Կյանքի դժվարին իրավիճակում հայտնված անձանց պետությունը կտրամադրի աջակցության քարտ

Կառավարությունն առաջարկում է սահմանել սոցիալական պաշտպանության հաստատության ևս մեկ տեսակ` համայնքային փոքր տներ: ՀՀ աշխատանքի և սոցիալական հարցերի նախարարի տեղակալ Աննա Ժամակոչյանի տեղեկացմամբ՝ կառույցը հոգեկան առողջության, մտավոր խնդիրներ ունեցող անձանց, ինչպես նաև տարեցներին կտրամադրի մասնագիտացված խնամք և սոցիալական ծառայություններ:

Այդ և այլ փոփոխությունները կատարվում են «Սոցիալական աջակցության մասին» օրենքում:

Սոցիալական աջակցության ոլորտում մի շարք հրատապ խնդիրների կարգավորման և սոցիալական ծառայությունների բարեփոխումների համար կառավարությունն առաջարկում է ստեղծել անհրաժեշտ իրավական հիմքեր: Սահմանվում են պետական վկայագիրը և աջակցության քարտը: Դրանք կտրամադրվեն կյանքի դժվարին իրավիճակում հայտնված անձանց՝ նպատակ ունենալով հոգալ նրանց առաջնային կարիքները, ապահովել սննդով, հագուստով և առաջին անհրաժեշտության գույքով:

Սահմանվում են նաև սոցիալական աջակցության արդյունավետ քաղաքականության մշակման համար անհրաժեշտ այլ լիազորող նորմեր:

Պատգամավորները հետաքրքրվել են, թե նախարարությունն ինչպիսի ծրագրեր է նախատեսում իրականացնել հաջորդ տարի: Զեկուցողը նշել է, նախարարությունը նոր ծառայություններ կիրականացնի 2023 թ. սկսած: Նախատեսվում է փորձարկել պիլոտային ծրագրեր, որոշակի սոցիալական խմբերի համար բանկային քարտի միջոցով պարենի գնման հնարավորություն ստեղծել:

Հարակից զեկույցում Աշխատանքի և սոցիալական հարցերի մշտական հանձնաժողովի անդամ Մարիամ Պողոսյանը նշել է, որ հանձնաժողովը, կարևորելով բարեփոխումների անհրաժեշտությունը, նախաձեռնությանը տվել է դրական եզրակացություն:

ՀՀ աշխատանքի և սոցիալական հարցերի նախարարի տեղակալ Աննա Ժամակոչյանի ներկայացմամբ պատգամավորները քննարկել են նաև «Հայաստանի Հանրապետության հողային օրենսգրքում լրացում կատարելու մասին» օրենքի նախագիծը:

Նշվել է, որ պետության և համայնքի սեփականություն հանդիսացող հողամասերը նվիրաբերության պայմանագրով ու անհատույց սեփականության իրավունքով կարող են տրամադրվել սոցիալական, բարեգործական կամ ներդրումային ծրագրեր իրականացնելու նպատակով, սակայն ներկայում բացակայում են ծրագրերը սոցիալական ճանաչելու չափանիշները: Դրանք մշակելու ընթացքում ակնհայտ է դարձել, որ առանց համապատասխան ընթացակարգերի՝ սոցիալական ճանաչելու չափանիշները կիրառելի չեն: Ուստի, կառավարությունը լրացում է առաջարկում Հայաստանի Հանրապետության հողային օրենսգրքում, այն է՝ Հայաստանի Հանրապետության 2001 թ. մայիսի 2-ի Հողային օրենսգրքի 65-րդ հոդվածի 7-րդ մասը «չափանիշները» բառից հետո լրացնել «և ընթացակարգը» բառերով:

Հարակից զեկույցում Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի անդամ Սերգեյ Բագրատյանը նշել է, որ փոփոխությունը կարևոր է, այն միտված է լուծելու ներդրումային և սոցիալական ծրագրերի իրականացման ընթացքում առաջացող խնդիրները: Պատգամավորի խոսքերով՝ հանձնաժողովը քննարկել է նախագիծը և տվել է դրական եզրակացություն:

Նախագծերն առաջին ընթերցմամբ քննարկվել են հունիսի 9-ի ԱԺ արտահերթ նիստում: