Տրանսպորտային միջոցների թույլատրելի առավելագույն զանգվածը որոշելու լիազորությունը տրվում է կառավարությանը

ՀՀ կառավարությունը նոյեմբերի 1-ի նիստում հավանություն տվեց ««Ավտոմոբիլային ճանապարհների մասին» ՀՀ օրենքում փոփոխություններ և լրացումներ կատարելու մասին», ««Պետական տուրքի մասին» ՀՀ օրենքում փոփոխություն կատարելու մասին» և ««Վարչական իրավախախտումների վերաբերյալ ՀՀ օրենսգրքում փոփոխություններ և լրացում կատարելու մասին» ՀՀ օրենքների նախագծերին:

ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանի ներկայացմամբ` այս նախագծերով նախատեսվում է պարզեցնել վարչարարությունը և օրենքով նախատեսվող երկու թույլտվությունների համար նախատեսել մեկ թույլտվություն: Միաժամանակ, թույլտվության տրամադրման կարգը, տրանսպորտային միջոցների թույլատրելի առավելագույն զանգվածը և (կամ) մեկ սռնու վրա ընկնող բեռնվածքը, ինչպես նաև մեծ եզրաչափերի առավելագույն չափերը որոշելու լիազորությունը վերապահվում է ՀՀ կառավարությանը:

Գործող օրենքով արգելվում է ընդհանուր օգտագործման ավտոմոբիլային ճանապարհներով ծանրաքաշ տրանսպորտային միջոցների երթևեկությունը ՀՀ տարածքում, որոնց առավելագույն ընդհանուր զանգվածը գերազանցում է 44 տոննան, իսկ տրանսպորտային միջոցի մեկ սռնու վրա ընկնող բեռնվածքը՝ 11.5 տոննան կշռային ցուցանիշները չգերազանցող ծանրաքաշ և (կամ) մեծ եզրաչափերով տրանսպորտային միջոցների երթևեկությունն առանց ճանապարհը տնօրինողի թույլտվության:

Հայաստանի Հանրապետության ավտոմոբիլային ճանապարհներ ՀՀՇՆIV-11.05.02-99 շինարարական նորմերի 5.2 կետի համաձայն՝ միջպետական նշանակության ավտոմոբիլային ճանապարհների պատվածքի հաշվարկի համար ավտոմոբիլի միակ առանցքի բեռնվածքը պետք է ընդունել 11.5 տոննա, մնացած ճանապարհների համար՝ 10 տոննա: Նկատի ունենալով նշվածը` նախագծով առաջարկվում է արգելել թույլատրելի առավելագույն զանգվածը և (կամ) մեկ սռնու վրա ընկնող բեռնվածքը գերազանցող ծանրաքաշ տրանսպորտային միջոցների երթևեկությունը, քանի որ երթևեկության դեպքում վնաս է հասցվում ճանապարհային պաստառին:

Արգելքը չի տարածվում կշռային ցուցանիշները գերազանցող ծանրաքաշ չմասնատվող բեռների վրա և նախագծով նախատեսվում է ընդհանուր օգտագործման ավտոմոբիլային ճանապարհներով չմասնատվող բեռներ փոխադրող տրանսպորտային միջոցների երթևեկության երթուղու համար տրամադրել մեկանգամյա թույլտվություն և սահմանել պետական տուրք, քանի որ փոխադրվող բեռն առանց վնասելու հնարավոր չէ բաժանել երկու կամ ավելի մասերի:

Նախագծով նախատեսվում է թույլտվության տրամադրման կարգի, տրանսպորտային միջոցների թույլատրելի առավելագույն զանգվածի և (կամ) մեկ սռնու վրա ընկնող բեռնվածքի, ինչպես նաև մեծ եզրաչափերի առավելագույն չափերի սահմանման լիազորությունը վերապահել ՀՀ կառավարությանը:

«Վարչական իրավախախտումների վերաբերյալ ՀՀ օրենսգրքում փոփոխություններ և լրացում կատարելու մասին» ՀՀ օրենքի նախագծով վերանայվել է վարչական պատասխանատվության չափերը և նախատեսվել է նոր վարչական պատասխանատվություն թույլտվությամբ տրամադրված երթուղուց շեղման և մեկ տարվա ընթացքում կրկին կատարելու դեպքերում:

««Պետական տուրքի մասին» ՀՀ օրենքում փոփոխություն կատարելու մասին» ՀՀ օրենքի նախագծով օրենքից հանվել է հատուկ թույլտվություն հասկացությունը, քանի որ նախատեսվող փոփոխություններով պետք է տրամադրվի միայն թույլտվություն: