19:37 10.10.2018
Այսօր ՀՀ տարածքային կառավարման և զարգացման նախարար Սուրեն Պապիկյանը Վանաձորի Էդ. Կզարթմյանի անվան երաժշտական դպրոցի դահլիճում Լոռու մարզպետարանի աշխատակիցներին, հանրապետական գործադիր մարմինների տարածքային կառույցների ներկայացուցիչներին, համայնքների ղեկավարներին ներկայացրել է նորանշանակ մարզպետ Անդրեյ Ղուկասյանին, տեղեկացնում են մարզպետարանի լրատվական ծառայությունից:
Նախարարը, շնորհավորելով մարզպետին պատասխանատու պաշտոն ստանձնելու կապակցությամբ, իր խոսքում մասնավորապես նշել է.
«Նախ շնորհակալություն եմ հայտնում Լոռու նախկին մարզպետ Հրանտ Մարգարյանին, աշխատակազմին, մարզի բոլոր համայնքապետերին, ովքեր, այս ընթացքում համագործակցելով մարզպետի հետ, կարողացել են մարզում ապահովել կայունություն: Այժմ հետհեղափոխական Հայաստանը թևակոխում է մի նոր՝ շատ կարևոր փուլ: Թե՛ տեղական ինքնակառավարման, թե՛ տարածքային կառավարման մարմինները, գործադիր իշխանությունը պետք է ամեն ինչ անեն վերջին 25 տարիների ընթացքում նմանը չունեցող ընտրություններ կազմակերպելու համար: Մենք մեզ երբեք թույլ չենք տա քայլեր, որոնք դուրս են մեր իրավասության սահմաններից:
Առաջիկա ընտրությունները փորձաքար են լինելու Նոր Հայաստանի համար, քանի որ խարխլված վստահությունը վերականգնելու խնդիր ունենք: Մեզ համար այս կարևոր փուլը պետք է հաղթահարենք պատվով՝ ի բարօրություն մեր պետականության: Մեկ անգամ ևս շնորհավորելով պարոն Ղուկասյանին՝ ուզում եմ մաղթել բեղուն գործունեություն և ասել, որ Լոռին՝ այս կարևոր մարզը, որը պատվից զատ նաև ծանր բեռ է, մենք դնում ենք նրա ուսերին: Միևնույն ժամանակ ակնկալում ենք տեղական ինքնակառավարման մարմինների ղեկավարների սերտ համագործակցությունը տարածքային կառավարման մարմնի հետ: Եվս մեկ անգամ հորդորում եմ. օր առաջ սեր խաղաղություն ու անդորր հաստատեք մեր համայնքներում»:
Նորանշանակ մարզպետը, իր հերթին շնորհակալություն հայտնելով ՀՀ վարչապետ Նիկոլ Փաշինյանին և կառավարությանը Լոռու մարզպետի պատասխանատու պաշտոնն իրեն վստահելու համար, իր խոսքում մասնավորապես նշել է.
«Այն ես համարում եմ ոչ թե սոսկ պաշտոն, այլ առաքելություն, որը ծառայեցնելու եմ ի նպաստ մեր մարզի զարգացման: Այս մտայնությամբ եմ ես ընդունել իմ՝ Լոռու մարզպետի պաշտոնում նշանակվելու առաջարկը և այս մտայնությամբ եմ առաջնորդվելու պաշտոնավարմանս ողջ ընթացքում: Ծառայելու, որովհետև վերջին վեց ամիսներին ու այսուհետ ժողովուրդն է իրական իշխանությունը, իրական ընտրողը և ժողովրդի կամքն անբեկանելի է ցանկացած իրավիճակում:
Հենց այս՝ իրական իշխանության կարծիքը պետք է գերակա համարենք մեր բոլոր որոշումները կայացնելիս: Սա է լինելու թե՛ մարզպետարանի, թե՛ մարզի համայնքների, թե՛ մարզային ու համայնքային ենթակայության բոլոր կառույցների ղեկավարների և աշխատակիցների մոտեցումը աշխատանքին»,- ասաց Ա. Ղուկասյանը՝ վստահեցնելով, որ լոռեցին շատ կարճ ժամանակում կզգա դրական փոփոխություններ նախ վերաբերմունքի, մոտեցումների, ապա և գործուն քայլերի տեսքով:
Այս հարցում լինելու եմ չափազանց պահանջկոտ՝ ինքս իմ, ապա և բոլորիդ նկատմամբ: Իմ երազանքն է տեսնել Լոռին զարգացած, լոռեցուն՝ հպարտ ու բարեկեցիկ: Այս նպատակին հասնելու համար չեմ խնայելու ջանք, եռանդ՝ ոչինչ: Մարզի ցանկացած կառույցում յուրաքանչյուր խախտում, վրիպում, բողոք, կոռուպցիոն ցանկացած դրսևորում համարելու եմ նախ և առաջ իմ բացթողումը և ձեռնարկելու եմ անհրաժեշտ բոլոր միջոցները դրանք վերացնելու, ինչպես նաև այդ շղթաներում ներգրավված անձանց օրենքի ուժով պատասխանատվության ենթարկելու համար: Պետք է ամեն ինչ անենք մարզպետարանում, համայնքապետարաններում, մարզային ու համայնքային ենթակայության բոլոր կառույցներում կոռուպցիոն ամենատարբեր դրսևորումները բացառելու համար»:
Նա նաև նշել է, որ իր ուշադրության կենտրոնում են լինելու թափուր աշխատատեղերի մրցույթները, մարզային կառույցների, համայնքապետարանների և համայնքային ենթակայության հիմնարկների ֆինանսական բոլոր հոսքերը:
«Մարիզ տարածքում և մարզպետարանում գործելու է կադրային քաղաքականության մեկ մեխանիզմ. գիտելիքի, կրթական ցենզի, փորձառության ու աշխատանքի որակի մեխանիզմը: Բացառվելու է ծանոթ-խնամի-բարեկամով, անձնական կապերի հաշվին կամ մտերմությամբ տարաբնույթ հարցերի կարգավորման ու աշխատանքի տեղավորման տարբերակը: Մեր աշխատանքում հաջողելու համար պետք է առանցքային փոփոխությունների ենթարկվի նաև մարզպետարանի աշխատաոճը:
Հեղափոխություն արած լոռեցին մեծ սպասելիքներ ունի, և մենք պետք է արդարացնենք նրա բոլոր հույսերը»:
Հանդիպման ավարտին նախարարի, մարզպետի և ուժային կառույցների ղեկավարների մասնակցությամբ խորհրդակցություն անցկացվեց Լոռու մարզպետարանում:
23:00 26.06.2025
Իրանը հավանություն է տվել ԱԷՄԳ-ի հետ համագործակցությունը դադարեցնելու մասին օրինագծինԻրանի և Ատոմային էներգիայի միջազգային գործակալության (ԱԷՄԳ) միջև համագործակցությունը կասեցնելու առաջարկով օրինագիծը հաստատվել է Իսլամական Հանրապետության Սահմանադրության Պահապան խորհրդի կողմից, հայտարարել է Իրանի վերահսկիչ մարմնի ներկայացուցիչ Հադի Թահան Նազիֆը: «Պլանը, որը պահանջում է կառավարությանը դադարեցնել համագործակցությունը ԱԷՄԳ-ի հետ, հաստատվել է Պահապանների խորհրդի անդամների միջև խորհրդակցություններից հետո», – նրա խոսքերն է մեջբերում «Երիտասարդ լրագրողների ակումբ» գործակալությունը։ ...
22:45 26.06.2025
Հունիսի 27-ին կդադարեցվի Արաբկիր վարչական շրջանի որոշ հասցեների գազամատակարարումըՊլանային աշխատանքներ իրականացնելու նպատակով՝ հունիսի 27-ին ժամը 10:00-ից մինչև ժամը 17:00-ն, կդադարեցվի Երևան քաղաքի Արաբկիր վարչական շրջանի Շիրվանզադեի փողոցի թիվ 15/32, 17 բազմաբնակարան շենքերի գազասպառողների և հարակից տարբեր նշանակության հանրային կազմակերպությունների գազամատակարարումը։ ...
22:31 26.06.2025
Հայաստանի 6 ներկայացուցիչ հաղթանակով է մեկնարկել․ Իրակլի Աբաշիձեի անվան մրցաշարՎրաստանի Բաթումի քաղաքում ընթացող Իրակլի Աբաշիձեի անվան միջազգային մրցաշարի մրցումային առաջին օրը բռնցքամարտի Հայաստանի 6 ներկայացուցիչ մեկնարկել է հաղթանակով։ Իրենց մրցակիցներին հաղթել են Բարեղամ Հարությունյանը (50 կգ), Դավիթ Եգորյանը (55 կգ), Ժիրայր Սարգսյանը (60 կգ), Արթուր Շախպազյանը (65 կգ), Արարատ Հարությունյանը (70 կգ) և Ռաֆայել Հովհաննիսյանը (85 կգ)։ Հայաստանի ներկայացուցիչներից ռինգ են դուրս եկել նաև […] ...
22:15 26.06.2025
Ջրափրկարարները ափ են դուրս բերել քաղաքացիներին և թիանավակըՀունիսի 26-ին, ժամը 17:14-ին Գեղարքունիքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Շորժա գյուղի մոտակա լողափում երկու քաղաքացի թիանավակով հեռացել են ափից և չեն կարողանում վերադառնալ ափ․ անհրաժեշտ է փրկարարների օգնությունը։ Դեպքի վայր է մեկնել ՆԳՆ ՓԾ մարզային փրկարարական վարչության հատուկ ջրափրկարարական ջոկատի խումբը: Ջրափրկարարները մոտ 3,5 կմ հեռավորությունից ափ են դուրս […] ...
21:57 26.06.2025
Հունիսի 27-ին Երևանի և մարզերի մի շարք հասցեներում հոսանք չի լինի«Հայաստանի էլեկտրական ցանցեր» փակ բաժնետիրական ընկերությունը տեղեկացնում է, որ հունիսի 27-ին պլանային նորոգման աշխատանքներ իրականացնելու նպատակով ժամանակավորապես կդադարեցվի հետևյալ հասցեների էլեկտրամատակարարումը` Երևանի Կենտրոն վարչական շրջան՝ 11։00-17։00 Բուզանդի փ. 1 շենք, Ֆիրդուսի փ. 52-80 առանձնատներ, Չայկովսկու փ. 15, 30, 34 առանձնատներ և հարակից ոչ բնակիչ-բաժանորդներ, Ալեքսանդր Սպենդիարյանի անվան երաժշտական մասնագիտական դպրոց, Առևտրաարդյունաբերական պալատ, «Լամաքս Գրուպ» ՍՊԸ, […] ...
