Այսօրվանից ARM TVs բջջային հավելվածը հասանելի կլինի միայն բաժանորդագրված օգտատերերին

Այսօրվանից ARM TVs բջջային հավելվածը հասանելի կլինի միայն բաժանորդագրված օգտատերերին: Թե՛ Հայաստանում, թե՛ Սփյուռքում «Շանթ» ՀԸ մշակած հավելվածը մեծ հետաքրքրություն է առաջացրել:

Արդեն հայտնել ենք, որ հավելվածի հանդեպ հետաքրքրությունը, հատկապես վերջին օրերին, աննախադեպ աճ է գրանցել թե՛ Հայաստանում, թե՛ հայաշատ այլ երկրներում: Մեր մոսկովյան գործընկերները ռուսաստանաբնակ հայերի հետ շփումներում պարզել են, որ շատերի համար ARM TVs հավելվածը վաղուց նորություն չէ՝ ոմանց համար արդեն առօրյայի անբաժան մասն է դարձել:

Մեզ հետ կապվում են, հավելվածի մասին կարծիքներ են հայտնում և տեղեկություններ ճշտում նաև Եվրոպայի հայկական համայնքներից, Միացյալ Նահանգներից, Մերձավոր Արևելքից, առավելապես Սիրիայից ու Լիբանանից:
 
Գևորգ Դանիելյանը լիբանանահայ է: Բուժաշխատող է, նաև ակտիվ համայնքային գործիչ: Խոստովանում է, որ ARM TVs-ը մեծ հետաքրքրություն է առաջացրել լիբանանահայերի շրջանում և շատերի համար այն Հայաստանի մասին ավելի շատ տեղեկացված լինելու և մշակութային  կապեր  պահելու իրական միջոց է: Մեր զրուցակիցներն անկեղծ են և խոսում են նաև հավելվածին առնչվող  խնդրահարույց հարցերից:

Անդրանիկ Մարաշլյանը IT ոլորտի Սիրիայում ճանաչված մասնագետներից է, նաև դրա համար է, որ խոսում է ոչ միայն որպես օգտատեր, այլև մասնագիտական նրբություններին տիրապետող անձ: Խնդիրը, որի մասին բարձրաձայնում է, արդեն մեր հավելվածը մշակող խմբի ուշադրության կենտրոնում է և շատ շուտով կլուծվի: Ցանկացած  հավելվածի համար տեխնիկական խնդիրների շտկումը զարգացման պարտադիր փուլ է:
 

ԱՌԱՎԵԼՈՒԹՅՈՒՆՆԵՐԻ ՄԱՍԻՆ

Անդրանիկ Մարաշլյանը նշում է նաև, որ հավելվածի տեխնիկական լուծումները համահունչ են ժամանակակից տեխնոլոգիաներին: Յուրատիպ է նաև ձևավորումը: ARM TVs-ը պարզ է, հասանելի, միևնույն ժամանակ, բազմաբովանդակ և անընդհատ զարգացող ու կատարելագործվող:

Եվ այսպես, դեկտեմբերի 20-ից ARM TVs հավելվածը հասանելի է միայն բաժանորդագրված օգտատերերին 

Հիշեցնենք, որ կա նաև անվճար բաժանորդագրման տարբերակը, որից օգտվողների համար հասանելի կլինի միայն «Շանթի» ու ևս երեք համապետական հեռուստատեսությունների եթերը: 

Մյուս բաժանորդները հնարավորություն կունենան օգտվել շատ ավելի լայն առաջարկից

Խոսքը այս դեպքում «Շանթ պրեմիում», «Շանթ մյուզիք», «Շանթ սերիալ» և հայաստանյան իրականությունում 24-ժամյա հեռարձակմամբ առայժմ միակ՝ SHANTNEWS ալիքի մասին է:

Շատ շուտով այդ ալիքների թիվը կավելանա հասարակական մեծ պահանջարկ ունեցող ևս երկու ալիքներով, որոնք մեծ անակնկալ են լինելու օգտատերերի համար, այդ թվում՝ հեռուստադիտողների, քանի որ ARM TVs-ը հասանելի է ոչ միայն սմարթ հեռախոսների ու թաբերի, այլև առաջիկա մի քանի օրից նաև սմարթ հեռուստացույցների համար:

«Շանթ»-ի մշակած հավելվածները սմարթ հեռուստացույցների համար հաջողությամբ անցել են թեստային փուլը և այժմ հաստատման փուլում են: Հավելվածը հեռուստատեսային եթերում ունենալու ևս մեկ տարբերակ է ARM TVs բոքսերի օգտագործումը, որոնք կարելի է ձեռք բերել՝ այցելելով հավելվածի պաշտոնական կայքէջ: