Մեքենայում ծխելու համար 50 հազար դրամ տուգանք. նոր օրենքը շատ խիստ է լինելու

«Ծխախոտային արտադրատեսակների օգտագործման բացասական ազդեցության նվազեցման և կանխարգելման մասին» օրենքի նախագիծն էական սահմանափակումներ է նախատեսում: Դրանց մի մասը նոր է, մյուսները գործող օրենքում կան, բայց իրականում հաճախ չկիրառվող սահմանափակումների խստացված տեսակներն են: Թե երբ ու ինչ տեսքով կընդունվի օրենքը կամ ինչքանով այն կփոխի իրավիճակն ու վերաբերմունքն այս խնդրի նկատմամբ մեր հասարակությունում, բարդ հարց է: 

Համենայնդեպս, առաջարկվող նոր օրենքը շատ լուրջ փոփոխություններ կատարելու փորձ է: Եվ այսպես, ի՞նչ է առաջարկում օրենքի նախագիծը: Սկսենք արգելքներից: 

                                                    Որտե՞ղ է արգելվելու ծխելը

Ցանկը   բավական մեծ է՝  բժշկական հաստատություններ, բոլոր տեսակի ուսումնամարզական,  մանկապատանեկան, բնակչության սոցիալական պաշտպանության հաստատություններ, կինոթատրոններ, թանգարաններ, գրադարաններ, ժամանցի կենտրոններ, դահլիճներ, մարզադաշտեր, ռեստորաններ, ճաշարաններ, սրճարաններ, բարեր, բուֆետներ: 

Ծխելն արգելվելու է նաև մշակույթի հուշարձանների և բնության հատուկ պահպանվող տարածքներում, պետական և տեղական ինքնակառավարման կառույցներում, հյուրանոցներում, մոթելներում, հանգստյան տներում, ճամբարներում, բազմաբնակարան շենքերի վերելակներում, միջանցքներում և ընդհանուր օգտագործման տարածքներում, օդանավակայաններում, ավտոկայաններում, կայարաններում՝ բացառությամբ ծխելու համար հատուկ նախատեսված տեղերի: Ծխել չի թույլատրվելու բոլոր տեսակի տրանսպորտային միջոցներում ու ոչ միայն:   

Հիմա ուշադրություն դարձրեք՝ որքան էլ մտովի դժվար լինի պատկերացնել այդ իրավիճակները, ծխել արգելվելու է նաև տրանսպորտի կանգառներում և սպասասրահներում, խաղատներում: 

     Որտե՞ղ է արգելվելու վաճառքը

Գրեթե բոլոր այս վայրերում արգելվելու է նաև ծխախոտի վաճառքը: Իրացման արգելքի մասով դարձյալ հետաքրքիր  նորամուծություններ կան: Վաճառվող յուրաքանչյուր տուփի վրա երկու կողմից, ընդհանուր մակերեսի 50 տոկոսի, այսինքն՝ ուղիղ կեսի  վրա, պետք է հայերեն լեզվով տեղեկատվություն լինի մարդու առողջության վրա ծխախոտի բացասական ազդեցության մասին: 

Անչափահասին ծխախոտ վաճառելու արգելքը նոր չէ, թեև նույնքան վաղուց էլ այն չի գործում: Նոր է զեղչի կիրառման արգելքը ծխախոտի համար, նաև արգելվելու է ծխախոտը վաճառել բաց տուփով և հատով:  Գովազդը դարձյալ կարգելվի ու նաև ցուցադրումը տեսանյութերում, բացառությամբ, եթե տեսանյութից առաջ նշվում է ծխախոտի վնասների մասին:  Բոլոր այս սահմանափակումները վերաբերում են ոչ միայն իրական ծխախոտին, այլև ծխախոտանման այլ ապրանքներին, օրինակ՝ էլեկտրոնային ծխախոտին: Ի դեպ, չի թույլատրվի նաև ծխախոտի խաղալիք-նմանակների վաճառքը:      

                                                                                      Ամենակարևորի մասին  

Ի՞նչ տեղի կունենա, եթե այս ամենին լուրջ չվերաբերվենք: Ավելի ճիշտ, ի՞նչ է սահմանում օրենքն այս արգելքներն  անտեսելու համար: 

Այստեղ դարձյալ հատուկ ուշադրություն:  Չթույլատրված վայրերում ծխախոտ վաճառելու համար տուգանքը 500 000 դրամ է, գովազդի համար՝  500-700 հազար դրամ: Չթույլատրված վայրերում ծխելու համար տուգանքը 50-250 հազար դրամ է սահմանվելու:  50 հազար դրամով  կտուգանվեք,  եթե ծխեք նույնիսկ սեփական մեքենայում: 

 Համենայնդեպս, օրենքի նախագծով այդպես է սահմանված: