ՀՀ վարչապետի հարցազրույցը մեծ արձագանք է գտել թուրքական լրատվադաշտում

Թուրքական լրատվամիջոցներում մեծ հետաքրքրություն է առաջացրել ՀՀ վարչապետ Նիկոլ Փաշինյանի՝ Al Jazeera-ին տված հարցազրույցը, որտեղ Փաշինյանը խոսել է հայ-թուրքական սահմանի ու Թուրքիայի հետ առանց նախապայմանների երկխոսության գնալու պատրաստակամության մասին:

Թեմային անդրադարձել են թուրքական լրատվադաշտի գրեթե բոլոր լրատվամիջոցները՝ արձանագրելով, որ հայ-թուրքական միջպետական հարաբերությունների ֆոնին նման հայտարարությունն անսպասելի էր:

«Վերջին ամիսներին տեղի ունեցած փողոցային ակցիաներից հետո վերջ դնելով նախորդ իշխանությանը, վարչապետ Նիկոլ Փաշինյանն ասել է, որ իրենք պատրաստ են առանց նախապայմանների դիվանագիտական ​​հարաբերություններ հաստատել Թուրքիայի հետ»,- գրում է, թուրքական Haber7 լրատվամիջոցը՝ «Հաղորդագրություն Հայաստանից Թուրքիա: Մենք պատրաստ ենք դիվանագիտական հարաբերություններ հաստատել» խորագրով հոդվածում:

Այնպիսի լրատվամիջոցներ, ինչպիսիք են Milliyet-ը, CNN Turk-ը, A Haber-ը, NTV-ն, մեջբերում են հայ-թուրքական սահմանի վերաբերյալ ՀՀ վարչապետի խոսքերն այն մասին, որ Թուրքիայի հետ սահմանը մեր կողմից միշտ էլ բաց է եղել և այն փակելու միակողմանի որոշում է կայացվել Թուրքիայի կողմից:

Milliyet պարբերականը մեջբերել է վարչապետի՝ տարածաշրջանային խաղաղության ու անվտանգության ապահովման գործում պատրաստակամության մասին խոսքերը։

Նմանատիպ անդրադարձ է կատարել նաև Թուրքական Haber7-ը՝ ներկայացնելով Արցախյան հիմնախնդրի կարգավորման վերաբերյալ  ՀՀ վարչապետի կատարած մեկնաբանությունն այն մասին, որ «հայկական կողմը ցանկություն ունի այդ հարցը լուծել միայն խաղաղ ճանապարհով, և, որ այդ նպատակով պատրաստ է բանակցությունների, սակայն, բանակցությունների համար անհրաժեշտ մթնոլորտը չպետք է միակողմանի լինի»:

Նույն աղբյուրը ներկայացրել է նաև հայկական Թավշյա հեղափոխությունից հետո հարևան Ադրբեջանում տիրող մթնոլորտի ու դրա հետևանքով այդ երկրի իշխանությունների վախի վերաբերյալ ՀՀ վարչապետի անդրադարձը:

«Փաշինյանը, որ 6 օր տևած փողոցային պայքարից հետո իր ձեռքն էր վերցրել Սարգսյանի կառավարությունը և այն անվանել «Թավշյա հեղափոխություն», նշել է, որ նմանատիպ փոփոխություններ կարող են տեղի ունենալ նաև Ադրբեջանում»,- գրում է աղբյուրը՝ մեջբերելով Փաշինյանի տեսակետն այն մասին, որ նմանատիպ իրավիճակներից զերծ մնալու ցանկությունից ելնելով էլ ադրբեջանական իշխանությունները լարված էին պահում իրավիճակն առաջնագծում:

Արաբական լրատվամիջոցին տված հարցազրույցին անդրադարձել են ոչ միայն թուրքական լրատվամիջոցները: Հուլիսի 28-ին թվիթերյան իր էջում հրապարակում է արել նաև թուրք ընդդիմադիր քաղաքական գործիչ Մուստաֆա Սարիգյուլը:

«Հայաստանի վարչապետ Փաշինյանն ասաց, որ իրենք պատրաստ են Թուրքիայի հետ դիվանագիտական հարաբերություններ հաստատել՝ առանց նախապայմանների: Մենք պետք է տեսնենք այն ձեռքը, որը Հայաստանը մեկնել է որպես դիվանագիտական նշանակության պատմական հնարավորություն»,- գրել է թուրք քաղաքական գործիչը:

Ավելի վաղ SHANTNEWS.am-ը հայտնել էր, որ ՀՀ վարչապետ Նիկոլ Փաշինյանը ծավալուն հարցազրույց է տվել Al-Jazeera հեռուստաընկերությանը հայտնի Talk to Al Jazeera ծրագրի շրջանակում՝ անդրադառնալով երկրում տեղի ունեցած իշխանափոխության գործընթացին ու դրա հետևանքներին, կոռուպցիայի դեմ պայքարին, Լեռնային Ղարաբաղի հակամարտությանն ու Թուրքիայի հետ փակ սահմաններին: Նա ասել էր, որ Հայաստանը պատրաստ է առանց նախապայմանների դիվանագիտական հարաբերություններ հաստատել Թուրքիայի հետ, և որ հայկական կողմից Թուրքիայի հետ սահմանը երբեք փակ չի եղել: