Փաշինյանը հետաքրքրվեց` ի՞նչ նշում է արվելու Ապրիլյան պատերազմի մասնակից տղաների զինգրքույկներում

ՀՀ վարչապետի պաշտոնակատար Նիկոլ Փաշինյանը կառավարության նոյեմբերի 22-ի նիստի ժամանակ ՀՀ պաշտպանության փոխնախարարի պաշտոնակատար Գաբրիել Բալայանին հիշեցրեց` Ապրիլյան քառօրյա պատերազմի մասնակից տղաները պահանջում էին, որ զինգրքույկներում նշում արվի պատերազմին իրենց մասնակցության մասին: Կառավարության ղեկավարն ու տղաներն ընդհանուր հայտարարի էին եկել, որ այս հարցը լուծում կստանա:

Փաշինյանը Բալայանից հետաքրքրվեց` որոշումը, որ կայացվել է, հենց ա՞յն է, որի մասին խոսում են, արդյո՞ք հենց այն նշումն են անելու զինգրքույկում, ինչ ակնկալում են տղաները:

«Ի՞նչ նշում ենք անելու»,- հետաքրքրվեց նա:

Բալայանը նախապատմությունը ներկայացրեց, նշեց, որ ժամանակին այդ հարցով վարչապետի խորհրդական Նիկոլայ Բաղդասարյանն է զբաղվել, նրան և ցուցարարներին հրավիրել են պաշտպանության նախարարություն, ներկայացրել են այն հնարավորությունները, որ գոյություն ունեն: Այդ ժամանակ կառավարությունը նախագիծ էր դրել շրջանառության մեջ, որով սահմանվում էր զինգրքույկի ձևը, լրացման կարգը և այլն:

«Գործող զինգրքույկի ձևի մեջ կա մի այսպիսի բաժին, գրված է` «մարտական գործողություններին մասնակցելը ինքնապաշտպանական ուժերի կազմում», այդ ուժերը գործում էին մինչև կանոնավոր բանակ ստեղծվելը, որոշ զինկոմներ այդտեղ կնիքներ դրել էին, հետո` անցյալ տարի այդ կնիքները ջնջում էին, ակցիաներ եղան: Հիմա կարգ է սահմանվել, ՊՆ-ին վերապահվել է իրավասություն՝  կարգը լրացնելու և ձևը սահմանելու: Ենթադրում եմ, որ մինչև հաջորդող ամսվա 5-ը կարգը կսահմանվի, լրացումները կարվեն»,- ասաց նա:

Բալայանը հայտնեց, որ «մարտական գործողությունների մասնակից» կարգավիճակը ներկայում կա, 25 տարի իրավակիրառ պրակտիկան եղել է հետևյալը՝ այդ կարգավիճակը շնորհվել է առնվազն 3 ամիս մարտական գործողություններին մասնակիցներին, և այդ երեք ամսվա սահմանափակումը մարտական կանոնադրությամբ է սահմանված: Բալայանի խոսքերով` եղել են դեպքեր, երբ 2 ամիս, 2 ամիս 20 օր մասնակցածներին չի շնորհվել այդ կարգավիճակը: 2015թ. ընդունվել է «Երկրապահ կամավորականի կարգավիճակի մասին» օրենքը, որը, Բալայանի խոսքերով, ըստ էության կրկնում էր «Զինծառայողների և նրանց ընտանիքի անդամների սոցիալական ապահովման մասին» օրենքը, ստեղծված այս կարգավիճակը, որը նախորդին համապատասխանում է, ներկայում այդ կարգավորումը չկա:

Փաշինյանը հետաքրքրվեց` ի՞նչ է գրվելու այս տղաների զինգրքույկում` մարտերին մասնակցությո՞ւն, մարտական հերթապահությո՞ւն: Նրան զեկուցեցին, որ տղաների հետ զրուցել են, զուտ բարոյական խնդիր է լուծվում, պայմանավորվել են, որ «ապրիլ» բառի փոխարեն նշելու են հերթապահության ժամանակահատվածը:

«Իսկ ճիշտ չէ՞ բոլորինը նշել, թե ով քանի օր է հերթապահել: Հիմա մենք էլ ենք հերթապահել, մենք այդ պատերազմի մասնակի՞ց ենք, թե՞ չէ: Մենք, այո՛, մարտական հերթապահություն իրականացրել ենք, մարտական հերթապահության մեջ ենք եղել, մեզ նույնիսկ նախատեսված ժամկետից շուտ զորացրել են»,- ասաց նա:

Բալայանը հայտնեց, որ նոր զինգրքույկներում հստակ սահմանված է ձևը, հին գրքույկներում կա «հատուկ նշումներ» բաժին, այնտեղ կփորձեն գրել, որ այսինչ օրից այսինչ օրը զինծառայողը եղել է մարտական հերթապահության և մասնակցել է մարտերին, համապատասխան զորամասերից էլ տեղեկանքները կհավաքեն, սակայն մեծամասնությունը կա:

Վարչապետի պաշտոնակատարը շեշտեց` պետք է փոխադարձ ըմբռնում լինի, պետք է նաև այնպես անել, որ հայրենիքին ծառայած զինվորներն այդ` իրենց համար կարևոր տեղեկությունը լինի գրքույկների մեջ:

«Ըստ էության, քանի Ղարաբաղի կոնֆլիկտը լուծված չէ, ո՛չ պատերազմ, ո՛չ խաղաղություն վիճակ է, այս ընթացքում մենք բոլորին համարո՞ւմ ենք պատերազմի մասնակից, այս ընթացքում եղել են դիվերսիաներ մեր դիրքերի նկատմամբ, դիրքերում եղել են մարտական գործողություններ, դիվերսիաներ հետ մղածների զինգրքույկներում ինչ-որ բան գրո՞ւմ ենք»,- ասաց Փաշինյանը՝ նշելով, որ այս հարցերին ևս պատասխան տրված չէ: