Թեժ քննարկում մերկապարի, աստիճանաբար ու միանգամից մերկանալու շուրջ

ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովը այսօրվա նիստում դրական եզրակացություն է տվել  «Առեւտրի և ծառայությունների մասին» օրենքում փոփոխություն և լրացումներ կատարելու մասին նախագծին և այն ընդգրկել հերթական նիստերի օրակարգ: Նախագծով առաջարկվում է կանոնակարգել կարաոկեների, դիսկոտեկների, հեստապարային՟ այսինքն ստրիպտիզ ակումբների, բաղնիքների, շոգեբաղնիքների, սաունաների տեղակայման հարցը:

Նախաձեռնության համար, ինչպես տեղեկացրել է ՀՀ տնտեսական զարգացման և ներդրումների նախարարի տեղակալ Հովհաննես Ազիզյանը, հիմք են հանդիսացել հանրության կողմից ստացված բողոքներն ու մտահոգությունները: Այդ իսկ պատճառով առաջարկվում է արգելել վերոնշյալ օբյեկտների տեղակայումը բազմաբնակարան շենքերի բնակելի և ոչ բնակելի տարածքներում, կրթական և պատմամշակութային հաստատությունների, պետական և տեղական ինքնակառավարման մարմինների վարչական շենքերի, բժշկական հաստատությունների տարածքներում: Այս օբյեկտների տեղակայման հեռավորության սահմանումն առաջարկվում է վերապահել համայնքի ավագանուն: Նախատեսվում է, որ օբյեկտների տեղակայման հեռավորությունը չպետք է պակաս լինի առնվազն 50 մետրից: Դրանց տեղափոխման համար,կհատկացվի մեկ տարի:Ի դեպ նշենք, որ Երևանում նման 23 օբեկտ կա: 

Հանձնաժողովի անդամ Սերգեյ Բագրատյանին հետաքրքրել է, թե ինչու մերսման սրահները ընդգրկված չեն օրենքի նախագծի ցանկում: Փոխնախարար Հովհաննես Ազիզյանն էլ պարզաբանել է, որ նախարարությունում քննարկվել է նաև մերսման սրահների և հոսթելների հարցը ու որոշվել՝ դրանց անդրադառնալ հետագայում, փուլ առ փուլ:

Սերգեյ Բագրատյանը մերսման սրահները անվանեց «հասարակաց տներ», պնդելով, որ նրանց գործունեությունը օրենսդրորեն կարգավորելու խիստ կարիք կա: Բացի այդ Ծառուկյան խմբակցության պատգամավորին զարմացրել էր օրենքում տեղ գտած մերկապար հասկացության ձևակերպումը:

«Հեստապար, պարերով և կամ երաժշտությամբ ուղեկցվող բեմական ներկայացում, որի մասնակիցները ներկայացման ընթացքում աստիճանաբար մասամբ կամ լրիվ մերկանում են»-օրենքի տվյալ ձևակերպումը ընթերցելուց հետո պատգամավորը ձևակերպումն անվանել է անլուրջ և սարկազմով հարց է ուղղել,թե աստիճանաբար մերկանալը հեստապարն է, իսկ եթե միանգամից մերկացավ հեստապար չէ: 

 «Պետք է լինի մերկապար և վերջ, մանրամասներ պետք չէ : Օրենքում ասվում է, որ պետք է մերկապարը արգելվի, որին մենք կողմ ենք, բայց ձևակերպմանն ենք դեմ:նախագծում ասվում է աստիճանաբար՝ մասամբ, կամ լիվ մերկանալ , դա որն է: Աստիճանաբար որ մերկանում են լրիվ չեն մերկանում?»-նույն ոգով շարունակեց Սերգեյ բագրատյանը պահանջելով օրենքից հանել այդ ձևակերպումը: 

Փոխնախարարն էլ պարզաբանեց՝«Այդ ձևակերպումը միջազգային օրինակից է»:

Թեժ քննարկմանը միացավ նաև հանձնաժողովի նախագահ Վարդևան Գրիգորյանը:«Իսկ եթե մերկապարուհիները ընդհանրապես չհանվեն?»- Վարդևան Գրիգորյանի անսպասելի հարցադրումը դահլիճում ծիծաղի պոռթկում առաջացրեց:

Ու թեև գիշերային ակումբներից լսվող երաժշտության բարձր ձայնի հարցում էլ կառավարության ներկայացուցիչների ու Բագրատյանի տեսակետները չհամընկան, այդուհանդերձ նախագիծըքվեարկության արդյունքում դրական եզրակացություն ստացավ: