Ադրբեջանի հռետորաբանությունը չի փոխվել. նրանց գործողությունները ՀՀ տարածքում, առավել եւս ՝ ԼՂ-ում չեն փոխվել. Սեյրան Օհանյան

Դեկտեմբերի 13-ի խորհրդարանական ճեպազրույցների ընթացքում ՀՀ ԱԺ «Հայաստան» խմբակցության ղեկավար Սեյրան Օհանյանը, ներկայացնելով իր դիտարկումը Լեռնային Ղարաբաղի խնդրի վերաբերյալ, փաստել է, որ ամբողջ աշխարհը պետք է իմանա Ադրբեջանի կողմից իրականացված հանցագործ քաղաքականության շարունակման պատճառով 2022 թվականի դեկտեմբերից Լեռնային Ղարաբաղի 10-ամսյա շրջափակումն ավարտվեց եւս մեկ կեղծ, ապօրինի հակաահաբեկչական գործողություններով, որի արդյունքում ԼՂ ժողովրդի նկատմամբ փաստացի իրականացվեց ցեղասպանություն՝ տեղահանմամբ:

Ըստ խմբակցության ղեկավարի՝ Լեռնային Ղարաբաղի հակամարտությունն ավարտված չէ. «Այն ավելի է խորացել, Ադրբեջանի հանցագործ գործունեությունն այն ավելի է սրել, եւ Ադրբեջանը պետք է դրա համար պատասխան տա: Լեռնային Ղարաբաղը եղել է գործոն, եւ այսօր նրա սուբյեկտայնության պահպանման համար նրա բոլոր ինստիտուտները պետք է գործեն՝ ներառյալ ժողովրդի ճակատագրի, նաեւ ժողովրդի հետվերադարձի պայմանների լուծմամբ: Եվ այս պարագայում բանակցությունները միջազգային հարթակում՝ ընդունված կամ որեւէ ընդունելի նոր ձեւաչափով այլընտրանք չունեն»:

Սեյրան Օհանյանը կարծիք է հայտնել, որ այս ռազմավարության պատասխանատուն Հայաստանի եւ Լեռնային Ղարաբաղի իշխանություններն են:

Լրագրողի հարցին՝ «Հայաստան» խմբակցությունը ծանոթացե?լ էր Խաղաղության պայմանագրին, արդյո?ք մինչեւ տարեվերջ այն կստորագրվի, ի պատասխան՝ Սեյրան Օհանյանը նշել է, որ ինքն անձամբ մինչեւ այժմ գաղտնի նյութերին ծանութանալու գաղտնիության թույլտվություն չունի: Նրա կարծիքով Լեռնային Ղարաբաղի հայաթափվելուց հետո ինչպե?ս կարելի է գնալ խաղաղության:

«Ադրբեջանի հռետորաբանությունը չի փոխվել. նրանց գործողությունները Հայաստանի Հանրապետության տարածքում, առավել եւս ԼՂ-ում չեն փոխվել: Եվ Լեռնայի Ղարաբաղի այս ցեղասպանությունից հետո ինչպե?ս կարելի է ձեռք մեկնել ցեղասպանին եւ ասել, որ այսօր պատրաստ ենք խաղաղության»,- նշել է Սեյրան Օհանյանը:

«Հայաստան» խմբակցության պատգամավոր Արթուր Խաչատրյանը չի կարծում, թե մինչեւ տարեվերջ կստորագրվի Ադրբեջանի հետ Խաղաղության պայմանագիրը: Նրա հավաստմամբ Խաղաղության պայմանագիրը խաղաղություն չի բերելու:

«Ես, անկեղծ ասած, կարծում եմ՝ մնացած այս 17 օրվա ընթացքում որեւէ փաստաթուղթ չի ստորագրվի, կամ գոնե հույս ունեմ»,- ասել է պատգամավորը:

Գերիների վերադարձի մասին հարցի առնչությամբ Սեյրան Օհանյանը նշել է, որ մեր բոլորի ցանկությունն է, որպեսզի նրանք որքան հնարավոր է շուտ վերադարձվեն:

Արթուր Խաչատրյանը կարծիք է հայտնել, որ Ադրբեջանի հետ բանակցություններում պետք է ունենալ երաշխիքների ինստիտուտ:

Տարածաշրջանային խնդիրների, հայ-ադրբեջանական հարաբերությունների վերաբերյալ հարցի առնչությամբ՝ Սեյրան Օհանյանը փաստել է. «Այն դեպքում, երբ հույսը դրել ենք մեզ վրա, հաղթել ենք»: