«Նոր Հայաստան, նոր հայրապետ» նախաձեռնության անդամները փորձել են մուտք գործել Էջմիածնի դիվանատան տարածք

Մայր Աթոռից ահազանգել են, որ «Նոր Հայաստան, նոր հայրապետ» նախաձեռնության անդամներն այսօր կեսօրին փորձել են Մայր Աթոռ Սբ. Էջմիածնի դիվանատան տարածք ներխուժել։ Նախաձեռնության անդամ Կարեն Պետրոսյանը SHANTNEWS.am-ի հետ զրույցում, ներկայացնելով կատարվածը, նշեց.

«Մեր շարժման որոշ անդամներ, իմանալով, որ այսօր Գերագույն հոգևոր խորհրդի նիստ է, գնացել և հիշեցրել են խորհրդի անդամներին, որ այս կաթողիկոսը հայ ազգի հետ անհամատեղելի է, որովհետև չի ներկայացնում հայ ժողովրդի հոգևոր զգացումները, հոգևոր կյանքը, այդքան մի բան:

Որևէ ներխուժում, այլ բան չի եղել, ընդամենը եղել է հիշեցում, և եթե Մայր Աթոռը տարածել է, որ սա ներխուժում է, կարծում եմ, դա ուղիղ քաղաքականացում է Հայաստանում տեղի ունեցող այդ իրադարձությունների ֆոնին: Անվտանգության պահպանության օրենքի փոփոխությունը տեղի չունեցավ, փաստորեն սա ջղաձգում է երևի, որ իրենք թյուր ինֆորմացիա են տարածում: Ընդամենը Գերագույն հոգևոր խորհրդին հիշեցրել ենք այս կաթողիկոսի` հայ ժողովրդի հետ անհամատեղելիության հարցը»:

Հետաքրքրվեցինք` նախաձեռնությունը վերսկսելո՞ւ է Ամենայն հայոց կաթողիկոսի հրաժարականի պահանջով անցկացվող բողոքի ակցիաները, ինչին Պետրոսյանը պատասխանեց, որ դրանք չեն էլ դադարել:

«Մեր շարժման հիմնական ռազմավարությունն այն է, որ միշտ հրապարակային հիշեցնեն` հայ ժողովուրդն իրեն չի ընդունում, նա և՛ իրավական խնդիրներ ունի, որ հանձնված են պետության լուծելուն, և՛ հոգևոր անհամատեղելիության, որ հանձնված է եպիսկոպոսների լուծելուն: Մեր հիմնական առաքելությունն է եպիսկոպոսներին ներկայացնել իր հոգևոր անհամատեղելիությունը, իշխանություններին՝ իր օրինական անհամատեղելիությունը, ժողովուրդն իրեն արդեն բոյկոտել է»,- ասաց նա:

Հարցին` Մայր աթոռից երկխոսելու փորձեր արվե՞լ են, Պետրոսյանը պատասխանեց, որ նման փորձ չի արվել:

«Հայ ազգը ունի նվիրյալ հոգևորականներ և՛ Հայաստանում, և՛ Սփյուռքում: Կարծում ենք, որ հայ ժողովուրդն արժանի է ունենալ նվիրյալ հոգևոր առաջնորդ: Փնտրենք ավելի ճիշտ Սփյուռքում երևի, վերջին հաշվով, ունենք մեկ եկեղեցի, երկու կաթողիկոս»,- նշեց նախաձեռնության անդամը:

ՀՀ ոստիկանության հասարակայնության հետ կապերի և լրատվության վարչությունից հայտնեցին, որ «Նոր Հայաստան, նոր հայրապետ» նախաձեռնության անդամներն այսօր կեսօրին փորձել են մուտք գործել Մայր Աթոռ Սբ. Էջմիածնի դիվանատան տարածք, սակայն տեղում ծառայություն իրականացնող ոստիկանները թույլ չեն տվել նախաձեռնության անդամներին մուտք գործել դիվանատան տարածք։