Որո՞նք են խումհար առաջացնող խմիչքները և ինչպե՞ս անցկացնել տոներն առանց թունավորման

Նախատոնական օրերին բժիշկները կրկին խորհուրդ են տալիս՝ ինչպես և որքան կերակրատեսակներ պատրաստել, ինչպես սնվել, սննդային թունավորմամբ հիվանդանոցում չհայտնվելու համար: Բանն այն է, որ տոնական օրերին, ըստ նախորդ տարիների վիճակագրության, թունավորման ախտանշաններով ահազանգերը շտապօգնության բժիշկներին ու հիվանդանոցներում նկատելի ավելանում են:

Ասում են՝ Ամանորը սննդային խրախճանքի վերածելու ավանդույթը մեզ՝ հետխորհրդային երկրներին, բաժին է հասել հենց խորհրդային ժամանակներից, երբ ամեն ինչ չէր, որ հնարավոր էր գտնել: Ոմանք կհիշեն՝  բազմազան ու կարևորը՝ շատ կերակրատեսակներ հյուրասիրելը մի տեսակ պատվի ու բարեկեցության ցուցանիշ էր: Հիմա թեև ամեն ինչ կա, բայց բազմազան ուտեստներ պատրաստելու սովորությունը մնացել է: Անգամ ավելանում է՝ խանութներում մթերքի տեսականու ավելացմանն ուղիղ համետական: Գաստրոէնտերոլոգ Մարիաննա  Մալխասյանը հիշեցնում է, որ կարիք չկա շատ պատրաստել, կարևոր է, որ սնունդը թարմ լինի ու 2-3 օրից ավելի չպահվի սառնարանում:

Ամանորի ամենավտանգավոր սովորություններից մեկն էլ՝ ամեն ինչ իրար խառնելն է, փորձել սեղանին դրված ամեն ինչից: Գաստրոէնտերոլոգը նաև խորհուրդ է տալիս միրգն ուտել հիմնական սննդից մոտ 1 ժամ առաջ: Իսկ ուտելուց հետո ընդհանրապես ոչինչ չխմել, քանի որ դա վտանգավոր է ստամոքսի համար:

Խառնելը հատկապես վտանգավոր է խմիչքների դեպքում: Գունավոր խմիչքները չեն համատեղվում իրար հետ ու ամեն խմիչք չէ, որ համատեղելի է ամեն սննդի հետ: Լավ անցկացրած յուրաքանչյուր տոնին հաճախ վատ ինքնազգացողությունն է հաջորդում՝ սրտխառնոց,  գլխից կախված ծանր կշռաքարեր հիշեցնող անտանելի գլխացավ, խումհար:

Վիսկին, կոնյակը, կարմիր գինին, ջինը ուժեղ խումհար առաջացնող խմիչքների տասնյակի առաջատարներն են: Ընդ որում՝  խմիչքից հասկացող շվեդները պարզել են, որ վիսկին ավելի ուժգին խումհար է առաջացնում, քան օղին: Գաստրոէնտերոլոգը խորհուրդ է տալիս խումհարի դեպքում առատ ջուր, թեյ, թան կամ կաթ խմել, իսկ ստամոքսի շրջանում ցավերի, սրտխառնոցի գլխապտույտի ժամանակ՝ ինքնաբուժությամբ չզբաղվել և անմիջապես դիմել բժշկի: