Ժամեր անց հայտնի կդառնա Վրաստանի նոր նախագահի անունը

Վրաստանում այսօր անցկացվում է նախագահական ընտրությունների երկրորդ փուլը: Վրաստանի ԿԸՀ-ի տեղեկություններով՝ ժամը 17:00-ի դրությամբ քվեարկել է ընտրողների 47.31 տոկոսը կամ 1 363 493 ընտրող:

Քվեարկությունն անցնում է բավական լարված մթնոլորտում: Ընտրակեղծիքների մասին ահազանգում են թե՛ իշխանությունների, թե՛ ընդդիմության ներկայացուցիչները: Միացյալ ընդդիմության վստահված անձինք ընտրատեղամասերի մոտ արձանագրել են խմբված մարդկանց, որոնք փորձում են վերահսկել ընտրողներին, երբեմն նաև կաշառք առաջարկել: Ընտրատեղամասերում արձանագրվել են դիտորդներին խոչընդոտելու, ընտրաթերթիկներ դուրս բերելու դեպքեր, կրկնաքվեարկության փորձեր:

«Ռուսթավի-2» ՀԸ-ի օպերատորները Մառնեուլի քաղաքում՝ ընտրատեղամասերից ոչ հեռու, ֆիքսել էին մարտական մեքենաներ, պարեկային ոստիկանական մեքենաներ: Իշխանությունների մեկնաբանությամբ՝ նմանատիպ շարժական խմբեր են տեղակայված նաև այլ վայրերում՝ հնարավոր լարումները կանխելու համար:

Կեսօրին իրենց քաղաքացիական պարտքն են կատարել Վրաստանի նախագահ Գեորգի Մարգվելաշվիլին, իշխող «Վրացական երազանք» կուսակցության առաջնորդ Բիձինա Իվանիշվիլին, վարչապետ Մամուկա Բախտաձեն, խորհրդարանի խոսնակ Կախա Կալաձեն և այլ պաշտոնատար այրեր:

«Դուք հիշում եք այն տարիները, երբ կար մի ուժ, որն այսօր «Վրացական երազանք»-ի աջակցությամբ անկախ թեկնածուի հակառակորդն է»,- հայտարարել է «Վրացական երազանք» կուսակցության նախագահ Բիձինա Իվանիշվիլին:

«Իմ ընտրությունը հանգիստ, խաղաղ Վրաստանն է, իմ ընտրությունը միացյալ Վրաստանն է, իմ ընտրությունը հանգիստ Վրաստանն է»,- հայտարարել է Վրաստանի նախագահի կին թեկնածու Սալոմե Զուրաբիշվիլին ընտրատեղամասում քվեարկություն կատարելուց հետո:

д

«Հուսով եմ՝ մեր քաղաքացիները, որ 1990 թվականից ի վեր այս երկրում իրենց ատամներով պաշտպանել են ժողովրդավարությունը, մարդիկ, որոնք ամեն ինչ անում են պետականությունը պահպանելու համար, ամեն ինչ անում են, որպեսզի մեր երկրում պետությունը հիմնված լինի երեք սյուների՝ հավասարության, արդարության, զարգացման վրա, բոլոր այդ մարդիկ կգան քվեարկության և ճիշտ ընտրություն կկատարեն»,- ասել է նախագահի թեկնածու Գրիգոլ Վաշաձեն:

Վրաստանի նախագահական ընտրություններին արտերկրից «Սկայպ»-ի միջոցով արձագանքել է նաև նախկին նախագահ Միխեիլ Սաակաշվիլին.

«Ցանկանում եմ երկու բառով խոսել ընտրությունների մասին: Կարծում եմ, որ Իվանիշվիլին և նրա ավազակախումբը փորձում են անել ամեն բան այդ դավաճան կնոջ հաղթանակի համար: Նրանք կազմակերպված ձևով հրավիրում են մարդկանց քվեարկության: Դե ինչ, մենք՝ բոլորս միասին, պետք է խաղաղ, հանգիստ գնանք ընտրությունների: Հիշե՛ք, որ ընտրություն կատարելիս մենակ եք և ոչ մեկին չպետք է լսեք»:

Ընտրությունների ընթացքի վերաբերյալ կեսօրին խոսել էին նաև միջազգային դիտորդները:

«Ես և իմ գործընկերները Վրաստանում հետևել ենք նախընտրական քարոզարշավին, իսկ Մառնեուլում՝ ընտրութույունների ընթացքին: Արձանագրել ենք խաղաղ, ազատ, առանց ընտրակեղծիքների ընտրություններ: Վրաստանի համար կարևոր է, որ ընտրություններից հետո ժողովուրդը միավորվի ազգային գաղափարի շուրջ»,- ասել  է Մեծ Բրիտանիայից միջազգային դիտորդ Ջասթին Մաքինթոշը:

Ընտրությունները գնահատել են նաև վրացի վերլուծաբանները: Քաղաքագետ Նիկա Չիտաձեի գնահատմամբ՝ Վրաստանի նախագահի երկրորդ փուլի ընտրությունները տեղի են ունենում խախտումներով:

«Ցավոք, ընտրությունների անցկացման գործընթացը բացասաբար եմ գնահատում, քանի որ արձանագրվում են տարբեր խախտումներ: Ցավոք, այս ընտրությունները չեն համապատասխանում ժողովրդավարական չափանիշներին»,- ասել է նա: