Տնտեսական հեղափոխությունից ԼՂ հակամարտության խաղաղ կարգավորում. ի՞նչ է առաջարկում «Իմ քայլը» դաշինքն ընտրողին

«Իմ քայլը» դաշինքը 2018թ. դեկտեմբերի 9-ի արտահերթ խորհրդարանական ընտրություններին մասնակցում է «Երջանիկ անհատ, հոգատար հանրություն, հզոր պետություն» կարգախոսով: Դաշինքը նախընտրական ծրագրում նշում է ընտրապայքարին մասնակցության նպատակը` 2018 թվականի ապրիլ-մայիս ամիսներին Հայաստանում տեղի ունեցած ոչ բռնի, թավշյա, ժողովրդական հեղափոխության վերջնական հաղթանակը ամրագրելու և իշխանությունը Հայաստանում անշրջելիորեն վերադարձնել ժողովրդին։

Ծրագրում շեշտվում է, որ «Իմ քայլը» դաշինքը ձևավորված է ոչ բռնի, թավշյա, ժողովրդական հեղափոխությունն առաջնորդած քաղաքական թիմի ներկայացուցիչներից և նրանց աջակցած ուժերից, նաև նշվում է, որ դաշինքի քաղաքական թիմը այսօրվա դրությամբ կատարել է ժողովրդի առաջ իր ստանձնած բոլոր պարտավորությունները։

Դաշինքը խոստանում է` առաջիկա հինգ տարիներին իրենց գործունեությունը միտված է լինելու տնտեսական հեղափոխություն իրականացնելուն։

«Մենք մտադիր ենք վճռական միջոցներ ձեռնարկել Հայաստանը արդյունաբերական, տեխնոլոգիական, նաև բնապահպանական բարձր չափանիշներ ունեցող երկիր դարձնելու ուղղությամբ։ Այս նպատակին հասնելու համար առանցքային նշանակություն ունեն՝

● Հայաստանի Հանրապետության և Արցախի Հանրապետության անվտանգության մակարդակի շարունակական բարձրացումը, Արցախի ինքնորոշման իրավունքի միջազգային ճանաչումը,

● աշխատանքի և ներդրումների խրախուսումը, աղքատության հաղթահարումը աշխատանքի և կրթության միջոցով,

● օրենքի գերակայության ապահովումը,

● բարեկեցության շարունակական բարձրացումը,

● պետական ծախսերի արդյունավետության շարունակական բարձրացումը»,- նշվում է ծրագրում:

«Իմ քայլը» դաշինքը խոստանում է քաղաքացիների անվտանգության, բարեկեցության ապահովում, անկախ դատական համակարգ, ժողովրդագրական խնդիրների լուծում, ժողովրդավարության հաստատում,  մրցունակ, մասնակցային և ներառական տնտեսություն, բարձր տեխնոլոգիաների զարգացում, հավելյալ արժեքի ստեղծում աշխարհի համար, նորարար տեխնոլոգիաների և գիտական հենքի վրա հիմնված մրցունակ և արդյունավետ գյուղատնտեսության ստեղծում, զբոսաշրջության զարգացում, հասանելի և հուսալի ենթակառուցվածքների զարգացում: Դաշինքի ծրագրում շեշտվում է` տնտեսական որակական առաջընթացի հիմնասյունը հասցեական բարեփոխումներն են՝ ուղղված արտաքին շուկաներում Հայաստանը որպես բրենդ դիրքավորելուն:

Դաշինքը նախատեսում է.

● նվազեցնել վարչարարական բեռը,
● վերացնել գործարարության համար խոչընդոտ հանդիսացող կարգավորումները,
● պարզեցնել հարկային և մաքսային քաղաքականությունը,
● ընդլայնել արտահանման ծավալները,
● իրականացնել ներդրումներ ենթակառուցվածքներում:

«Իմ քայլը» կարևորում է ներառական, մրցունակ կրթական համակարգն ու գիտության զարգացումը, հասանելի և որակյալ առողջապահության ապահավումը, սոցիալական պաշտպանության կայուն համակարգը, շրջակա միջավայրի համալիր պահպանումը, վերականգնումն ու կայուն բնօգտագործումը, ներառական մշակութային քաղաքականության իրականացումը: «Իմ քայլը» խոստանում է հանրային կառավարման արտադրողականության բարձրացում և լավ կառավարման սկզբունքների ներդրում, հանրային ֆինանսների պատասխանատու կառավարում, օրենքի գերակայություն, հակակոռուպցիոն պայքար: Դաշինքի արտաքին քաղաքական առանցքային նպատակներն են լինելու Հայաստանի Հանրապետության ինքնիշխանության և անվտանգության ապահովումը, ղարաբաղյան հակամարտության խաղաղ կարգավորումը, Արցախի` իբրև բանակցային կողմ ԼՂ խնդրի կարգավորման գործընթացում ներառումը, իբրև բանակցային կողմ, ԵՄ վիզային ռեժիմի ազատականացումը, իսկ Սփյուռքը պետք է մասնակից դառնա ՀՀ կառավարմանը, հայրենադարձություն և այլն:

Ներկայացնում ենք որոշ դրույթներ դաշինքի նախընտրական ծրագրից:

• Տնտեսական բնագավառում պետությունը պարտավոր է ստեղծել պայմաններ համախառն ազգային արդյունքի ձևավորման գործում, տնտեսական գործունեության ոլորտում գործարար հմտություններ ունեցող առավելագույն թվով մարդկանց ներգրավման համար: Տնտեսական, բիզնես դաշտը պետք է ձևավորվի ազատորեն, գործարար հմտությունների անաչառ մրցակցության՝ հովանավորչության բացառման պայմաններում:

• Հայաստանի Հանրապետության ազգային անվտանգության համար առաջնային է ոչ միայն Զինված ուժերի մարտունակության, հատուկ ծառայությունների ու դիվանագիտական կորպուսի գործունակության շարունակական բարձրացումը, այլև Հայաստանի բնակչության թվի աճը. ըստ այդմ` առաջիկա 20 տարիներին ՀՀ բնակչության թիվը պետք է կրկնապատկվի: Այս խնդրի լուծման կարևորագույն միջոցներն են Հայաստանի Հանրապետությունից տեսանելի արտագաղթի դադարեցումը, հին և նոր սփյուռքը ներկայացնող հայերի՝ դեպի Հայաստանի Հանրապետություն հայրենադարձության հարաճուն գործընթացի հարուցումը, ծնելիության աճը:

• Ներքաղաքական ասպարեզում Հայաստանի առաջ ծառացած կարևորագույն խնդիրը անշրջելի ժողովրդավարության հաստատումն է:

• Քաղաքականությունը պետք է լինի հրապարակային. քաղաքական գործընթացների, դրանց բովանդակության ու մանրամասների վերաբերյալ հանրության առավելագույն իրազեկումը ժողովրդավարության կարևորագույն բաղադրիչ է, որն անհնար է իրագործել առանց խոսքի, մամուլի և համացանցի ազատության:

• Ղարաբաղի հարցի կարգավորման որևէ ծրագրի իրագործում հնարավոր է միայն Լեռնային Ղարաբաղի՝ բանակցային լիարժեք կողմի կարգավիճակի վերականգնմամբ, առանց որի համաձայնության հարցի կարգավորման որևէ տարբերակ չի կարող համարվել դե յուրե ընդունված:

• Հայոց ցեղասպանության միջազգային ճանաչումը Հայաստանի անվտանգության կարևոր երաշխիք է. ցեղասպանության միջազգային ճանաչման գործընթացը պետք է շարունակվի մինչև համաշխարհային ճանաչում:

• Զինված ուժերի մարտունակության և արդյունավետության համապատասխանեցումը անվտանգության միջավայրի փոփոխվող պահանջներին պաշտպանության ոլորտում մեր քաղաքական առաջնահերթությունն է:

• Արտաքին քաղաքականության բնագավառում մեր քայլերը միտված են լինելու բոլոր պետությունների հետ բարիդրացիական, փոխշահավետ հարաբերություններ հաստատելուն և նոր շունչ հաղորդելուն:

• Հայաստանի անմիջական հարևան Ադրբեջանի հետ վատթար հարաբերությունները շարունակելու են պայմանավորված մնալ ղարաբաղյան հակամարտության շրջանակներում վերջինիս ռազմաշունչ դիրքորոշմամբ և պետական հովանավորչությամբ հայատյացության սերմանման դատապարտելի մակարդակով։ Միայն ադրբեջանական կողմից ներկայիս դիրքորոշման փոփոխումը, Արցախի ժողովրդի անվտանգությանն ուղղված սպառնալիքի վերացումը և ղարաբաղյան հակամարտության կարգավորմանն ուղղված իրական և անկեղծ կամքի դրսևորումը կարող են միջավայր ստեղծել երկու երկրների միջև շփումներ հաստատելուն ուղղված քայլերի մեկնարկի համար։

• Հայաստանի անմիջական մյուս հարևան Թուրքիայի կողմից շարունակական շրջափակման պայմաններում բարիդրացիական հարաբերությունների հաստատմանն ուղղված հայկական կողմի միակ ընդառաջ քայլը հայ-թուրքական սահմանն առանց նախապայմանների բացելու պատրաստակամության հայտարարումն է, ինչը հնարավոր է միայն թուրքական կողմից երկկողմ հարաբերությունների կարգավորումը ձգձգելու նպատակով երրորդ երկրներին վերաբերող պատրվակների որպես նախապայման չօգտագործելու դեպքում։

• Տնտեսական քաղաքականության հիմքում դնելու ենք արտահանմանը, զբաղվածության ընդլայնմանը, աշխատանքի խրախուսմանը միտված ներդրումային քաղաքականությունը:

• Մենք նախատեսում ենք կարճաժամկետ հատվածում նվազեցնել վարչարարական բեռը, վերացնել գործարարության համար խոչընդոտ հանդիսացող կարգավորումները, իրականացնել ներդրումներ ենթակառուցվածքներում, բարելավել կրթության որակը, բարեփոխել առողջապահության համակարգը և խթանել արտահանումը:

• Մեր առաջնահերթությունն աշխատանքի և ներդրումների խրախուսմամբ գործազրկության կրճատում և տնտեսական աճ ապահովելն է, դրան հասնելու մեթոդը՝ անարդյունավետ պատճառահետևանքային կապերի և ավելորդ բյուրոկրատիայի վերացմանը միտված հետևողական աշխատանքը, նպատակադրումը՝ առկա խոչընդոտների բացահայտման և լուծման միջոցով մրցունակության համակարգային բարելավմամբ տնտեսության իրական հատվածի և արտահանման շուկաների դիվերսիֆիկացիան: