Սարալանջի փողոցում տեղի ունեցած ավտովթարի դեպքի առիթով մեղադրանք է առաջադրվել Երևան քաղաքի 29-ամյա բնակչի:
Ավելի վաղ տեղեկացրել էինք, որ ապրիլի լույս 24-ի գիշերը Սարալանջի փողոցում «Օպել» մակնիշի ավտոմեքենան բախվել էր «Մերսեդես-Բենց» մակնիշի ավտոմեքենային, որը դուրս էր եկել ճանապարհի երթևեկելի գոտուց և, աջ ընթանալով, բախվել բետոնե արգելապատնեշին։ Վարորդը, նրա ուղևորները, որոնք ամուսիններ են, և նրանց 1-ամյա որդին տարբեր աստիճանի մարմնական վնասվածքներով տեղափոխվել են համալսարանական թիվ 1 հիվանդանոց, որտեղից էլ փոքրիկը տեղափոխվել է «Սուրբ Աստվածամայր» բժշկական կենտրոն։ Ապրիլի 26-ին 1-ամյա Յուրին հիվանդանոցում մահացել է։
Ձեռք բերված ապացույցների համակցությամբ՝ «Օպել» մակնիշի ավտոմեքենայի վարորդին մեղադրանք է առաջադրվել: Նրա նկատմամբ խափանման միջոց է ընտրվել կալանավորումը:
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
