Բոլորը մրցակից են, բայց կան բարեկամ-մրցակիցներ. Արմեն Մարտիրոսյան

«Ժառանգություն» կուսակցության անդամ Արմեն Մարտիրոսյանի կարծիքով՝ Երևանի ավագանու արտահերթ ընտրություններին մասնակցող բոլոր ուժերն իրենց մրցակից են, բայց կան ուժեր, ում բարեկամ մրցակից են համարում: Իբրև օրինակ նա նշեց «Քաղաքացիական պայմանագիր» կուսակցության քաղաքապետի թեկնածուին՝ Հայկ Մարությանին: Մարտիրոսյանի խոսքերով՝ բոլոր այն ուժերին, ովքեր ընդդիմության շարքերում պայքարել են այսօրվա համար, իրենք համարում են բարեկամ-մրցակիցներ:

Իրենց ուժի շանսերի մասին խոսելով՝ Մարտիրոսյանը նշեց, որ դա կարող են գնահատել միայն քաղաքացիները:

«Ես կարող եմ ասել, որ քաղաքացիների դատին ենք ներկայացնելու ոչ միայն մեր ծրագիրը, որը զարգացման ծրագիր է: Մենք ոչ միայն առօրեական, կոմունալ խնդիրները լուծելու, այլև զարգացման խնդիր ենք դրել, իսկ մեր քաղաքացիների դատին նախ ներկայացնելու ենք «Ժառանգության» անցած ուղին, քանի որ կարևոր է՝ քաղաքական ուժի անցած ուղին, հետագիծն ինչպիսին է»,- ասաց նա:

Ծրագրային որևէ կետ «Ժառանգության» ներկայացուցիչը չառանձնացրեց, նշեց, որ իրենց ծրագրում հիմնական կետ գոյություն չունի, քանի որ Երևանում մեկ խնդիր չէ, որ կարևոր է, կան բազմաթիվ ու բազմազան խնդիրներ:

«Մենք բաց ճակատով նայում ենք մեր քաղաքացիներին, բաց ճակատով մասնակցելու ենք ընտրություններին: Մենք մշտապես եղանք քաղաքացու և պետության շահի կողքին՝ դրա համար շատ հարվածներ կրելով, բայց մեր սկզբունքայնությունը չկորցրինք: Մեր կարգախոսը «Ժպտա»-ն է, մենք պետք է ժպտանք, որովհետև հաղթել ենք»,- նշեց նա:

«Ժառանգության» նախընտրական ցուցակում 49 հոգի են, ցուցակը գլխավորում է կուսակցության առաջնորդը՝ Րաֆֆի Հովհաննիսյանը, նրան հաջորդում են Արմեն Մարտիրոսյանն ու Հովսեփ Խուրշուդյանը:

Լրագրողների հարցին՝ պատրաստ կլինե՞ն համագործակցելու «Սասնա ծռեր»-ի հետ՝ հաշվի առնելով, որ նախկինում նման համագործակցություն եղել է, Մարտիրոսյանը պատասխանեց, որ իրենք կաշկանդված չեն համագործակցելու «Սասնա ծռեր»-ի հետ, ապա հայտնեց՝ իրենք որոշում ունեն, որ միայնակ չեն իշխելու, սկզբունքորեն կարծում են, որ միակուսակցական իշխանությունը լավ երևույթ չէ:

«Ունենք որոշում, որ նախկին ընդդիմադիր գործընկերների հետ ենք համագործակցելու, ՀԿ-ների հետ, նաև քաղաքապետարանի աշխատակիցների ճնշող մեծամասնությանը գիտենք, գիտենք՝ ովքեր են յուրացումների համար եկել, գիտենք նաև ազնիվներին. բոլոր ազնիվ աշխատողները շարունակելու են իրենց գործունեությունը»,- ասաց Մարտիրոսյանը: