Տեղի է ունեցել «ՀՀ ճանապարհային անվտանգության ազգային ռազմավարությունը» թեմայով աշխատաժողով

ՀՀ տարածքային կառավարման և ենթակառուցվածքների նախարարությունը Ասիական զարգացման բանկի, Առողջապահության համաշխարհային կազմակերպության և «Ճանապարհային անվտանգության ազգային խորհուրդ» ՀԿ-ի հետ համատեղ նոյեմբերի 15-16-ը կազմակերպել է «Հայաստանի ճանապարհային անվտանգության ազգային ռազմավարությունը՝ ճանապարհային անվտանգ մոտեցումը։ Հայաստանում ճանապարհային անվտանգության մարտահրավերները» թեմայով աշխատաժողով:

Հայաստանում ճանապարհային անվտանգության մարտահրավերները» թեմայով աշխատաժողով ՀՀ տարածքային կառավարման և ենթակառուցվածքների, ՀՀ ներքին գործերի և ՀՀ առողջապահության նախարարությունների, պետական շահագրգիռ այլ մարմինների և կազմակերպությունների, ինչպես նաև Ասիական զարգացման բանկի, Առողջապահության համաշխարհային կազմակերպության, Ավտոմեքենաների միջազգային ֆեդերացիայի (FIA), ԵՄ երևանյան գրասենյակի, ՄԱԿ-ի Զարգացման ծրագրրերի, Ճանապարհների գնահատման միջազգային ծրագրերի (iRAP), Անվտանգ և կայուն տրանսպորտի արևելյան դաշինքի (EASST) ինչպես նաև միջազգային այլ կազմակերպությունների ներկայացուցիչների մասնակցությամբ։ Վերը նշվածի համատեքստում ՏԿԵՆ-ն ցանկանում էր բոլոր շահագրգիռ պետական մարմինների, միջազգային զարգացման գործընկեր և դոնոր կազմակերպությունների ուշադրությունը հրավիրել ճանապարհային անվտանգության ոլորտում առկա խնդիրների և դրանց բարելավմանն ուղղված գործողությունների վրա։ ՏԿԵ նախարարի տեղակալ Քրիստինե Ղալեչյանը բացման խոսքում ներկայացրել է Հայաստանում ճանապարւային անվտանգության հիմնախնդիրները։

Մասնավորապես նա նշել է, որ Հայաստանում տրանսպորտային միջոցների քանակի ավելացմանը և ճանապարհների երթևեկության լարվածության բարձրացմանը զուգահեռ բարձրանում է նաև ճանապարհային երթևեկության բոլոր մասնակիցների՝ վարորդների, հետիոտների, ուղևորների, այդ թվում՝ երեխաների կողմից ճանապարհային երթևեկության կանոններին ծանոթանալու և դրանց հետևելու պահանջը:

Նշվածից հետևում է, որ Հայաստանը պետք է բոլոր անհրաժեշտ քայլերը ձեռնարկի ճանապարհային անվտանգության բարելավման ուղղությամբ, որը ենթադրում է միջոցառումների իրականացում ուղղված և՛ ճանապարհային անվտանգության օրենսդրության վերանայմանը, և՛ ճանապարհային ենթակառուցվածքի բարելավմանը, և՛ տրանսպորտային միջոցների անվտանգությանը, և՛ վթարի տվյալների կառավարման համակարգին կատարելագործմանը, և՛ հետվթարի խնամքի համակարգի ստեղծմանը, և՛ ճանապարհներից օգտվողների խոցելի խումբին և՛ ՃՏՊ-ների հետևանքով առաջացած մահերի և լուրջ վնասվածքների թվի նվազեցմանը, և՛ կրթական ծրագրերի և հանրային իրազեկման արշավների իրականացման անհրաժեշտությանը։

Նոյեմբերի 15-ին կայացած համաժողովի ընթացքում տիկին Ղալեչյանը «Ճանապարհային անվտանգության ազգային խորհուրդ» ՀԿ-ի գործադիր տնօրեն, Հայաստանի ճանապարհային անվտանգության ազգային ռազմավարության փաստաթղթի մշակման խմբի խորհրդատու Պողոս Շահինյանի հետ ներկայացրել է նաև Հայաստանի ճանապարհային անվտանգության ազգային ռազմավարության և 2023-2027թթ․ գործողության միջոցառումների ծրագրի նախագիծը՝ հատուկ շեշտադրում կատարելով Հայաստանում ճանապարհային անվտանգության ամենաբարձր մակարդակին հասնելու «Տեսլական զրո» (Vision Zero) և «Անվտանգ համակարգի մոտեցում» (Safe System Approach) քաղաքականությանը կարևորության վրա։

Ասիական զարգացման բանկի տարածաշրջանի տնօրեն Դոն Լամբերտը ողջունելով ներկաներին նշեց, որ Ասիայի և Խաղաղօվկիանոսյան տարածաշրջանում կատարվող ներդրումների շրջանակներում ԱԶԲ-ն ներդրումներ է կատարում նաև ճանապարհային անվտանգության ոլորտում լավ կառավարման և տեխնիկական կարողությունների զարգացման մեջ, որպեսզի որոշում կայացնողները կարողանան պահպանել ճանապարհային անվտանգության բարձր չափանիշները և ձեռնարկել միջոցներ ՃՏՊ-ների հետևանքով մահվան դեպքերի ռիսկերի նվազեցման ուղղությամբ։

Միաժամանակ, Հայաստանում Առողջապահության համաշխարհային կազմակերպության տարածքշրջանային տնօրենի հատուկ ներկայացուցիչ Մարֆ Էվերարդը իր ելույթում նշեց, որ ճանապարհային անվտանգությունը հանրային առողջության առաջնահերթություններից մեկն է։

Նոյեմբերի 16-ին միջազգային փորձագետները ներկայացրել են ճանապարհային անվտանգության ոլորտում միջազգային լավագույն փորձը, որից հետո Աշխատաժողովի մասնակիցների մասնակցությամբ, Երևան քաղաքի Գրիգոր Լուսավորիչ, Արշակունյաց և Ագաթանգեղոս փողոցների խաչմերուկներում (կրկեսի հարևանությամբ) և հիշյալ հյուրանոցի մոտակայքում գտնվող Էռնեստ Թելմանի անվան թիվ 13 դպրոցին հարող ճանապարհահատվածում իրականացվել է ճանապարհային անվտանգության գնահատման գործնական աշխատանք։

Ճանապարհային անվտանգության միջազգային փորձագետների օգնությամբ աշխատանքային խմբերը նշված հատվածներում գնահատել են ճանապարհային անվտանգության առկա մակարդակները, ինչպես նաև ներկայացրել են առաջարկություններ այդ հատվածներում անվտանգության բարելավման միջոցառումներ իրականացնելու անհրաժեշտության վերաբերյալ: