Ո՞ր դեպքերում փոքր հէկերի կառուցումը կարգելվի

ՀՀ բնապահպանության նախարար Էրիկ Գրիգորյանը Կառավարության օգոստոսի 23-ի նիստում ներկայացրեց «Ջրային օրենսգրքում լրացում և փոփոխություն կատարելու մասին» օրենքի նախագիծը։ Դրանով արդեն իսկ օրենքով սահմանված մերժման հիմքերից բացի նոր կառուցվող փոքր հիդրոէլեկտրակայանների ջրօգտագործման թույլտվությունների հայտերը մերժվում են նաև, եթե՝

1) փոքր հիդրոէլեկտրակայանների կառուցումը նախատեսվում է այն գետերի վրա ՝
ա. որոնցում առկա են Հայաստանի Հանրապետության Կարմիր գրքում գրանցված կամ տարածքին բնորոշ՝ էնդեմիկ ձկնատեսակների ձվադրավայրեր,
բ. որոնց ծանրաբեռնվածությունը դերիվացիոն խողովակներով 40 տոկոս և ավելի է,
գ. որոնց վրա կան ջրաչափական դիտակետեր և նախատեսվող ջրառի և ջրահեռացման նիշերը շրջանցում են ջրաչափական դիտակետերը:

Սույն մասով նախատեսված գետերի ցանկը սահմանում է Հայաստանի Հանրապետության կառավարությունը:

2) փոքր հիդրոէլեկտրակայանների կառուցումն իրականացվում է՝
ա. բնության հատուկ պահպանվող տարածքների պահպանման գոտիներում,
բ. բնության հուշարձանների 150 մետր շառավղով հարակից տարածքներում,
գ. ջրաէկոհամակարգերի պահպանման գոտիներում,
դ. գետերի հոսքի ձևավորման տարածքներում,
ե. գետահատվածներում, որտեղ առկա են սողանքային տարածքներ,
զ. անտառային տարածքներում, որոնք հատվելու են շինարարական տարածքին մոտեցող ճանապարհներ կառուցելիս, բացառությամբ պետական անտառային հողերում աշխատանքների իրականացման համաձայնության առկայության դեպքերի:

Սույն մասով նախատեսված սողանքային տարածքները սահմանում է Հայաստանի Հանրապետության կառավարությունը:

Նախագծի ներկայացումից հետո ՀՀ վարչապետ Նիկոլ Փաշինյանը հետաքրքրվեց՝ այս օրենքի ընդունումից հետո փաստացի մնո՞ւմ են գետեր, որոնց վրա կարելի է հիդրոէլեկտրակայաններ կառուցել։

Ի պատասխան՝ Գրիգորյանը նշեց, որ ըստ էության՝ հէկերի կառուցումը նոր հաստատված ռազմավարությամբ արդեն գերազանցել է Հայաստանի համար թույլատրելի ծավալը։

«Այս կարգավորումներն արգելմանը չեն վերաբերում, այլ նրան, որ փոքր հէկերը, որոնք էկոլոգիական տեսանկյունից ավելի ընդունելի են, լինեն․ փոքր հէկերի կառուցումը բերել էր իրավիճակի, որ բազմաթիվ էկոլոգիական և ոչ միայն էկոլոգիական խնդիրներ էր առաջացրել, այն էականորեն ազդել էր նաև ջրի բնական հոսքի ծավալների վրա, այսինքն՝ նաև տնտեսական, սոցիալական խնդիրներ էր բերել»,- ասաց նա։

Նախարարն ընդգծեց՝ ցանկալի է, որ Հայաստանում այլընտրանքային էներգետիկայի հետագա ուղղվածությունը լինի արևային էներգետիկան, ոչ թե փոքր հէկերի հետագա կառուցումը։ Նա նաև հայտնեց, որ այս օրենքի՝ հետադարձ ուժ ունենալու դեպքում բազմաթիվ հէկերի աշխատանք կդադարեցվեր։