«Երևան հանրություն»-ը հավատում է, որ կլինեն ազատ-թափանցիկ ընտրություններ

Երևանի քաղաքապետի թեկնածու Անահիտ Թարխանյանը փաստաթղթերը Կենտրոնական ընտրական հանձնաժողով հանձնելիս խոստովանեց՝ լավ տրամադրվածությամբ է եկել:

 «Դեպի առաջ և դեպի հաղթանակ»,- ասաց նա:

Թարխանյանը գլխավորում է «Երևանի հանրություն» դաշինքը: Լրագրողները հիշեցրին՝ ամուսինը՝ Անդրիաս Ղուկասյանը, պահանջում էր ԿԸՀ նախագահ Տիգրան Մուկուչյանի հրաժարականը, արդյո՞ք ընտրությունների անցկացման հետ կապված մտավախություններ չունի:

«Երևանի հանրություն» դաշինքի անդամ Արմեն Հովհաննիսյանն արձագանքեց՝ նշելով.

«Մտավախության խնդիր չէ, վստահության խնդիր է. մենք չենք վստահում մարդկանց, ովքեր տարիների ընթացքում ներգրավված են եղել այլ տիպի ընտրություններում: Մենք էլ ենք հավատում, որ կլինեն ազատ-թափանցիկ ընտրություններ, բայց կուզենայինք, որ անվստահության որևէ նշույլ չմնար, ու պարոն Մուկուչյանի հրաժարականը կօգներ դրան»:

Դաշինքի ընտրական ցուցակում 47 անուն է, իսկ կարգախոսն է՝ «Երևան հանրություն՝ ի շահ հարազատ քաղաքի»: Ցուցակի՝ ոչ մեծ լինելու մասին խոսելով՝ Հովհաննիսյանն ասաց, որ այսօր Երևանի ավագանու կազմում ՀՀԿ-ն 46 մանդատ ունի, սակայն հոգի է ՀՀԿ-ն, իրենք չեն ուզում իրենցով փոխարինել այդ ուժը:

«Մենք նման նպատակ չունենք, գտնում ենք, որ Երևանի ավագանին բազմակուսակցական ազատ ամբիոն է լինելու, որոշումներ ընդունելու տեղ, և 46 հոգին լիովին բավարար է դրա համար»,- ասաց նա:

Թարխանյանն առանձնացրեց քաղաքում առկա և իրենց հուզող հիմնական խնդիրները, այն է՝ առողջապահություն, շրջակա միջավայր, սոցիալական խնդիրներ, որոնց մեջ՝ ներառական քաղաք, մանկապարտեզներ, դպրոցներ, մեծահասակների հարցերը, ենթակառուցվածքներ, տրանսպորտի խնդիր, ինչպես նաև նոր աշխատատեղերի ստեղծում և աշխատատեղերի ավելացում:

Քաղաքապետի թեկնածուին հարց ուղղեցին՝ ինչո՞ւ պիտի երևանցին վստահի հենց իրենց ուժին, ինչին նա պատասխանեց.

«Որովհետև մեզ մոտ մասնագետներ են, հիմնականում անկուսակցականներ ենք և ամենակարևորը՝ երկար տարիներ աշխատել ենք Երևանի խնդիրների շուրջ»: