Որևէ անգամ պարոն Դեմոյանին ֆիզիկապես չեմ տեսել. ԿԳ փոխնախարար

ՀՀ կրթության և գիտության փոխնախարար Հովհաննես Հովհաննիսյանի պնդմամբ՝ Հայկ Դեմոյանին աշխատանքից իրենք չեն ազատել, որովհետև աշխատանքից ազատում են մարդուն, որը պաշտոն ունի, իսկ նա պաշտոն չի ունեցել, չի հանդիսացել տնօրեն կամ տնօրենի պաշտոնակատար:

Փոխնախարարը նշեց, որ իրեն Հայոց ցեղասպանության թանգարան-ինստիտուտի տնօրեն համարող Դեմոյանը երեկ պնդեց ճիշտ հակառակը, որովհետև հասկացավ՝ փաստերի դիմաց կանգնելն անհնարին է, եթե ոչ անտրամաբանական: Ըստ Հովհաննիսյանի՝ Դեմոյանը եղել է թանգարան-ինստիտուտի տնօրենը, հետո՝ տնօրենի պաշտոնակատար, իսկ հետո, առանց ակադեմիայի նախագահին դիմում գրելու, որ պարտավոր էր անել, գնացել է ԱՄՆ, ուսանել է այնտեղ: Նրա գնալուց հետո թանգարանը կանգնել է խնդիրների առաջ՝ աշխատավարձի, տարբեր հարցերի հետ կապված:

Հովհաննիսյանն ասաց, որ խոսել է ակադեմիայի ղեկավարության հետ, ասել են՝ տեղյակ չեն եղել, որ նա գնացել է, ու կանգնել են փաստի առաջ, որովհետև թանգարանը պետք է ղեկավարվեր: Հարցին՝ որքան ժամանակ է նա բացակայել, փոխնախարարն ասաց՝ ընդհանուր առմամբ ինը ամիս: Նրա խոսքերով՝ ակադեմիան ընդհանրապես այդ պարագայում Դեմոյանին պետք է հեռացներ աշխատանքից. կա աշխատանքային պայմանագիր, որ նա խախտել էր, այնինչ ձևակերպվել է արձակուրդ, տնօրենի պարտականությունները հանձնվել են փոխտնօրեն Սուրեն Մանուկյանին:

Հետո, ըստ փոխնախարարի, տեղի ունեցավ այն, որ Սուրեն Մանուկյանը հրաժարվեց այդ պարտականություններից, ապա տնօրեն նշանակվեց Գևորգ Վարդանյանը, դրանից հետո փոխվեց թանգարանի կարգավիճակը՝ այն ՊՈԱԿ-ից հիմնադրամի վերածվեց:

«Որքան տեղյակ եմ՝ պարոն Դեմոյանը ևս ջանքեր է գործադրել այդ կարգավիճակին հասնելու համար: Կառավարության որոշմամբ տնօրենի պաշտոնակատար նշանակվեց Գևորգ Վարդանյանը: Երբ տեղի ունեցավ իշխանափոխություն, առաջին դիմումներից մեկը, որ ստացանք շատ պատահական, Գևորգ Վարդանյանի հրաժարականի դիմումն էր: Ես իր հետ հանդիպել եմ, խնդրել եմ՝ գնա թանգարան, որ գոնե աշխատավարձերի ու աշխատանքային պայմանների մասով մենք խնդիր չունենանք: Բարձիթողի վիճակ էր, որևէ մեկի կողմից չէր ղեկավարվում: Դրանից հետո վերադառնում է պարոն Դեմոյանը, իրենց հռչակում տնօրեն»,- ասաց նա:

Հիշեցմանը՝ դրան հաջորդեց ԿԳ ներկայացուցիչների՝ թանգարան-ինստիտուտ ներխուժելու դեպքը, նա արձագանքեց, որ իրենք չէին կարող ներխուժել մի տեղ, որը Դեմոյանին չի պատկանում: Հովհաննիսյանն ասաց, որ այդ հիմնադրամի լիազոր մարմինը ԿԳՆ-ն է, իրենք նամակ են ստացել թանգարան-ինստիտուտի աշխատակիցներից, ովքեր հանդիպում են խնդրել, գնացել են այնտեղ, տեսել են այդ ազատ սենյակը, խոսել փոխտնօրենների հետ, ապա հանդիպել աշխատակիցներին, և որևէ մտահոգիչ հարց չի բարձրացվել այդ հանդիպման ժամանակ:

Անդրադառնալով իր հասցեին Հայկ Դեմոյանի վիրավորական գրառմանը՝ փոխնախարարը նշեց.

«Որևէ անգամ պարոն Դեմոյանին ֆիզիկապես չեմ տեսել: Ես չէի կարող նույն ոճով պատասխանել, դա իմ ոճը չէ: Դա վիրավորական տեքստ էր՝ մի մարդու կամ մարդկանց նկատմամբ, որոնց ընդհանրապես չի ճանաչում: Սա նոնսենս է ուղղակի, չիմանալով մարդուն՝ նրա անցած ճանապարհը դնել կասկածի տակ»:

Հովհաննիսյանը կրկնեց՝ իրենք Հայկ Դեմոյանի հետ չհանդիպելու խնդիր չունեն, պարզապես սարսափելի ծանրաբեռնված գրաֆիկով են աշխատում:

«Ինքը, որքանով գիտեմ, զանգել է, խնդրել է հանդիպում, հետո ինչ-ինչ պատճառներով չի ստացվել, հետո ես զանգել եմ իրեն, զրուցել, իսկ հետո ունեցանք այդ հրաշագեղ տեքստը»,- ասաց նա:

Հարցին՝ կարո՞ղ է Դեմոյանը կրկին իր թեկնածությունն առաջադրել հիմնադրամի կարգավիճակ ձեռք բերած թանգարան-ինստիտուտի տնօրենի պաշտոնին, փոխնախարարը պատասխանեց, որ յուրաքանչյուր ոք, ով համապատասխանում է այդ չափանիշներին, կարող է իր թեկնածությունը առաջադրել, այդ թվում՝ պարոն Դեմոյանը: