Ռուսաստանի ԱԳ նախարարության տեղեկատվության և մամուլի բաժինն անդրադարձել է Երևան այցի ժամանակ ԱՄՆ նախագահի ազգային անվտանգության հարցերով խորհրդական Ջոն Բոլթոնի հայտարարություններին՝ նրա բառերը համեմատելով Երևանում ԱՄՆ դեսպան Ռիչարդ Միլսի՝ ավելի վաղ արված հայտարարության հետ: Միլսն իր խոսքում նշել էր, որ Վաշինգտոնը շարունակում է նպատակաուղղված կերպով աջակցություն ցույց տալ Հայաստանում որոշակի խմբերի, բացի այդ, խոստացել էր Հայաստանին 26 մլն դոլար տրամադրել «քաղաքացիական հասարակության և ԶԼՄ-ների ամրապնդման համար»:
«Վերջերս Ռուսաստանի ԱԳՆ պաշտոնական ներկայացուցիչը ճեպազրույցի ժամանակ մեկնաբանել է ՀՀ–ում ԱՄՆ դեսպան Ռիչարդ Միլսի «հրաժեշտի» խոսքը։ Նա հրապարակայնորեն հրահանգներ էր տալիս երկրի ղեկավարությանը տնտեսական քաղաքականության հարցերում և տեղի հասարակական կազմակերպություններին շռայլ ֆինանսավորում խոստանում կառավարության նկատմամբ հսկողության համար»,- նշված է հայտարարության մեջ:
«Թվում էր, թե երկրի ներքին գործերին ուղղակի միջամտությունից չտարբերվող ավելի մեծ հանդգնություն չկա: Պարզվեց՝ այդպես չէ»,- ընդգծել են ՌԴ ԱԳՆ-ում:
«Օրերս Երևան այցելած ԱՄՆ նախագահի անվտանգության հարցերով խորհրդական Ջոն Բոլթոնը հրապարակավ պահանջել է, որ Հայաստանը միջազգային հարաբերություններում հրաժարվի «պատմական կլիշեներից»՝ չթաքցնելով, որ խոսքը Ռուսաստանի հետ ավանդական շփման մասին է: Նա նաև հայտարարել է, որ սպասելու է Նիկոլ Փաշինյանից Արցախի խնդրի կարգավորման հարցով նախաձեռնողական քայլեր արտահերթ խորհրդարանական ընտրություններից հետո: Դրանից բացի՝ նա չի մոռացել գովազդել ամերիկյան զենքը, որը Հայաստանին խորհուրդ է տվել ձեռք բերել ռուսականի փոխարեն:
Ջոն Բոլթոնի յուրաքանչյուր խոսք չէ, որ քննադատության է արժանի: «Ազատություն» ռադիոկայանին տված հարցազրույցի ընթացքում Բոլթոնն ասել է, որ Հայաստանի համար շատ կարևոր է անկախ և ոչ ոքից կախում չունեցող երկիր դառնալը, որը չի ենթարկվի արտաքին ազդեցությունների: Լավ կլինի Բոլթոնն ինքն իր ասած խոսքերի շուրջ մտածի»,- ասված է հաղորդագրության մեջ:
