ՄԱԿ-ը զեկույց է հրապարակել Թուրքիայում մարդու իրավունքների զանգվածային խախտումների մասին

ՄԱԿ-ի Գերագույն հանձնակատարի գրասենյակը զեկույց է հրապարակել Թուրքիայում հայտարարված արտակարգ դրության հետևանքով այդ երկրում մարդու իրավունքների խախտումների վերաբերյալ, հայտնում է РИА Новости-ն:

«Թուրքիայում հայտարարված արտակարգ դրության տևական շարունակությունն այդ երկրում հանգեցրել է մարդու իրավունքների զանգվածային խախտումների, իսկ նախագահի հրամանագրերը խոսում են իշխանության չարաշահման և իշխանության համար ոչ ձեռնտու տեսակետներն արմատախիլ անելու ձգտման մասին»,- ասված է կառույցի տարածած հայտարարության մեջ:

Հայտարարությունն արվել է 2017 թվականի ընթացքում Թուրքիայի տարածքում իրավիճակը վերլուծելու արդյունքում:

Մասնավորապես նշվում է, որ այդ երկրում խախտվել են քաղաքացիների «աշխատանքի, ազատ տեղաշարժման իրավունքները», նշվում է նաև, որ երկրում գերակշռել են «քաղաքացիների հալածանքը, վատ վերաբերմունքը, կամայական ձերբակալությունները, ցույցերի կազմակերպման ու տեսակետների ազատ արտահայտման իրավունքի խախտումները»: 

ՄԱԿ-ի մասնագետները նշել են, որ արտակարգ դրության պայմաններում սահմանափակումները պետք է համապատսախանեն որոշակի չափանիշների և սահմանված լինեն կոնկրետ ժամանակահատվածի համար: Նրանք կոչ են արել Թուրքիայի իշխանություններին ամբողջությամբ դադարեցնել երկրում հայտարարված արտակարգ դրությունը, վերականգնել բոլոր ենթակառուցվածքների աշխատանքը, չեղարկել արտակարգ դրության ժամանակահատվածում տարածված բոլոր հրամանագրերն ու փոխհատուցել իրավունքների խախտման ենթարկված քաղաքացիներին:

ՄԱԿ-ի այս հայտարարությանն անմիջապես հետևել է Թուրքիայի ԱԳՆ պատասխան հայտարարությունը:

Երկրի արտաքին գերատեսչությունն անհեթեթ ու կողմնակալ է անվանել կառույցի կողմից պատրաստված զեկույցը՝ հայտարարելով, որ զեկույցը պատրաստողները հաշվի չեն առել Թուրքիային սպառնացող ահաբեկչական վտանգը:

«Ինչպես արդեն պարզ էր դարձել նախկին հայտարարություններից, Գերագույն հանձնակատարը փաստաթուղթը ստորագրելիս կորցրել է Թուրքիայի հանդեպ օբյեկտիվությունն ու անկողմնակալությունը: Նրանց հրապարակած վերջին հայտարարությունը ահաբեկչական խմբավորումների տեսակետի հետ համընկնող, չհիմնավորված մեղադրանքներ էր պարունակում»,- ասված է Թուրքիայի ԱԳՆ հայտարարության մեջ:

Հիշեցնենք, որ 2016թ.-ի հուլիսի 15-ին թուրք զինվորականները փորձել էին պետական հեղաշրջում իրականացնել Թուրքիայում: Հիմնական գործողությունները ծավալվել էին Ստամբուլում և Անկարայում: Բախումների հետևանքով զոհվել էր 250 մարդ, ավելի քան 2000-ը՝ վիրավորվել: Թուրքիայի իշխանությունները հեղաշրջման փորձ կազմակերպելու համար մեղադրում են իսլամական քարոզիչ Ֆեթուլլահ Գյուլենին, որը 1999թ.-ից բնակվում է ԱՄՆ-ում: Հեղաշրջման փորձի իրագործման կասկածանքով Թուրքիայում ավելի քան 50 հազար մարդ է ձերբակալվել, 140 հազարից ավելին ազատվել է աշխատանքից: