Նշվել է սովորություն՝ հաստ աղիքի, թոքերի, ուղեղի և սրտի առողջության պահպանման համար

Բերանի խոռոչում ապրում է ավելի քան 700 տեսակի բակտերիա, խմորիչներ, վիրուսներ: Այս ամենը նպաստում է ատամնաբուժական կարիեսի և աղիների քաղցկեղի, թոքաբորբի, Ալցհեյմերի հիվանդության և սրտանոթային հիվանդությունների զարգացմանը: Այս մասին հայտնում է The Conversation-ը։

Բերանի խոռոչի բակտերիաների (օրինակ՝ Streptococcus pneumoniae-ն և Haemophilus influenzae-ն) գերաճը կարող է պատճառ դառնալ, որ դրանք տեղափոխվեն թոքեր: Հետազոտությունները ցույց են տվել, որ բերանի խոռոչի կանոնավոր հիգիենան և ատամների պարբերական մաքրումը կարող է նվազեցնել թոքաբորբի դեպքերը տարեցների մոտ մինչև 33%-ով: Բերանի խոռոչի վատ վիճակը և մանրէների կազմի փոփոխությունները նույնպես կապված են թոքերի խրոնիկ հիվանդության և շնչառական համակարգի վատ աշխատանքի հետ:

Ապացուցված է, որ բերանի խոռոչի վատ վիճակը տարածված է սրտի և անոթային հիվանդություններ ունեցող մարդկանց մոտ: Թերևս այստեղ չկա պատճառահետևանքային կապ, այլ ավելի շուտ ընդհանուր ռիսկի գործոնների խնդիր: Օրինակ, ծխողների շրջանում տարածված են ինչպես լնդերի, այնպես էլ սրտի հիվանդությունները: Մեկ այլ վարկածն այն է, որ բերանի խոռոչի բակտերիաները կարող են շարժվել դեպի սիրտ և առաջացնել բորբոքում՝ աթերոսկլերոզի ռիսկի գործոն: Մեկ այլ ուսումնասիրություն էլ ցույց է տվել, որ լնդերի հիվանդության բուժումը նվազեցնում է արյան մեջ բորբոքային մարկերների մակարդակը և զգալիորեն բարելավում է զարկերակների աշխատանքը:

Հաստ աղիքի քաղցկեղը մեկ այլ հիվանդություն է, որը կապված է բերանի խոռոչի բակտերիաների հետ: Մանրէների մեծ մասը չի կարող գոյատևել ստամոքսի թթվային միջավայրում և, հետևաբար, բերանից չի անցնում աղիքներ: Սակայն 2014-ին երկու ուսումնասիրություններ հայտնաբերեցին  ատամնափառի Fusobacterium բակտերիաներ աղիքային ուռուցքներում: Սա հաստատվել է հետագա փորձերով, ինչպես նաև պարզվել է, որ այս մանրէների կողմից հաստ աղիքում գոյատևելը նվազեցնում է քաղցկեղի բուժման արդյունավետությունը: Դա կարող է նշանակել, որ Fusobacterium-ը մեծացնում է քաղցկեղի բջիջների ագրեսիվությունը։ Գիտնականները կարծում են, որ այս բակտերիաների դեմ պատվաստումը կարող է նվազեցնել աղիների քաղցկեղի առաջացման վտանգը կամ հեշտացնել այն սպանելը:

Որոշ ուսումնասիրություններ ցույց են տալիս, որ լնդերի հիվանդությունը կարող է հանգեցնել ավելի ծանր Ալցհեյմերի հիվանդության: Բայց քանի որ և՛ բերանի խոռոչի հիվանդությունները, և՛ թուլամտությունը կապված են ծերացման հետ, դժվար է որոշել, թե արդյոք կա պատճառահետևանքային կապ: Այնուամենայնիվ, 2019 թվականին գիտնականները պարզեցին, որ Ալցհեյմերի հիվանդությամբ տառապող մարդկանց ուղեղում առկա է P. gingivalis բակտերիա, որն առաջացնում է լնդերի հիվանդություն:

Ընդհանուր առմամբ, հետազոտությունները ցույց են տալիս, որ բերանի խոռոչի առողջության և ընդհանուր վիճակի բարելավման համար կարևոր է ատամները լվանալ օրը երկու անգամ և յուրաքանչյուր վեց ամիսը մեկ այցելել ատամնաբույժի՝ բերանի խոռոչի պրոֆեսիոնալ հիգիենայի համար: