Տիրան Խաչատրյանն ընդդեմ ՀՀ նախագահի հայցի քննությունը սկսվեց ՀՀ վարչական դատարանում

ՀՀ Վարչական դատարանն այսօր, դատավոր Մերի Համբարձումյանի նախագահությամբ, սկսել է ՀՀ Զինված ուժերի Գլխավոր շտաբի պետի նախկին առաջին տեղակալ Տիրան Խաչատրյանի դիմումի քննությունը` իրեն պաշտոնից ազատելու ՀՀ նախագահ Արմեն Սարգսյանի հրամանագիրն անվավեր ճանաչելու պահանջով:

Հայցվորի ներկայացուցիչն այսօր դատարանում ներկայացրել է այն հիմքերը, որոնց առկայությամբ տվյալ հրամանագիրը խախտում է ՀՀ Սահմանադրության մի քանի հոդվածներ: Նա, հղում կատարելով ՀՀ Սահմանադրության 50-րդ հոդվածին, Մարդու իրավունքների եվրոպական ազատությունների պաշտպանության կոնվենցիայի 13-րդ հոդվածին, նշել է, որ չի ապահովվել Տիրան Խաչատրյանի լսված լինելու իրավունքը:

Հայցվորի ներկայացուցիչը անդրադարձել է նաև Yerevan.today լրատվական կայքում Խաչատրյանի վերաբերյալ հոդվածին.

«Քանի որ ժամանակագրական տեսանկյունից դեպքերի դասավորվածությունն այնպիսին է եղել, որ հրամանագրի կայացումը և Yerevan.today-ի հոդվածի հրապարակումը տեղի են ունեցել նույն օրը, ենթադրաբար, ազատման հիմքում դրված է կայքում հրապարակված հոդվածը։ Սակայն հայցվորից բացատրություն չի պահանջվել այդ հոդվածի վերաբերյալ։ Ներկայացուցիչը պնդել է, որ ՀՀ նախագահը խախտել է ՀՀ Սահմանադրության 123-րդ հոդվածի 3-րդ մասը. «Հապճեպ որոշումը կայացնելիս նախագահը լիազորություն իրականացնելիս չի ապահովել անաչառություն»։

Ըստ հայցվոր կողմի՝ հայցի հիմքերից մեկն էլ խտրական վերաբերմունքն է։

Դատավոր Մերի Համբարձումյանն ասաց, որ դատարանը գտնում է, որ սույն գործով անհրաժեշտ է հրավիրել ևս մեկ նախնական դատական նիստ՝ դատավարության նոր մասնակցին ներգրավելու, դատավարությանը մասնակից դարձնելու նաև ՀՀ ԶՈՒ ԳՇ-ի ներկայացուցչին, նաև լրացուցիչ ապացույց ձեռք բերելու նպատակով։

Գործով որպես երրորդ անձ ներգրավված են վարչապետի աշխատակազմն ու Զինված ուժերի Գլխավոր շտաբը: Դատարան այսօր որպես երրորդ կողմ ներգրավեց նաև ՀՀ պաշտպանության նախարարությանը:

Հիշեցնենք, որ նախագահ Արմեն Սարգսյանը, հիմք ընդունելով վարչապետի առաջարկությունը, 2021 թվականի փետրվարի 24-ի հրամանագրով Խաչատրյանին ազատել էր Հայաստանի Հանրապետության Զինված ուժերի Գլխավոր շտաբի պետի առաջին տեղակալի պաշտոնից: