Ատեստավորված ուսուցիչների աշխատավարձը կբարձրանա. Փաշինյան

Կառավարության այսօրվա նիստը վարչապետ Նիկոլ Փաշինյանը սկսեց մի հայտարարությամբ, որը վերաբերում էր ուսուցիչների ատեստավորմանը: Նա նշեց, որ այս օրերին ընթանում է կարևորագույն ռազմավարական ծրագրերից մեկի իրագործումը, որը «շրջադարձային նշանակություն պետք է ունենա Հայաստանի հետագա զարգացման գործում»:

«Խոսքն ուսուցիչների կամավոր ատեստավորման գործընթացի մասին է, այսինքն՝ ուսուցիչներն իրենք են ընտրում՝ ատեստավորվել, թե ոչ, վերահաստատել իրենց որակավորումը, թե ոչ, սրա արդյունքում նրանց աշխատավարձերը՝ կախված հավաքած միավորներից, նոյեմբերից կբարձրանան 30, 40 կամ 50 տոկոսով», – ասաց Փաշինյանը:

Նա նշեց, թե որոշ ժամանակ բաց կթողնեն կամավոր ատեստավորման պատուհանը, ընդ որում, առարկաների ցանկը կընդայլնեն, բոլոր առարկաներով կամավոր ատեստավորում կիրականացնեն, ովքեր չեն հասցրել այս փուլում, կարող են անցնել հաջորդ փուլում:

Հաջորդ փուլով արդեն ատեստավորված ուսուցիչների համար իրականացվի երկրորդ ատեստավորումն՝ ավելի բարձր չափանիշներով:

«Այսինքն՝ այն ուսուցիչները, որոնք մի անգամ իրենց աշխատավարձն իրենց գիտելիքով կարողացել են բարձրացնել, հնարավորություն կունենան ևս մեկ անգամ կրկին ատեստավորման միջոցով բարձրացնել իրենց աշխատվարձը: Այն ուսուցիչները, որոնք կխոստովանեն, որ չունեն համապատասխան որակավորում, մենք այդ ուսուցիչներին կաջակցենք մասնագիտական վերապատրաստում անցնել ու աշխատանք փորձել գտնել այլ ոլորտում, որովհետև կառավարությունը չի կարող հանդուրժել ցածր որակավորում ունեցող ուսուցչի ներկայությունը դպրոցներում», – ասաց Նիկոլ Փաշինյանը:

Այս գործընթացը կլինի բացարձակ կամավոր, և շղթան փակելը ամբողջությամբ կտևի երեք-չորս տարի:

Վարչապետի հավաստիացմամբ՝ պետք է ապահովեն, որ բարձր որակավորում ունեցող ուսուցիչները նաև կարողանան իրենց գիտելիքները փոխանցել հեռավոր գյուղերի աշակերտներին:

ԿԳՄՍ նախարար Վահան Դումանյանն էլ տեղեկացրեց, որ սեպտեմբերի 26-ին վերջին ատեստավորումն է եղել, դիմել է 1372 ուսուցիչ, որոնցից ատեստավորման գործընթացին մասնակցել է 996-ը:

«468 ուսուցիչ կստանա 30, 40 կամ 50 տոկոս հավելավճար», – նշեց նախարարը:

ՀՀ գլխավոր դատախազ Արթուր Դավթյանն էլ ասաց, որ ընդամենը կարճ ժամանակ առաջ ԱԱԾ-ի կողմից մի դեպք էր բացահայտվել, որ գնահատման կենտրոնի աշխատակիցը գումարի դիմաց թեստեր էր տրամադրել:

Նիկոլ Փաշինյանն էլ ասաց, թե գործընթացին, անհրաժեշտության դեպքում, դատախազությունն էլ կներգրավվի, որպեսզի նման երևույթները բացառվեն: