Բաքվի և Երևանի միջև խաղաղության պայմանագրի համաձայնեցման հարցում ամեն ինչ չէ, որ այնքան արագ է ընթանում, որքան մենք կցանկանայինք. ՌԴ ԱԳՆ պաշտոնյա

Ռուսաստանի արտաքին գործերի նախարարություն. Երևանն ու Բաքուն դեէսկալացիայի վերաբերյալ Մոսկվայի առաջարկներն իրենց տնային աշխատանք են ընդունել

Տարածաշրջանում լարվածության թուլացման վերաբերյալ Ռուսաստանի առաջարկները Հայաստանն ու Ադրբեջանը ընդունել են «տնային ուսումնասիրության համար»։ Այս մասին ՏԱՍՍ-ին տված հարցազրույցում ասել է ՌԴ ԱԳՆ ԱՊՀ երկրների չորրորդ վարչության տնօրեն Դենիս Գոնչարը։

«Հուլիսի 25-ին Մոսկվայում Ռուսաստանի, Ադրբեջանի և Հայաստանի արտգործնախարարների մակարդակով վերջին շփումները տեղի են ունեցել Լեռնային Ղարաբաղում ստեղծված ծայրահեղ ծանր իրավիճակի ֆոնին։ Առանց զգայուն մանրամասների հրապարակման՝ կարող եմ ասել, որ մեր կողմը փոխզիջման առաջարկ է արել։ Լարվածության թուլացման լուծումները, որոնք կողմերը վերցրել են` որպես «տնային ուսումնասիրություն»: Մենք հույս ունենք, որ մարդասիրական նկատառումները, հասարակ մարդկանց մտահոգությունը կգերազանցի Բաքվի և Երևանի միջև քաղաքական տարաձայնությունները»,-ասել է նա:

Գոնչարը նաև նշել է, որ ռուսական կողմը շարունակում է ակտիվ միջնորդական ջանքերը բոլոր ուղղություններով, ներառյալ տարածաշրջանում տնտեսական և տրանսպորտային հաղորդակցությունների ապաշրջափակումը, հայ-ադրբեջանական սահմանի սահմանազատման գործընթացի մեկնարկը, Բաքվի և Երևանի միջև խաղաղության պայմանագրի համաձայնեցումը, երկխոսության զարգացումը:

«Ամեն ինչ չէ, որ այնքան արագ է ընթանում, որքան մենք կցանկանայինք, բայց դա հասկանալի է, հաշվի առնելով այն խնդիրների և հակասությունների շարքը, որոնք կուտակվել են հակամարտության տարիների ընթացքում», – շարունակել է նա:

Ինչ վերաբերում է Հարավային Կովկասում տնտեսական և տրանսպորտային հաղորդակցությունների ապաշրջափակմանը, նշել է դիվանագետը, այդ հարցերը մանրամասն քննարկվում են Եռակողմ աշխատանքային խմբի (TWG) միջոցով, որը համանախագահում են Ռուսաստանի, Ադրբեջանի և Հայաստանի փոխվարչապետները։ Նա ասել է, որ TWG-ի վերջին հանդիպումը տեղի է ունեցել հունիսի 2-ին Մոսկվայում։

«Արդյունքների համաձայն՝ կողմերը զգալի առաջընթաց են արձանագրել Ադրբեջանի և Հայաստանի միջև տրանսպորտային հաղորդակցության ապաշրջափակման եղանակների համաձայնեցման հարցում, մասնավորապես, ընդհանուր փոխըմբռնում է ձեռք բերվել Երասխ-Ջուղա երկայնքով երկաթուղային հաղորդակցության վերականգնման և կազմակերպման կոնկրետ քայլերի իրականացման վերաբերյալ։ Հուլիսի 25-ին Մոսկվայում Ռուսաստանի, Ադրբեջանի և Հայաստանի ԱԳ նախարարների եռակողմ հանդիպման ժամանակ շոշափվել է նաև այս թեման, մեր կողմից ցանկություն է հայտնվել. որքան հնարավոր է շուտ այս աշխատանքը տեղափոխել նախագծային փուլ»,-ասել է Գոնչարը:

Նրա խոսքով, Ռուսաստանը ձգտում է ապահովել, որ «այս ուղու վրա բոլոր պայմանավորվածությունները լինեն հավասարաչափ»:

«Կողմերից ոչ մեկը չպետք է ունենա այն զգացումը, որ ինչ-որ մեկն ավելին է ստացել: Տրանսպորտային հաղորդակցությունների ապաշրջափակումը, առաջին հերթին՝ երկաթուղայինները, կօգնի բացել Հարավային Կովկասի հսկայական տնտեսական ներուժը և հզոր խթան կհաղորդի եռակողմ աշխատանքի մյուս բոլոր ոլորտներին»,- ասել է դիվանագետը։