Շիրակի մարզի աշնանացանը վտանգված է․ ձյան տեղումների բացակայության պատճառով ցանքատարածքներում բավարար ձմեռացում տեղի չի ունենում

Շիրակի մարզի 78․000 հա վարելահողերի ավելի քան 50․000-ը կա՛մ անջրդի  են, կա՛մ անմշակ։ Բայց գյուղացին անջրդի հողերը մշակում է, բերք ստանալու միակ հույսը տեղումներն են։ Իսկ եղանակային պայմանները բարեհաճ չեն Շիրակի մարզի վարելահողերի համար։ Ձմռան երկրորդ ամիսն է ավարտվում, բայց տեղումներ չկան։

Հացահատիկի շտեմարան համարվող  Ախուրյանի տարածաշրջանի աշնանացանի դաշտերը ամբողջովին բաց են, դեկտեմբերից ձյան շերտի կտոր չկա։ Եղանակն ու գյուղացիների սպասելիքները, մեղմ ասած, անհամատեղելի են։ Աշնան սկզբին գյուղացիական տնտեսությունները ցորենի սերմացու են գնել, մի մասն էլ հողը  մշակել է պետական սուբսիդավորման  ծրագրով։ Ձյան ծածկույթ չկա, իսկ ցերեկվա տաք եղանակն ու գիշերվա ցածր ջերմաստիճանը բերքին լավ բան չեն խոստանում։

Գյուղացիներն ասում են՝ խոնավություն չկա, նույնիսկ վարած հողի կոշտերը չեն  հալվել, որ նորմալ ցանք  լինի, բույսը մտնի հողի մեջ, ծլի ու բերք տա։

Սա հողագործները համարում են անոմալ վիճակ, որը հազվադեպ է տեղումնառատ Շիրակի մարզի համար։ Ձյան շերտը բացակայում է անգամ ձյունառատ Աշոցքի և Ամասիայի տարածաշրջաններում, որտեղ ավելի ցածր ջերմաստիճան է գրանցվում, ինչը ևս բացասական ազդեցություն կարող է ունենալ գյուղատնտեսության վրա։

Անցած տարի Ախուրյանի տարածաշրջանում աշնանացան ավելի շատ են ցանել՝ նախորդ տարվա համեմատ։ Ցորենի ցանքատարածքներն աճել են 25-30 տոկոսով, հեկտարներն ավելացել են նաև աշնանացան ցորենի սերմացուի պետական օժանդակության ծրագրի արդյունքում։

«Գրեթե 6000-6100 հա աշնանացան ցորեն է ցանվել, նախորդ տարիների 5000-5200 հեկտարի փոխարեն։ Դա բավականին տեսանելի ցուցանիշ է, մնում է, որ եղանակային պայմանները նորմալ լինեն»,- ասում է Ախուրյան խոշորացված համայնքի ղեկավարի տեղակալ Վարդան Իկիլիկյանը։

Այս պահին դեռ եղանակային պայմանները Շիրակի մարզի համար բարենպաստ չեն։ Գյուղատնտեսների գնահատմամբ՝ սա աննախադեպ է։ Հողում խոնավությունը բացակայում է, ինչն ազդում է բույսի վեգետացիայի վրա։

«Չկա ձյունածածկ, որը պաշտպանում է աշնանացան ցորենը, նաև գոլորշիացում է տեղի ունենում, եթե սա այսպես շարունակվեց, բնականաբար, մեծ աղետ է գյուղատնտեսության համար՝ ոչ միայն աշնանացան ցորենի, նաև գարնանացան մշակաբույսերի համար»,- նշում է Ախուրյան խոշորացված համայնքի ղեկավարի տեղակալ Վարդան Իկիլիկյանը։

Հողագործները դեռ սպասում են, որ մեկ ամսվա ձյան բացակայությունը կլրացվի փետրվար-մարտ ամիսներին, երբ սովորաբար Շիրակի մարզում ավելի տեղումնառատ են լինում։ Գրանցված  չոր  եղանակի պայմաններում, տարածաշրջանում բույսի ցրտահարման դեպքեր չեն արձանագրվել։ Ընդհանուր առմամբ տեղումներ չլինելու վատ հետևանքները գարնանն են երևալու, երբ ոռոգման ջրի խնդիր ևս առաջ գա։