Մարզուհին առանց իր իմացության է դոպինգ ընդունել. պնդում է Արտաշես Ներսիսյանը

Այսօր տեղեկություն էր տարածվել, որ ծանրամարտի Հայաստանի կանանց հավաքականի գլխավոր մարզիչ Արտաշես Ներսիսյանը և ծանրորդ Սոնա Պողոսյանի անձնական մարզիչ Արման Ղազարյանը, ով միևնույն ժամանակ  հավաքականի երկրորդ մարզիչն է, հեռացվել են զբաղեցրած պաշտոններից: Մինչ այդ SHANTNEWS-ը տեղեկացրել էր, որ ծանրամարտի միջազգային ֆեդերացիան (IWF) իր պաշտոնական կայքում տեղեկություն է տարածել, որ Եվրոպայի մինչև 20 տարեկանների չեմպիոն  Սոնա Պողոսյանի դոպինգ թեստերից մեկը դրական արդյունք է տվել:  Նախնական տեղեկություններով՝ մարզուհու արյան մեջ հայտնաբերվել էին պեպտիդ հորմոններ և նմանատիպ այլ նյութեր: Սոնա Պողոսյանը հակադոպինգային կանոնները խախտելու համար անժամկետ հեռացվել է բոլոր մրցումներից՝ մինչև ստուգման վերջնական արդյունքների պարզ կլինեն:

SHANTNEWS-ն այսօր զրուցել է Հայաստանի կանանց հավաքականի գլխավոր մարզչի պաշտոնից հեռացված Արտաշես Ներսիսյանի հետ: Մարզիչը նշել է, որ ինքն ընդհանրապես տեղյակ չի եղել, որ Սոնա Պողոսյանն արգելված նյութեր է օգտագործել: Ավելին՝ նա համոզված է եղել, որ հավաքականում ոչ մեկը նման քայլի չէր գնա, քանի որ ինքը անընդհատ պայքարել է արգելված դեղամիջոցների օգտագործման դեմ և մշտապես տեղեկացրել է մարզուհիներին դրա մարզական ու ոչ մարզական վտանգների մասին: 

«Յուրաքանչյուր ուսումնամարզական հավաքի և սկզբում, և վերջում բոլոր մարզուհիների հետ միասին և առանձին-առանձին աշխատանք եմ տարել, բացատրել, որ երբևէ չփորձեն անգամ մտածել դոպինգի մասին, էլ ուր մնաց՝ օգտագործեն:Ամեն անգամ արգելված նյութերի նորացված ցուցակները բազմացրել և բաժանել եմ աղջիկներին, որպեսզի նույնիսկ պատահական օգտագործումը բացառվեր: Կարծում էի՝ բոլորն անխտիր շատ լուրջ էին մոտենում այս խնդրին: Հասել էր նրան, որ նույնիսկ գլխացավի մի հասարակ դեղահաբ օգտագործելուց առաջ  մարզուհիները զանգում ու ճշտում էին ինձանից՝ կարելի՞ է, թե չի կարելի: Հավաքականը երբեք չի ունեցել և հիմա էլ չունի  արգելված նյութերով արդյունքների հասնելու կարիք: Անցած տարի Եվրոպայի առաջնությունից 23 տարբեր մեդալ ենք նվաճել, հավաքականն էլ այժմ վերելքի վրա է, նոր խոստումնաից անուններ են հայտնվել: Այս դեպքում որտե՞ղ է արգելված դեղեր օգտագործելու տրամաբանությունը»,- նշել է Արտաշես Ներսիսյանը: 

Հենց այդ պատճառով նշում է, որ Սոնայի հետ կապված դեպքից ոչ միայն զարմացած է, այլև շատ վրդովված: 

Նշենք, որ մարզուհիները հիմնականում պարապում են իրենց անձնական մարզիչների մոտ և գլխավոր մարզչի հետ հանդիպում են միայն հավաքների ժամանակ:  Այդ ամբողջ ժամանակահատվածում վերահսկողություն սահմանելն, ըստ  Արտաշես Ներսիսյանի, բարդ է, առավել ևս եթե մարզուհին ինքը չունենա բավարար կամքի ուժ և գիտակցում, որ արգելված նյութերը թվացյալ էֆեկտի փոխարեն կարող են տասնապատիկ մեծ խնդիրներ ստեղծել:

SHANTNEWS-ը զրուցել է  նաև Սոնայի անձնական մարզիչ և հավաքականի երկրորդ մարզիչ Արման Ղազարյանի հետ, ով անմիջապես շփվում է իր սանի հետ բոլոր մարզումների ժամանակ: Ղազարյանը նշել է, որ նույնպես շատ վրդովված է, մարզուհու արաքին բացատրություն չունի, բայց կարող է հստակ ասել, որ հավաքականի գլխավոր մարզիչը որևէ մեղք չունի տեղի ունեցածի մեջ: