Երևանում բուռն եռուզեռ է․ պատրաստվում են Ֆրանկոֆոնիայի գագաթնաժողովին

Ֆրանկոֆոնիայի 17-րդ գագաթնաժողովն իր աշխատանքները Երևանում սկսում է հաշված ժամեր անց։ Ֆրանսախոս երկրների ղեկավարներն ու պատվիրակներն այստեղ քննարկելու են ոչ միայն մշակութային, այլև տնտեսական ու քաղաքական թեմաներ։ Մայրաքաղաքի կենտրոնական հրապարակում մինչև այս ժամն էլ աշխատանքային եռուզեռ է՝ համաժողովների շրջանակներում անցկացվող միջոցառումներին պատրաստվելու համար, իսկ տրանսպորտի համար սա ծանրաբեռնվածություն է, որի գագաթնակետը գագաթնաժողովի օրերն են լինելու։

Գիշերը Մարզահամերգային համալիրում անցկացվել է Ֆրանկոֆոնիայի գագաթնաժողովի ընդունման փորձը։ Մինչև իսկ բաշխվել են վարորդները, որոնք Հայաստան ժամանող երկրների ղեկավարներին հասցնելու են միջոցառման վայրեր։ Այսօր ցերեկն արդեն վերջին պատրաստություններ էին ընթանում մայրաքաղաքի հրապարակներում։

Տաղավարների ավանում վրանները պատրաստ էին, ներսի հարդարումը՝ ոչ։ Որոշ տեղերում դրանք պետք է հագեցվեին թանգարանային ցուցանմուշներով, այլ տեղերում՝ մինչև իսկ կենցաղային տեխնիկայով։ Ավանի տաղավարները կսկսեն անցորդներին ընդունել հենց վաղը, թեև պաշտոնական բացումը կլինի ավելի ուշ։

Վաղը ֆրանկոֆոնները կսկսեն իրենց աշխատանքները, որ կտևեն մեկ շաբաթ, ամեն օր, ամեն աշխատանքային ժամ։

• Հոկտեմբերի 7։ Կիրակի սկսվում են նախապատրաստական աշխատանքները
• Հոկտեմբերի 8-9։ Անցկացվում է մի քանի տասնյակ նախարարների համաժողով
• Հոկտեմբերի 9։ Երեքշաբթի պաշտոնապես բացվում է Ֆրանկոֆոնիայի ավանը
• Հոկտեմբերի 10-ին միջոցառումներ նախատեսված չեն
• Հոկտեմբերի 11։ Հինգշաբթի մեկնարկում է ֆրանկոֆոնիայի գագաթնաժողովը, իսկ երեկոյան Հանրապետության հրապարակում անցկացվում է Գալա համերգը
• Հոկտեմբերի 12-ին։ Գագաթնաժողովը փակում է աշխատանքները։

Հոկտեմբերի 11-12-ը Երևանում ամենածանրաբեռնված օրերը կլինեն։ Երևանում կլինեն Ֆրանսիայի նախագահը, Կանադայի վարչապետը, 20-ից ավելի երկրների ղեկավարներ։ Որպեսզի բարձրաստիճան հյուրերը չուշանան գագաթնաժողովի աշխատանքներից, այդ օրերը հայտարարվել են ոչ աշխատանքային՝ երթևեկությունը թեթևացնելու համար։

Հոկտեմբերի 10-ին՝ ժամը 22.00-ից, արգելվելու է տրանսպորտային միջոցների կայանումը

• Հանրապետության և Շահումյանի հրապարակներում,
• Վազգեն Սարգսյան փողոցում,
• Աբովյան փողոցում՝ Աբովյան-Թումանյան փողոցների խաչմերուկից մինչև Հանրապետության հրապարակ,
• Նալբանդյան փողոցում՝ Սախարովի հրապարակից դեպի Հանրապետության հրապարակ,
• Տիգրան Մեծի պողոտայում՝ Տիգրան Մեծի պողոտա-Հանրապետության փողոց խաչմերուկից դեպի Հանրապետության հրապարակ,
• Ամիրյան փողոցում՝ Ամիրյան փողոց-Մաշտոցի պողոտա խաչմերուկից դեպի Հանրապետության հրապարակ:

Հոկտեմբերի 11-ին՝ ժամը 8.30-ից մինչև ժամը 10.30-ն արգելվելու է երթևեկությունը

• Աճառյան փողոցից դեպի Կենտրոն՝ Մյասնիկյան-Հերացու-Կորյունի փողոցներում,
• Ազատության պողոտայում՝ Ազատության պողոտա-Բաբայան փողոց խաչմերուկից Սարալանջի, Տերյան, Կորյունի փողոցներում

Ամբողջությամբ երկկողմանի փակ են լինելու 

• Մաշտոցի պողոտան, Աթենքի փողոցը և Ծիծեռնակաբերդի խճուղին,
• Աբովյան փողոցը՝ Աբովյան-Թումանյան փողոցների խաչմերուկից դեպի Հանրապետության հրապարակ,
• Ամիրյան փողոցը՝ Ամիրյան-Մաշտոց խաչմերուկից դեպի Հանրապետության հրապարակ,
• Իտալիայի, Բեյրութի և Զաքիյան փողոցները,
• Խորենացու փողոցը՝ Ագաթանգեղոսի-Խորենացու փողոցների խաչմերուկից դեպի Մաշտոցի պողոտա-Խորենացի փողոց խաչմերուկ,
• Տիգրան Մեծի պողոտան՝ Տիգրան Մեծի-Խանջյան խաչմերուկից դեպի Հանրապետության հրապարակ,
• Հանրապետության փողոցը՝ Հանրապետության-Վարդանանց խաչմերուկից դեպի Տիգրան Մեծի պողոտա,
• Նալբանդյան փողոցը՝ Սախարովի հրապարակից դեպի Հանրապետության հրապարակ,
• Արամի փողովը՝ Արամի-Խանջյան խաչմերուկից դեպի Նալբանդյան փողոց,
• Վազգեն Սարգսյան փողոցը՝ Շահումյանի հրապարակից դեպի Հանրապետության հրապարակ:

Ֆրանկոֆոնիայի գագաթնաժողովի բոլոր օրերին Ոստիկանությունում կգործի օպերատիվ շտաբ, որը կղեկավարվի փոխոստիկանապետի մակարդակով ու կուսումնասիրի օտարերկրացիների նկատմամբ կամ նրանց մասնակցությամբ իրավախախտումները և արագ կարձագանքի դրանց։