ՔՊ-ն բակային հանդիպումներով ամենօրյա ռեժիմով երկխոսելու է երևանցիների հետ. Վահան Կոստանյան

«Քաղաքացիական պայմանագիր» կուսակցությունը Երևանի ավագանու ընտրություններին մասնակցում է դաշինքով: Օգոստոսի 29-ին Կենտրոնական ընտրական հանձնաժողովում լրագրողների հետ զրույցում կուսակցության խոսնակ Վահան Կոստանյանը նշեց, որ «Իմ քայլը» կուսակցությունների դաշինքն արդեն ներկայացրել է ավագանու թեկնածուների իրենց միասնական ցանկը, որտեղ «Քաղաքացիական պայմանագիր», «Առաքելություն» կուսակցության անդամներ են, ինչպես նաև հեղափոխությանը մասնակցած բազմաթիվ անհատներ, հանրային գործիչներ:

Ցուցակի առաջին եռյակը գլխավորում է «Քաղաքացիական պայմանագիր» կուսակցության անդամ Հայկ Մարությանը, երկրորդ տեղում Սրբուհի Ղազարյանն է, երրորդում՝ մանկաբույժ Սերգեյ Սարգսյանը, տասնյակում տեղ են գտել նաև հաղորդավարուհի Լուսինե Բադալյանը, բլոգեր Իզաբելլա Աբգարյանը և այլք:

Հարցին՝ ինչո՞ւ «Քաղաքացիական պայմանագիր»-ը դաշինքով չգնաց «Հանրապետություն» և «Լուսավոր Հայաստան» ուժերի հետ, Կոստանյանը պատասխանեց.

«Քաղաքացիական պայմանագիր»-ը «Ելք» դաշինքի հետ այս պահին համագործակցում է միայն ԱԺ ֆորմատով, իսկ «Իմ քայլը» դաշինքը թույլ է տալիս հեղափոխական ավելի ընդգրկուն դաշտ ապահովել»:

Կոստանյանը նշեց իրենց ավագանու ցուցակում ներառված հայտնի մի շարք մարդկանց՝  Նարինե Թուխիկյան, ճարտարապետ Արսեն Կարապետյան, Լևոն Զաքարյան, Արամ Մանուկյան, լրագրող Գայանե Աբրահամյան և այլք: Կուսակցության խոսնակի կարծիքով՝ ծրագրի մասին դեռ վաղ է խոսելը, թեպետ կան ուժեր, որ ասում են՝ իրենց ծրագիրը պատրաստ է, սակայն «Քաղաքացիական պայմանագիր»-ն ամենօրյա աշխատանքների մեջ է և ցանկանում է լավագույնս ներկայացնել իր նախընտրական ծրագիրը:

«Մենք հանդես ենք գալիս այս ընտրություններում որպես հեղափոխություն իրականացրած թիմ և հույս ունենք, որ մեր հաղորդակցումը ինչպես եղել է ՀՀ քաղաքացիների հետ, այդպես էլ շարունակվելու է: Մենք չենք դիտարկում մրցակիցներ, շարունակում ենք մեր հաղորդակցումը Երևանի բնակիչների հետ: Իրադարձություններից առաջ չընկնեմ, բայց կարծում եմ՝ հանրությունը լավ ճանաչում է մեր քաղաքական թիմին, և երբ ծանոթանա մեր ծրագրին, կհասկանա, որ մեր թիմն է այն իրավասու և արժեքներ կրող թիմը, որ պետք է ստանձնի Երևան քաղաքի կառավարումը»,- ասաց նա:

Կոստանյանը նշեց, որ իրենք բանակցում են Երևանի բնակիչների հետ՝ առանց մնացած ուժերի, որոնք ներգրավված են պայքարի մեջ: Նա ընդգծեց՝ ընտրություններն այն գործընթացն են, որտեղ հնարավորինս շատ ձայներ են ձգտում հավաքել, ապա հայտնեց՝ ամենօրյա ռեժիմով, բակային հանդիպումներով, սոցիալական մեդիայով երկխոսելու են երևանցիների հետ: