Գնաճը կանխատեսվածից ցածր է. ԿԲ

Այս տարվա արդյունքներով գնաճը մեր կանխատեսումներից ցածր է: Դա պահպանվելու է նաև մոտակա ամիսներին: Դա թույլ է  տալիս մեր դրամավարկային քաղաքականությանն ընդլայնվել, ինչն արտահայտվում է տոկոսադրույքների նվազմամբ և վարկավորման ծավալների ավելացմամբ: Այս մասին լրագրողների  հետ  հանդիպման ժամանակ ասել է ԿԲ խորհրդի անդամ Արթուր Ստեփանյանը:

«2018 թվականը բացառիկ տարի էր քաղաքական իրադարձությունների տեսանկյունից՝ ապրիլ-մայիսի իրադարձություններն ու խորհրդանական ընտրությունները: ԿԲ-ն պետք է ավելի պահպանողական լիներ, որպեսզի պահպաներ կայունությունը: Ուրվագծվում է շուկայում մրցակցության ավելացման միտում, նաև էն շուկաներում, որտեղ կան գերիշխող դիրք գրաված կազմակերպություններ: Նրանք ավելի երկար են ծանրութեթև անում գնային քաղաքականություն մշակելիս: Դրա ապացույցն այն է, որ երբ միջազգային շուկայում գին է  բարձրանում, մեր ներքին շուկայում գինը չի բարձրանում: Պետական ծախսերը խնայողության սկզբունքով են կատարվում:

Գյուղատնտեսության ցուցանիշները տարվա սկզբից բացասական միտումներ էին գրանցում, սակայն նոյեմբերի տվյալներով՝ մոտ 20 տոկոս անկում է արձանագրվել: Օգոստոսից դա մեզ հուշում էր, որ գյուղատնտեսական առաջարկների նվազումը կարող է հանգեցնել գնաճի, սակայն նոյեմբերին արձանագրեցինք, որ մեծ պահանջարկ ունեցող գյուղատնտեսական ապրանքները նույն գնային ցուցանիշներն ունեն:

Տարեվերջին կունենանք ավելի ցածր գնաճ, քան կանխատեսում էինք: Վերջին տարիների գնաճային միջավայրը շատ կարևոր է եղել մեր տնտեսության համար՝ եկամուտների գնողունակության տեսանկյունից»,- ասել է  Արթուր Ստեփանյանը:

Նա նաև նշել է, որ բանկերից ֆինանսական հոսքերի ավելացում դեպի արտերկիր չկա: Ամեն ինչ կայուն և կանխատեսելի մակարդակի վրա է, պարզապես ավելացել են ֆիզիկական անձանց ներմուծումները, նաև առցանց առևտուրը Չինաստանից և Արաբական Միացյալ Էմիրություններից: Արթուր Ստեփանյանի կանխատեսումներով՝ գնաճը մինչև տարեվերջ կկազմի 1,6-1,8 տոկոս: Որպես տնտեսական կայունացման ցուցանիշ՝ Արթուր Ստեփանյանը նշեց նաև այն, որ տրանսֆերտների  տոկոսային ծավալը ՀՆԱ ցուցանիշում նախկին 30 տոկոսի փոխարեն այժմ կազմում է 10 տոկոս: