Հայաստանի հեռանկարը կայուն է. հրապարակվել է «Մուդիս»-ի զեկույցը

Կառավարության այսօրվա նիստը վարել է ՀՀ փոխվարչապետ Սուրեն Պապիկյանը, քանի որ վարչապետ Նիկոլ Փաշինյանը կարճատև արձակուրդում է: Փոխվարչապետը նախ շնորհավորել է  Արցախի Հանրապետության տոնի առթիվ, այնուհետև, մինչ նիստի օրակարգային հարցերին անցնելը, նշել է, որ օգոստոսի 31-ին «Մուդիս» միջազգային վարկանիշավորման կազմակերպության կողմից հրապարակած զեկույցում Հայաստանը պահպանել է իր դիրքերը 2019 թվականի համեմատ: Ըստ այդ  զեկույցի՝ Հայաստանի վարկանիշը ԲԱ 3 է, հեռանկարը՝ կայուն:

ՀՀ ֆինանսների նախարար Տիգրան Խաչատրյանը նշել է, որ «Մուդիս»-ի կողմից նախորդ գնահատումը կատարվել էր 2019 թվականին, որից հետո 2020-ին COVID-ի տարածման և պատերազմական գործողությունների հետևանքով Հայաստանի տնտեսության համար ի հայտ են եկել էական տնտեսական ռիսկեր, այս գնահատմամբ արձանագրվում է նման ռիսկերի նկատմամբ Հայաստանի տնտեսության դիմակայունության բարձրացումը։

«Նշվածը շատ կարևոր ազդակ է միջազգային ներդրողների համար, քանի որ վերահաստատում է Հայաստանի տնտեսական աճի կայուն հեռանկարը և կառավարության տնտեսական քաղաքականության բարենպաստությունը ներդրումների համար։ Այն ընդգծում է նաև Հայաստանի բարձր տնտեսական աճի սպասումների և կառավարության հարկաբյուջետային կարողությունների վերականգնման վերաբերյալ «Մուդիս»-ի կանխատեսումը»,- ասել է Տիգրան Խաչատրյանը՝ նկատելով, որ  հրապարակման մեջ կարևոր տեղ են գրավում պետական պարտքի կառավարմանն առնչվող հարցերը։

«Չնայած 2020 թվականի արդյունքներով կառավարության պարտք-ՀՆԱ ցուցանիշն աճել է և կազմել 63,5 տոկոս, «Մուդիս»-ն այս զեկույցով ընդգծում է, որ կարևորում է առաջիկա 5 տարիների ընթացքում հիշյալ ցուցանիշը 60 տոկոսից նվազեցնելու վերաբերյալ Հայաստանի կառավարության քաղաքականությունը։ «Մուդիս»-ն ընդգծել է այն գործոնները, որոնք կարող են նպաստել Հայաստանի վարկանիշի հետագա բարձրացմանը։ Դրանք են՝ տնտեսության մրցունակության բարձրացմանը և կառավարման ինստիտուտների արդյունավետությանն ուղղված բարեփոխումների արագացումը, ընթացիկ հաշվի պակասուրդի բարելավումը, այդ թվում՝ օտարերկրյա ուղղակի ներդրումների միջոցով, հարևան երկրների հետ հարաբերությունների լարվածության թուլացումը։ Զեկույցի հրապարակումը նաև կարևոր է այն տեսանկյունից, որ դրանում ընդգծված հարցերը վերահաստատում են կառավարության գործունեության ծրագրում տեղ գտած քաղաքականությունների մեծ նշանակությունը՝ Հայաստանի տնտեսական զարգացման բարձր և կայուն արդյունքները երաշխավորելու հարցում»,- ասել է Տիգրան Խաչատրյանը։