Ադրբեջանում եթե նույնիսկ ոջիլներից են խոսում, էլի Ղարաբաղն է մեղավոր. քաղաքագետ

«Ադրբեջանում նախընտրական շրջան է, Ադրբեջանը փորձում է այս ժամանակահատվածում տարբեր միջոցառումներ կազմակերպել, դառնալ նախաձեռնող, իր տարածքում անել, ցույց տալ, որ ինքը երկիր է, որը իր խոսքը ունի տարածաշրջանում, չի պատկերացնում, որ ինքը ուղղակի փոքրիկ երկիր է, միջոցներ ունի, ինչ որ բաներ է նախաձեռնում և տարածաշրջանային կարևորություն ունի: Դա պետք է ներկայացնի Ալիևը»,- այսօր ասել է քաղաքագետ Թևան Պողոսյանը՝ անդրադառնալով մարտի 15-ին Բաքվում տեղի ունեցած տարածաշրջանի երկրների՝ Իրանի, Թուրքիայի, Վրաստանի և Ադրբեջանի արտաքին քաղաքական գերատեսչությունների ղեկավարների հանդիպմանը։ 

Հիշեցնենք, որ Ադրբեջանի ու Թուրքիայի նախաձեռնությամբ օրերս Բաքվում անցկացվել է Մոհամմադ Ջավադ Զարիֆի, Մևլութ Չավուշօղլուի, Միխայիլ Ջանելիձեի և Էլմար Մամեդյարովի առաջին քառակողմ հանդիպումը, որի ընթացքում ընդունվել է Բաքվի հռչակագիրը։ Հռչակագրում ինչպես և սպասելի էր, տեղ է գտել Ադրբեջանի տարածքային ամբողջականության մասին դրույթը, սակայն նաև կողմերը արձանագրել են, որ բոլոր հակամարտությունները պետք է լուծվեն խաղաղ ճանապարհով: Հռչակագրով կողմերը նաև հայտարարում են, որ նախաձեռնում են տարածաշրջանային կարևորության տնտեսական բնույթի մի քանի ծրագրեր, օրինակ փաստաթղթում նշվում է, որ Ադրբեջանը, Վրաստանը, Իրանը և Թուրքիան համատեղ գործողությունների ծրագիր են նախապատրաստում համագործակցության գերակա ուղղությունների շուրջ, մասնավորապես էներգետիկ, տրանսպորտային, բանկային, արդյունաբերական, գյուղատնտեսական, զբոսաշրջային ոլորտում, պայմանավորվել են ներդրումների և առևտրի խթանման շուրջ, ինչպես նաև Հարավ-արևմուտք տրանսպորտային միջանցքի շրջանակում՝ չորս երկրների համագործակցության և տարանցիկ ներուժի ընդլայնման հնարավորության մասին: Վերջինիս դեպքում դա վերաբերում է Ռեշտ-Աստարա երկաթուղու միջոցով Պարսից ծոցի իրանական Բանդարաբաս և Ջաբահար նավահանգիստները  Բաքու-Թբիլիսի-Կարս երկաթուղու հետ միացնելու խնդրին: 

«Նախկինում միշտ այս ֆորմատը եղել է Ադրբեջան, Վրաստան Թուրքիա: Եթե նորից այդ երեքը հանդիպեին, ես կասեի՝ դա հերթականն էր: Բայց դա հերթական չէ նրանով, որ հենց Իրանն է միանում»,- նշել է Թևան Պողոսյանը՝ հավելելով, որ Իրանին էլ է հետաքրքիր միանալ այս նախաձեռնությանը, ցույց տալու համար, որ տարածաշրջանում դրական դերակատարում ունի, քանի որ քաղաքագետի համոզմամբ, Իրան-Միացյալ նահանգներ հարաբերությունների հերթական սրացումը կարող է բերել Միացյալ նահանգների կողմից նոր պատժամիջոցների կիրառման, ինչը բնականաբար, Իրանի շահերից չի բխում, և այստեղ Իրանը խնդիր ունի դաշնակիցներ փնտրել տարածաշրջանի երկրների շարքում, որոնք վաղը կարող են առարկություններ ներկայացնել, որ Իրանի նկատմամբ պատժամիջոցներից տուժում են նաև իրենց երկրները: 

Ինչ վերաբերում է հռչակագրում տեղ գտած Լեռնային Ղարաբաղի հակամարտությանն առնչվող դրույթներին, ապա Թևան Պողոսյանին դա չի զարմացրել, քանի որ նրա պնդմամբ, աշխարհի ցանկացած միջոցառում, որտեղ կա Ադրբեջանի ներկայությունը, այդ հարցը քննարկվելու է:

«Մեզ համար պետք է դառնա սովորական, որովհետև եթե նույնիսկ խոսում են էկոլոգիայից, Ղարաբաղն է մեղավոր, եթե խոսում են, չգիտեմ, աստղերից, Ղարաբաղն է մեղավոր, եթե խոսում են ոջիլներից, Ղարաբաղն է մեղավոր»:

Հայկական կողմի թերացումը, ըստ Թևան Պողոսյանի, այն է եղել, որ չի կարողացել ժամանակին աշխատել Վրաստանի ու Իրանի գործընկերների հետ, որպեսզի նրանք կարողանային կանխել փաստաթղթում տեղ գտած հակահայկական ձևակերպումները, թեև մյուս կողմից քաղաքագետի ենթադրությամբ միգուցե և քննարկումները ինչ-որ սրություն ունեցել են, քանի որ ձևակերպման մեջ տեղ է գտել նաև «բոլոր հակամարտությունները պետք է լուծվեն խաղաղ ճանապարհով» արտահայտությունը: