Գյումրեցի հրաձիգները պատրաստվում են Նորվեգիայում կայանալիք Եվրոպայի երիտասարդական առաջնությանը

Գյումրեցի 3 մարզիկներ պատրաստվում են հրաձգության Եվրոպայի առաջնությանը՝ վազող թիրախ ոճում։ Հունվարի 21-ից 23-ն անցկացված Հայաստանի առաջնության եզրափակիչ փուլը հաղթահարած մարզիկները ձևավորել են Հայաստանի հավաքականը, որն էլ կմեկնի Նորվեգիայում փետրվարին կայանալիք հրաձգության առաջնությանը։

Գյումրեցի 8 պատանի մարզիկներ են մասնակցել Հայաստանի մեծահասակների առաջնությանը, նրանցից 6-ը վաստակել են մեդալներ։

«4 մարզիկ մասնակցել է վազող թիրախ և 4-ը՝ ատրճանակ ձևերում։ Մեր երեխաները գրավել են 2 հատ առաջին տեղ, 3 հատ երկրորդ և 1 հատ երրորդ տեղ», – ShantNews.am-ի հետ զրույցում նշել է Գյումրիի հրաձգության մանկապատանեկան մարզադպրոցի մարզիչ Էդվարդ Ղարիբյանը։

2021-ին գյումրեցի մարզիկները հրաձգության միջազգային առաջնությունների չեն մասնակցել, համավարակի պատճառով միջազգային առաջնություններն էին չեղարկվել, դրա համար էլ մեդալների հավաքածուն չէր թարմացվել։ Բայց այս ընթացքում մարզումները չեն դադարեցրել, մարզադպրոցի ունեցած պայմաններն էլ չեն փոխվել, որոնք անհամեմատելի են ոչ միայն միջազգային հրաձգարանների, այլև Հայաստանի մյուս մարզադպրոցների հետ։

Գյումրիի հրաձգության մարզադպրոցը 22 տարի է նախկին ԴՕՍԱԱՖ-ի շենքում է։ Տարածքը վարձակալել են, վճարն էլ փոխանցվում է տեղական բյուջեից։ Սեփականատերը չեն, այդ պատճառով էլ շենքի նորոգման ու այլ աշխատանքներ չեն կարող կատարել։

«Մենք ուզում ենք, որ համալիրը մասնավորի բալանսից տեղափոխվի, որպեսզի կարողանանք վերանորոգման հարց կարգավորել։ Էս ներկա հարմարությունները մենք ենք ստեղծել, էդ ժամանակ արդեն համայնքապետարանը կկարողանա գումար հատկացնել, որ մեզ ինչ պետք է սարքենք, ինչը պետք չէ պակասեցնենք»,- նշել է Գյումրիի հրաձգության մարզադպրոցի տնօրեն Համլետ Մկրտչյանը։

Ձմռան ամիսներին մարզադպրոցի միայն 3 սենյակն են օգտագործում, տաքություն ապահովում են փայտի վառարաններով։ Սեզոնին 12 խորանարդ մետր վառելափայտ են գնում, գումարի մի մասը քաղաքապետարանն է տալիս, մյուսը լրացնում են մարզադպրոցի սաների վարձավճարներից։ Դրանից բաժին են հանում նաև փամփուշտների համար։

Մարզադպրոցն իր հաշվեկշռում նաև մարզական զենք չունի, գույքային ապահովվածությունը լրացվում է ֆեդերացիայի միջոցով։ Սկսնակ մարզիկները սովորում են  խորհրդային տարիներից մնացած զենքերով, լավ արդյունքների հասած հրաձիգներին ժամանակավոր մարզական զենք տրամադրել է ֆեդերացիան։

«Երեխան եթե էկավ, ես ոչ մի զենք չունիմ օր տրամադրեմ իրան պարապի, պիտի սպասենք մեր երեխաներից որևէ մեկը հիասթափվի գնա, իր զենքը տանք էդ նոր էրեխուն»,-ասում է մարզիչ Էդվարդ Ղարիբյանը։

Միջազգային մրցույթների մասնակցող մարզիկների համար խնդիր է նաև համազգեստը։ Առաջնություններին մասնակցում են մաշված հագուստով։ Գոռ Խաչատրյանը հրաձգության Եվրոպայի չեմպիոն է դարձել այդպիսի մաշված հագուստով, հետո Հայաստանի ֆեդերացիայի նախագահն է Գոռի համար մարզական հագուստ գնել։

Մարզադպրոցի բակում համապատասխան տարածք կա, որտեղ կարող են մարզվել 50 մետր կրակող մարզական զենքով, որի հնարավորությունները մարզադպրոցն հիմա չունի։ Մոտ 50 սան ունեցող մարզադպրոցում, հերթափոխով ու հարմարեցված սենյակներում, հին ու անհամապատասխան մարզագույքով մարզումները շարունակվում են։ Մարզիկների առջև հստակ նշաձող է դրված՝ ապահովել բարձր ցուցանիշներ փետրվարին կայանալիք Եվրոպայի առաջնությունում։