Ամեն նոր կառավարություն պետք է լսի ընդդիմությանը և չկատարի հնի սխալները. Շարմազանով

ԱԺ փոխխոսնակ Էդուարդ Շարմազանովը խորհրդարանի՝ օգոստոսի 28-ի արտահերթ նիստի ժամանակ կարևորեց Սևանա լճից լրացուցիչ ջրառի հարցով քննարկման կազմակերպումը: Նրա խոսքերով՝ ԱԺ-ն պետք է ոչ թե ընդդիմություն-իշխանություն ներքաղաքական պայքարի, իրար դեմ քարեր նետելու դիրքորոշում ցուցաբերի, այլ պետական մոտեցում ունենա: Շարմազանովը նշեց՝ պետք է հարցին մոտենալ լրջությամբ:

«Այսօր Հայաստանում նորաձև է դարձել քաղաքական իրավիճակի կամ իրադրության փոփոխության պայմաններում կարծիք փոխել: Ես չեմ տրվի այդ գայթակղությանը, կունենամ այնպիսի ելույթ, որ ունեցել եմ տարիներ շարունակ՝ այս հարցի հետ կապված: Մենք ընտրում ենք վատի ու վատագույնի միջև, չկա լավի ու վատի ընտրություն: Սևանը մեր բոլորի աչքի լույսն է, կա պետական ծրագիր՝ Սևանի աղտոտվածության, մակարդակը բարձրացնելու: Սևանը մեր հայ ազգի հարստությունն է, միևնույն ժամանակ մենք գյուղացիական տնտեսությունների առջև կանգնած օրհասական հարց ունենք. եթե հողերը չջրամատակարարվեն, կունենանք գյուղատնտեսական, գուցե նաև պետական աղետ»,- ասաց նա:

Շարմազանովի կարծիքով՝ խորհրդարանը պետք է ամբողջ ծավալով իրականացնի իր վերահսկողական լիազորությունները: Նա նշեց, որ շատ հարգելով գործող կառավարության իր գործընկերներին՝ պատրաստ է աշխատել նրանց հետ, քանի որ բոլորը նույն պետության քաղաքացիներն են, և իրենց բոլորի երեխաները, հույս հայտնեց՝ նաև թոռները, ապրելու են այս պետությունում: Ըստ Շարմազանովի՝ յուրաքանչյուր կառավարության խնդիրն ավելի լավ կառավարելն է, քան նախորդը, հակառակ դեպքում ինչո՞ւ են գալիս իշխանության:

«Եթե նոր կառավարությունն ավելի վատ պետք է կառավարի, քան նախորդը, ուրեմն՝ մարդկությունը պետք է պրոգրես չունենար: Ես հուսով եմ, անկախ իմ կուսակցական պատկանելությունից, որ Հայաստանում ամեն նոր կառավարություն ավելի լավ կկառավարի, բայց դրա համար նա պետք է լսի ընդդիմության կարծիքը, և չկատարի հին կառավարության սխալները»,- նշեց նա:

Շարմազանովն, անդրադառնալով լսումների անհրաժեշտությանը, փաստեց, որ նման լսումների կարիք կա՝ բոլոր շահագրգիռ կազմակերպությունների մասնակցությամբ, ապա ընդգծեց՝ սա այն հարցն է, որ լուծում է պահանջում՝ կոնկրետ, մասնագիտական, լուրջ քննարկում՝ առանց տեսախցիկների:

«Սևանը մեր ազգային հարստությունն է, բայց վատի ու վատագույնի միջև ընտրելիս պետք է ընտրել վատը՝ ջուր բաց թողնել, որ գյուղացիական տնտեսությունները չջրազրկվեն: Ընդդիմություն լինելը լավ բան է, բայց պետական գաղափարախոսությունն ավելի կարևոր է»,- ասաց Շարմազանովը: