Ահագնացող գնաճի բոլոր գործոններն այժմ կան. կանխատեսվում է, որ դա շարունակվելու է նաև հաջորդ տարի. Թադևոս Ավետիսյան

Այն բյուջեն, որ բերել են այսօրվա իշխանությունները, դարձյալ, եթե սոցիալական իմաստով գնահատելու լինենք, հետեւյալի մասին է.ամեն հաջորդ օր, նաեւ հաջորդ տարի, մեր քաղաքացիները, խոսքը վերաբերում է աշխատող աղքատներին, միայնակ կենսաթոշակառուներին, ընդհանրապես` աղքատ ընտանիքներին, ավելի վատ են ապրելու ամեն հաջորդ օր, քան դրա նախորդ օրը, քանի որ ամեն հաջորդ օր գներն աճում են, իսկ եկամուտները դրան համաչափ` ոչ: ԱԺ մամուլի ծառայության փոխանցմամբ՝ այս մասին ասել է ՀՀ ԱԺ «Հայաստան» խմբակցության պատգամավոր Թադեւոս Ավետիսյանն ԱԺ նիստերին հաջորդող ճեպազրույցների ընթացքում:

Իրավական տեսանկյունից գնահատելով` պատգամավորը նշել է, թե սա հակասում է մեր երկրի սահմանադրական հիմնական պահանջներին, քանի որ մեր երկրի տնտեսական կարգի հիմքը պետք է լինի սոցիալականը:

Թադեւոս Ավետիսյանն անդրադարձել է սոցիալական հարցերին, ժողովրդագրական խնդիրներին, սպառողական ապրանքների գնաճին եւ ցածր աշխատավարձերին` համեմատականներ անցկացնելով պաշտոնատար անձանց եւ շարքային քաղաքացիների աշխատավարձերի միջեւ: Ըստ պատգամավորի` ահագնացող գնաճի բոլոր գործոններն այժմ կան. կանխատեսվում է, որ դա շարունակվելու է նաեւ հաջորդ տարի:

«Հայաստան» խմբակցության պատգամավոր Գեղամ Մանուկյանը ճեպազրույցների ընթացքում անդրադարձել է իրենց խմբակցության` քառօրյային մասնակցելուն, նշելով, որ այս լիագումար նիստին մասնակցելը պայմանավորված էր նրանով, որ այն կարեւոր հարցերը որոնք ունեին, որոնք տեղավորվում էին իրենց օրակարգում, այդ հարցերի շուրջ մասնակցեն քննարկումներին եւ բարձրաձայնեն իրենց տեսակետը:

«Այդքան գովերգած նախագծերը լոկ փոքր դետալներ են: 2 տարի է իշխանությունը խոսում է ԶՈՒ բարեփոխումների ռազմավարության մասին: 2022 թ. փետրվարին Սուրեն Պապիկյանը հայտարարեց, որ ռազմավարությունը պատրաստ է, բայց արդեն հասել ենք նոյեմբեր ամիս, դեռ գլոբալ ռազմավարությունը ներկայաացված չէ: Փոքր դետալներով փորձում են տպավորություն ստեղծել, որ արմատական բարեփոխումներ են իրականանում: Իրականում այս նախագիծը փոխարինելու է «Ես եմ» ծրագրին, որն իշխանությունն իր հիմնավորումներում նշում է, որ չի հաջողել, նշանակում է, որ այս իշխանությունը` իր նշանակած Պաշտպանության նախարարներով, զինվորական վերնախավով տապալել է այդ ծրագիրը եւ նոր ծրագիր է առաջ բերում, որն ինքնին խնդրահարույց է»,- նշել է ընդդիմադիր պատգամավորը: