Քննարկվել է ԱՆ-ում կորոնավիրուսային համավարակով պայմանավորված բյուջետային ծախսերի հաշվեքննության արդյունքների վերաբերյալ Հաշվեքննիչ պալատի ընթացիկ եզրակացությունը

Մինչ Ազգային ժողովի կողմից այս հաշվետվության նախաձեռնումը՝ Հաշվեքննիչ պալատի ծրագիրը հաստատված է եղել, և վերջինս փոփոխություն է կատարել իր ծրագրում՝ նախատեսելով նաև այս հաշվետվության իրականացումը. նշել է ՀՀ հաշվեքննիչ պալատի նախագահ Ատոմ Ջանջուղազյանը հունիսի 10-ի ԱԺ ֆինանսավարկային և բյուջետային հարցերի ու առողջապահության հարցերի մշտական հանձնաժողովների համատեղ նիստում:

Նիստում քննարկվել է «ՀՀ առողջապահության նախարարությունում նոր կորոնավիրուսային համավարակով (covid-19) պայմանավորված բյուջետային ծախսերի հաշվեքննության արդյունքների վերաբերյալ» Հաշվեքննիչ պալատի ընթացիկ եզրակացությունը:

Ատոմ Ջանջուղազյանի խոսքով՝ գործող օրենսդրությունը չունի կարգավորումներ այն դեպքերի համար, երբ ոչ ծրագրային հաշվեքննության պատվեր է դրվում Հաշվեքննիչ պալատի առջև: Խնդրին իրավիճակային լուծում է տրվել, և այլ հաշվեքննությունների իրականացումը հետաձգվել է:

Հաշվեքննիչ պալատի VII վարչության պետ Խաչիկ Փափազյանը ներկայացրել է օրենսդրական և մեթոդական հիմքերը, որոնց հիման վրա իրականացվել է հաշվեքննությունը: Նշվել է, որ համավարակի կանխման և բուժման նպատակով 2020 թ. կառավարության պահուստային ֆոնդից տրամադրվել է 26,5 մլրդ դրամ: Հաշվեքննության շրջանակում ձեռք բերված բավարար ապացույցների հիման վրա հաշվեքննություն իրականացնող խումբը եզրահանգել է, որ համավարակի կանխարգելման ու բուժման նպատակով համարժեք պլանավորման աշխատանքներ չեն իրականացվել, հատկացված ֆինանսավորման համար չեն սահմանվել ծախսային ուղղություններ ու ոչ ֆինանսական արդյունքային ցուցանիշներ, որոշումների կայացման գործընթացում չեն կիրառվել սահմանված հաշվետվողականության մեխանիզմները: Բժշկական կազմակերպությունների՝ մեկ պացիենտի համար կատարված մասնագիտական անձնակազմի վարձատրության և դեղորայքային ու բժշկական նշանակման ապրանքների ծախսերի միջև ևս արձանագրվել են տարբերություններ:

Զեկուցողի խոսքերով՝ հաշվեքննությունն իրականացվել է առողջապահության նախարարության հետ գործընկերային մթնոլորտում՝ պահպանելով օրենսդրությամբ սահմանված չափորոշիչները և նպատակ ունենալով համագործակցության ճանապարհով բարելավել հանրային սեփականության և բյուջետային միջոցների կառավարման արդյունավետության աստիճանը:

Հաշվեքննիչ պալատի ընթացիկ եզրակացությանն անդրադարձել է առողջապահության նախարար Անահիտ Ավանեսյանը: Նա նշել է, որ համավարակը նոր էր. ընդգրկուն և շատ բարդ է արդյունքների վերաբերյալ գնահատականներ տալը: Հաշվեքննիչ պալատն անդրադարձել է պլանային արդյունքային ցուցանիշներին, նպատակայնությանը, արդյունավետությանը և խնայողությանը վերաբերող հարցերին: 2020 թ. նախարարությունը, աշխատելով Առողջապահության համաշխարհային կազմակերպության և այլ երկրների համապատասխան կառույցների հետ, արագ ձևավորել է աշխատանքային խումբ: Մշակվել են կորոնավիրուսային համավարակին վերաբերող հանրապետական և միջգերատեսչական պլաններ, որոնք երեք անգամ վերանայվել են: Նախարարը նշել է, որ ըստ միջազգային կառույցների արձագանքի՝ ճիշտ ժամանակին ձեռնարկվել են հստակ մեխանիզմներ և գործողություններ, որոնք հանգեցրել են համավարակի կառավարմանն ու պացիենտների բուժմանը: Անահիտ Ավանեսյանը նշել է, որ համակարծիք չէ Հաշվեքննիչ պալատի այն եզրակացության հետ, թե համավարակի կանխարգելման ու բուժման նպատակով համարժեք պլանավորման աշխատանքներ չեն իրականացվել: Նախարարը մանրամասնել է, որ ներկայացվել են հստակ հիմնավորումներ տվյալ բժշկական կենտրոնի իրականացրած գործառույթների, վերապրոֆիլավորման աշխատանքների, ձեռքբերումների և փաստացի ծախսերի վերաբերյալ: Ըստ նրա՝ Հաշվեքննիչ պալատի կողմից արվել են ոչ ճիշտ միջինացումներ, որն էլ հանգեցրել է արդյունքային սխալ ցուցանիշների:

Անահիտ Ավանեսյանի խոսքերով՝ ի սկզբանե ռազմավարական մոտեցում է կիրառվել համավարակի դեմ պայքարում, և առանձին հիվանդանոցներ սկսել են սպասարկել քովիդով հիվանդներին, իրականացվել է համաճարակաբանական վերահսկողություն: Նախարարը հիշեցրել է, որ 2020 թ., ի տարբերություն Եվրամիության շատ երկրների, Հայաստանում չի եղել դեղորայքի, դիմակների, կոնցենտրատորների խիստ պակաս, և արված ներդրումների արդյունքում հնարավոր է եղել ապահովել ամբողջական ապահովվածություն:

Անահիտ Ավանեսյանը նշել է, որ իրենք չեն ընդունում այն եզրահանգումները, որոնք խեղաթյուրում են կորոնավիրուսային համավարակի դեմ պայքարի ամբողջ ընթացքում գերատեսչության վարած քաղաքականությունն ու արդյունքները:

ԱԺ պատգամավոր Լուսինե Բադալյանը շնորհակալություն է հայտնել բուժաշխատողներին, առողջապահության նախարարությանը՝ կատարած աշխատանքների համար: Առողջապահության գերատեսչության ղեկավարը պատասխանել է պատգամավորների հարցերին: