Բարձր տեխնոլոգիական արտադրությունը՝ կառավարության առաջնահերթություն

ՀՀ վարչապետ Նիկոլ Փաշինյանը ֆեյսբուքյան ուղիղ եթերում ներկայացրեց, թե կառավարությունն ինչպես է պատկերացնում տնտեսության զարգացման մոդելը և ռազմավարությունը։ Նա խոսեց ներդրողներից, նշեց՝ պոտենցիալ ներդրողները լինում են երկու ճաշակի՝ մի մասն ուղղակի գիտի՝ ինչ է ուզում անել, գալիս, ներդրում են անում, մյուս մասի համար կարևոր է, որ կառավարությունն ուղերձ հղի, թե հատկապես որ ոլորտներում է տեսնում ներդրումներ, տնտեսության կառուցվածքի մասին ինչ պատկերացում ունի։

Փաշինյանն ասաց՝ տնտեսության լոկոմոտիվի դերում կառավարությունը տեսնում է բարձր տեխնոլոգիական արդյունաբերությունը, ապա ընդգծեց՝ սա վերաբերում է բարձր տեխնոլոգիական կոնկրետ, ինչպես ընդունված է ասել «կոշտ» արտադրանքին, նշեց, որ, ըստ էության, Հայաստանում այդպիսի հետաքրքրություններ, նախանշաններ կան, և իրենք ուզում են, որ դրանք ավելի ակտիվանան։

«Այսօր արդեն որոշակի արտադրություն կա բարձր տեխնոլոգիական արտադրանքի։ Հետաքրքիր հնարավորություններ կան արևային էլեկտրակայանների պանելների արտադրանք սկսելու համար։ Սա մի ոլորտ է, որ իսկապես հեռանկարային կարելի է համարել, որովհետև արևային էներգետիկան նոր սկսում է զարգանալ, և առաջիկա դարերին ամենահզոր ճյուղերից է լինելու»,- ասաց նա։

Վարչապետն ասաց, որ արդեն կան ներդրումներ և որոշակի տեխնոլոգիական ապրանքների գծով, ինչպես նաև նշեց, որ հագուստի և կենցաղային տեխնիկայի արտադրանքի թողարկում է սկսվելու, ապա հույս հայտնեց, որ այդ արտադրանքը, արտադրությունը, գործարանը հաջողակ կլինի։ Փաշինյանի համոզմամբ՝ Հայաստանը պետք է լինի բարձր տեխնոլոգիական երկիր, և շատ կարևոր է, որ լինի տեխնոլոգիական արտադրանքի արդյունաբերություն, որն, իր հերթին, նորմալ պայմաններ կստեղծի ռազմարդյունաբերության զարգացման համար, որն էլ մեր երկրի անվտանգության կարիքները բավարարելու, անվտանգության մակարդակը բարձրացնելու առումով կարևոր նշանակություն ունի, ինչպես նաև բարձր վարձատրվող աշխատատեղերի առումով է կարևոր։

Հաջորդը վարչապետն ընդգծեց ՏՏ ոլորտը, հայտնեց, որ կառավարությունը մտադիր է ամեն կերպ աջակցել ոչ միայն բարձր տեխնոլոգիական ապրանքների իրական արդյունաբերության հիմնադրմանը, այլև ոլորտի բնականոն զարգացմանը։