումնասիրվածը. գիտնական Սերգեյ Նազարեթյանի 400 աշխատությունների կեսից ավելին 88-ի աղետի մասին են

Սեյսմիկ պաշտպանության Հյուսիսային տարածաշրջանային կենտրոնում  նախկին տնօրենի, այժմ պետի խորհրդականի աշխատանքային օրը սկսվում է տվյալների ամփոփման սենյակից: Այստեղ է հավաքագրվում 17 սեյսմիկ կայաններից ստացվող տեղեկատվությունը, որը մասնագետի համար պարզ է դարձնում պատկերը, թե սեյսմիկ ինչպիսի իրավիճակ է:

Սպիտակի երկրաշարժն էր այն սկզբնակետը, որը պարտադրեց Հայաստանին ունենալ Սեյսմիկ ծառայություն: Գիտական գործունեության ընթացքում Սերգեյ Նազարեթյանը մոտ 400 աշխատության հեղինակ է: Դրանցում մանրամասն ու համակողմանիորեն ուսումնասիրված է Սպիտակի երկրաշարժը: Հետագայում կազմվել են օջախային գոտում գտնվող բնակավայրերի միկրոշրջանացման քարտեզները, գնահատվել է սեյսմիկ ռիսկը:

«Սպիտակի երկրաշարժը շատ կարևոր առանձնահատկություն ունի, որ համարվում է աշխարհի լավ ուսումնասիրված երկրաշարժերից մեկը: Սպիտակի երկրաշարժից հետո 40 զարգացած երկրներից մասնագետներ եկան, կայաններ տեղադրեցին, ուսումնասիրեցին երկրաշարժը: Սպիտակի երկրաշարժը մեզ համար հատուկ հետազոտական լաբորատորիա դարձավ: Մոտ 400 գիտական աշխատանքներ եմ հրատարակել: Դրանց կեսից ավելին Սպիտակի երկրաշարժին են վերաբերում, կամ դրա դասերին»,-Shantnews-ին ասել է երկրաֆիզիկոս, գիտնական Սերգեյ Նազարեթյանը:

Երկրաֆիզիկոսն այսօր աշխատանքի էր եկել իր համար ամենաթանկ ու արժեքավոր մեդալը կրծքին: Մ․ Լոմոնոսովի անվան մեդալը 1998-ին նրան շնորհել է Լենինգրադի «Կենսապահովման անվտանգության գիտությունների ազգային ակադեմիան»:

Սեյսմիկ պաշտպանության Հյուսիսային տարածաշրջանային կենտրոնի պետի խորհրդական, երկրաֆիզիկոս Սերգեյ Նազարեթյանը նշում է գիտական գործունեության 50 ամյակը: Դրանցից 20-ը երկրաֆիզիկայի ինստիտուտում աշխատած տարիներն են, իսկ 30 տարիները բաժին են հասնում սեյսմիկ պաշտպանության Հյուսիսային ծառայության կազմավորմանն ու գործունեությանը: Սերգեյ Նազարեթյանի գիտական գործունեության 50 ամյակն ամփոփող գրքի շնորհանդեսը տեղի է ունեցել այսօր:

Գրքում այն ամենն է, ինչին հասել է Հայաստանը սեյսմիկ անվտանգության բնագավառում: Սերգեյ Նազարեթյանի և նրա գործընկերների մշակած մեթոդաբանությունը, որով գնահատվել է բնակավայրերի սեյսմիկ ռիսկը, հրապարակվել է ամերիկյան «Սեյսմիկ ինստրումենթս» հեղինակավոր ամսագրում, նրան, որպես առաջադեմ գիտնականի, հրավիրել են գիտական զեկույցների աշխարհի 30 երկրներում: Թեև ինքն իրեն համեստորեն ոչ թե գիտնական, այլ գիտաշխատող է համարում:

Աշխատանքային տարիներն ամփոփելուց հետո, իհարկե, չի մոռանում խոսել տարածաշրջանի սեյսմիկ ակտիվության մասին: Մասնավորապես, Գեղարքունիքում և մայրաքաղաքից ոչ հեռու տեղի ունեցած վերջին երկրաշարժերի մասին: Գնահատականը երկու օջախների համար էլ նույնն է՝ սեյսմիկ իրավիճակը կայուն է:

«Շորժայի օջախային գոտին հանգստացել է: 200-ից ավելի հետցնցումներ այնտեղ եղան: Երևանի մոտ՝ Նուբարաշենի օջախը ևս հանգիստ է, և որ ամենակարևորն է՝ անոմալիաներ չունենք: Երբ որ նոր տեղում է հայտնվում երկրաշարժ, դա ավելի անհանգստացնող է, քան, օրինակ, Փարաքարում տեղի ունեցողները: Մենք արդեն գիտենք Փարաքարի օջախի բնութագիրը: Այնտեղ լինում են ոչ խոր ցնցումներ: Ժողովուրդը վախենում է ու այսքանով վերջանում է: Նուբարաշենի երկրաշարժը նույն բեկվածքի վրա է, Փարաքարի օջախի շարունակությունն է»,- Shantnews-ի հետ զրույցում ասել է Սերգեյ Նազարեթյանը:

Սեյսմաբանությունում, ասում է՝ պետք է համարձակ, բայց միևնույն ժամանակ զգույշ լինել: Գյումրիում այսօր սեյսմիկ ռիսկը ամենացածրն է, որովհետև 88-ից հետո շինարարության որակն էր ուշադրության կենտրոնում: Այս մոտեցումը, ըստ երկրաֆիզիկոսի, պետք է կիրառվի նաև մյուս բնակավայրերում:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։