Թատրոնը միանձնյա չի կառավարվելու, ես այդպես եմ տեսնում. Սուրեն Շահվերդյան

Բեմադրիչ, ռեժիսոր Սուրեն Շահվերդյանն այսօր նշանակվել է Սոս Սարգսյանի անվան համազգային թատրոնի գեղարվեստական ղեկավար: SHANTNEWS.am-ի հետ զրույցում բեմադրիչը խոսել է ապագա ծրագրերի մասին:

– Ինչպե՞ս եք Դուք՝ իբրև թատրոնի նորանշանակ գեղարվեստական ղեկավար, պատկերացնում հետագա աշխատանքը:

– Շատ պարզ: Ե՛վ նպատակներ ունեմ, և՛ ծրագիր ունեմ, որը մոտ ապագայում կներկայացվի թատրոնի խմբին: Մի քանի շատ կարևոր քայլեր պիտի արվի, նախ` ես այսօր արդեն առաջարկել եմ պարոն Չալդրանյանին ստեղծել գեղարվեստական խորհուրդ, որպեսզի թատրոնը չկառավարվի միանձնյա: Ես առաջարկել եմ ստեղծել գեղարվեստական խորհուրդ ոչ թատրոնի ներսում աշխատող ստեղծագործական կազմից, այլ թատրոնից դուրս. կլինեն հայտնի թատերագետներ, թատրոնի, գրականության, երաժշտության ասպարեզից հայտնի մարդիկ, այդ գեղարվեստական խորհուրդը կընդունի թատրոնի ապագա գործունեության ծրագիրը, կհաստատի, և մենք կաշխատենք այդ ծրագրով: Նույն այդ գեղարվեստական խորհուրդը պահանջատերը կլինի այդ ծրագրի իրականացման և հետևողը, այսինքն` թատրոնը միանձնյա չի կառավարվելու, ես այդպես եմ տեսնում:

– Բարդ շրջանում եք ստանձնում այս պաշտոնը: Ի՞նչ եք պատրաստվում անել, հանդիպելո՞ւ եք դերասանների հետ:

– Այո՛, իհարկե հանդիպելու եմ: Ես պատրաստ եմ աշխատել բոլորի հետ, ովքեր կաշխատեն, կշարունակեն աշխատել թատրոնում: Նրանք, ովքեր չեն ցանկանա աշխատել, ես այսպիսի մի բան ասեմ. Երևանում և ընդհանրապես Հայաստանի Հանրապետությունում բազում տաղանդավոր դերասաններ կան, որոնք անընդհատ դիմում են այս կամ այն թատրոններ: Թատրոնները հաստիքներ չունեն, իսկ առողջ մթնոլորտը թատրոնում կարող է լինել այն ժամանակ, երբ թատրոնը անընդհատ նորացվի, այդ դեպքում թատրոնը տեղում չի դոփի, առաջ կգնա:

– Անսպասելի՞ էր այս նշանակումը Ձեզ համար, նախապես քննարկումներ եղե՞լ են:

– Անսպասելի չէր, մենք ապրում ենք այն ժամանակաշրջանում, այն ժամանակներում, որտեղ շատ բաներ փոխվում են, և հաշվի առնելով իմ վաստակը թատրոնում՝ թե՛ Հայաստանում, թե՛ Հայաստանի Հանրապետությունից դուրս, վաղուց սպասված էր ինձ համար: Վաղուց ակնկալում էի, որ իմ կարողություններով և իմ հնարավորություններով կարող եմ բարձրացնել ՀՀ որևէ թատրոնի որակ:

– Թատրոնում «հեղափոխական» քայլեր լինելո՞ւ են:

– Հեղափոխական քայլեր թատրոնում պետք է լինեն ամեն օր, եթե նկատի ունենք «քայլ դեպի առաջ», ապա, այո՛, քայլ դեպի առաջ թատրոնում և բոլոր բնագավառներում պետք է լինի ամեն օր, հետ պիտի չգնանք: Հեղափոխությունը լայն իմաստ ունի: Ես կարծում եմ, որ ամեն օր, եթե թատրոնը առաջ չգնա, մենք առաջ չենք գնա: Համաշխարհային և հայ թատրոնի պատմության մեջ մերթընդմերթ թատրոնը ճգնաժամի մեջ է լինում, այդ ճգնաժամից ելքեր են գտնվում և, փառք Աստծո, ոչ մի թատրոն Հայաստանում դեռ չի փակվել: Ես կարծում եմ, որ երբևիցե հենց այս թատրոնը չի փակվի, հարևանությամբ նոր շենք է կառուցվում, մոտ մեկ տարի հետո այդ շենքը կլինի, մենք կունենանք արդեն նոր թատրոն, նոր որակ, նոր ներկայացումներ: Այսօր այս պայմաններում ստեղծագործելը, աշխատելը հերոսություն է, ես կարծում եմ, որ Վիգեն Չալդրանյանը, ունենալով այն, ինչ ունի, արել է հնարավորը, որպեսզի թատրոնն աշխատի և որակ ապահովվի:

– Թիմով աշխատե՞լն է հեշտ, թե՞ անկախ բեմադրիչ լինել, ընտրել դերասաններին, ում հետ պիտի աշխատեք:

– Ինձ համար երջանկություն էր անկախ բեմադրիչ լինելը, բայց այն ուներ իր բարդությունները. ես չունեի տարածք, չունեի բեմ, ես վարձակալում էի, հրավիրվում էի արտերկիր՝ ներկայացումներ բեմադրելու. դա շատ ավելի հեշտ է, բայց, երբ ունես արդեն կոնկրետ թիմ և կոլեկտիվ, որոնց հետ և որոնց համար պիտի աշխատես, որպեսզի նրանց բարձրացնես, դա շատ ավելի բարդ է:

Գիտեք ինչ, տարբեր աշխարհայացքներ կան դերասանների մոտ, տարբեր էսթետիկայի մեջ աշխատող դերասաններ, կամաց-կամաց նոր դերասանների հետ միասին պետք է գալ մի որակի, մակարդակի, գեղագիտության, որ ընդունելի լինի: Ի՞նչն է ամենակարևորը, որ այս թատրոնը լայն հանրությանը հետաքրքիր լինի, և մարդիկ արձագանքեն, սիրով գան թատրոն: Դա է նպատակը: