Չգիտեի, որ գնում ենք Երևան՝ ոստիկանական գունդ գրավելու. ՊՊԾ գնդի գրավման գործով մեղադրյալի ցուցմունքը

ՊՊԾ գնդի գրավման գործով դատաքննության ժամանակ հրապարակվում են, ըստ մեղադրանքի, գունդ ներխուժած Գևորգ Մելքոնյանի նախաքննական ցուցմունքները: Նախաքննական մարմնի հարցաքննության ժամանակ նա պատմել է, որ 2016 թվականի հուլիսի 17-ին՝ ժամը 21։00-ի սահմաններում, եկան Արմեն Լամբարյանն ու Արմեն Բիլյանը: Իրենք Սպիտակում մի քանի ընկերների հետ նշում էին իրենց ընկերոջ ծննդյան օրը: Բիլյանն ու մյուս ընկերը դժգոհում էին կառավարությունից, որը, նրանց ասելով, լավ չի աշխատում: Լամբարյանն էլ ասաց, որ պետք է ազատեն իրենց ընկերոջը` Սեֆիլյանին:

«Ես Սեֆիլյանին չեմ ճանաչել, լսել եմ, որ պատերազմի ժամանակ եղել է հրամանատար: Ինձ կոնկրետ առաջարկ չի արվել միանալու խմբին, ես ինքս եմ համաձայնվել: Նստել ենք մեքենա, տասը  հոգով էինք, կիպ-կիպ նստել էինք: Ես չգիտեմ, թե Արմեն Լամբարյանն ինչ կապ ուներ «Հիմնադիր խորհրդարանի» հետ: Ես չգիտեի, թե ինչ է դա, այդ օրն ուղղակի խմած եմ եղել, դրա համար  էլ միացել եմ իրենց: Եթե իմանայի, որ գնում են ոստիկանության գունդ գրավելու, երբեք չէի միանա: Մեր մեքենայի հետևից մի «Կռազ» էր գալիս: Էլի մի քանի մեքենա կար: «Կռազը» զարկեց գնդի դռանը, բայց դուռը չկոտրվեց: Երբեք չէի պատկերացնում, որ մեր մեջ զենքով մարդիկ կային: Ես ինքս օգնել եմ, որ սպանված Վանոյանի մարմինը հանենք ՊՊծ գնդի տարածքից: Մի քանի զինված մարդիկ գնդի պատի վրայով մտան ներս: Կրակոցներ էին լսվում ներսից: Մեզ հետ տարածք մտած մարդիկ  փոխհրաձգության մեջ էին մտել ոստիկանների հետ: Տեսա, որ թևից վիրավոր ոստիկան կա այնտեղ: Տեսա՝ եռահարկ շենքին են մոտենում մարդիկ և պահանջում են բացել: Չգիտեմ`դուռը ներսից, թե դրսից է բացվել: Տղաները զինանոցի բանալիներն էին փնտրում`չգտան: Դուռը կոտրեցին, մտան ներս ու սկսեցին զենքերը բաժանել բոլորին: Ինձ տվեցին ԱԿՍ տեսակի ավտոմատ:    Տղաներից մեկի ձեռքին կար օպտիկական սարքով զենք, բայց նա սնայպեր չէր: Բոլորիս տվել էին կապի միջոց՝ ռացիաներ: Ղեկավար դերում էին Պավլիկը, Վարուժանը, սպիտակցիների մեր խմբի ղեկավարը Արմեն Լամբարյանն էր:

«Ես ինքս օգնել եմ, որ սպանված ոստիկան Վանոյանի մարմինը հանենք ՊՊԾ գնդի տարածքից: Ես ինքս բոլոր ոստիկանների հետ լավ եմ եղել: Գնդի զինված տղաները պատանդ են պահել բժիշկներին, որոնցից գիտեմ մենակ Սալվադորի անունը: Ես ու ընկերս` Ռուբենը, ՊՊԾ գնդի տարածքից դիմել ենք փախուստի: Գնդից դուրս գալուց երեք օր առաջ Լամբարյանը վիրավորվել էր: Նա զինված է եղել: Վիրավորվել է հենց սկզբից, երբ խմբի հետ մտել է գունդ: Թաթուլը նույնպես վիրավորվել էր առաջին օրը: Լսեցի, որ ոստիկան Վանոյանին սպանել է Սմբատը: Թե ումից լսեցի` չեմ կարող հիշել: Գնդի տարածքում մեքենաները հրկիզել են տղաները, թե ովքեր` չեմ կարող ասել, ես զենք կրել եմ, բայց ոչ մի անգամ չեմ կրակել: Դրա համար ես ինձ մեղավոր եմ զգում»:

Մեղադրյալն ասաց, որ մտքով չի անցել, որ Լամբարյանն ու մյուսներն իրենց բերում են Երևան` գունդ գրավելու: Չի մտածել, թե նրանք զինված են: Մեղադրյալը դատարանում չպնդեց իր նախաքննական ցուցմունքները և ասաց, որ հոգեբանորեն ճնշված է եղել, խմած է եղել, և ամեն ինչ չէ, որ համապատասխանում է իրականությանը: