«Մենք «մատոռն» ենք փոխում, մենակ յուղը չենք տալիս». ինչո՞ւ է դադարեցվել գյուղացիական տնտեսությունների սուբսիդավորումը

Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի աշխատանքներին այսօր մասնակցում էին չորս նախարարությունների ներկայացուցիչներ, ովքեր ներկայացրել են 2018-ի ծրագրերն ու միջոցառումները, խոսել 2019-ի բյուջեով նախատեսված հատկացումների մասին: Գյուղատնտեսության նախարարի տեղակալը խոսել է մասնավորապես պետության կողմից սուբսիդավորվող ծրագրերի մասին:

«Բոլորը խոսում են, որ հրաժարվում են ազոտական պարարտանյութի սուբսիդավորումից, մեզնից առաջ արդեն հրաժարվել են, կարծում եմ՝ ճիշտ քայլ է եղել, պարզվում է՝ շուկայում չսուբիսդավորված պարարտանյութն այդքան թանկ չէ, ինչքան ցույց էին տալիս սուբսիդավորածով, մեկ հա-ի հաշվարկով 8000 դրամի օժանդակություն էինք տալիս, այսօր շուկայում 10-ից ավելի խաղացող կա»,- ներկայացրել է նախարարի տեղակալ Գեղամ Գևորգյանը:

Հանձնաժողովի նախագահ Վարազդատ Կարապետյանը հետաքրքրվել է, թե ի՞նչն է պատճառը, որ դադարեցվել է բարձրլեռնային և լեռնային գոտիների սուբսիդավորումն այն պարագայում, երբ նախատեսված էր այն 2019-ի բյուջեով: Հարցրել է.

«Երբ որ կարդում ենք հաշվետվությունը, հիմնական ծրագրերը սուբսիդավորման մասին են: Դրանք արդյունավետ են, եթե համակարգերը գործում են, և մարդկանց ասում ենք, դուք կարողանում եք արտադրել, ավելի շատ փող կտանք, ու դուք կարտադրեք, ունեք բավական մրցունակություն: Իսկ երբ համակարգերը լավ չեն աշխատում, օրինակ «մատոռը» խփած է, մենք անընդհատ յուղ ենք ավելացնում, որ աշխատի, այսինքն՝ ոլորտներ կան, որ տոկոսների սուբիսդավորմամբ չենք կարող հարցերը լուծել: Երբ որ գյուղերում հանդիպում ենք, մարդկանց մոտ բնական բողոք է առաջանում, մեր հիմնական գործիքը պետք է լիներ  60 հազարների սուբսիդավորումը, որը պետբյուջեում նախատեսված է, այսինքն՝ ունենք ծրագիր` երկու մլրդ ֆինանսավորմամբ, ինչո՞ւ չի իրականացվում, և եթե կան հիմնավոր պատճառներ, ինչո՞վ ենք փոխարինելու բարձրլեռնային և լեռնային հատվածներում հող մշակելու հնարավորությունը»:

Պարզաբանելով սուբսիդավորման դադարեցման պատճառները՝ Գևորգյանը մանրամասնել է, որ իրենք մեծ հաշվով լուրջ փոփոխություն չեն բերել գյուղացիական տնտեսության վիճակի մեջ, բացի դրանից, շատ քչերն են օգտվել դրանից, հետևաբար, որոշել են փոխել գյուղացուն աջակցելու մեխանիզմը:

«Մի պարկն այսօր 500-1000 դրամ է թանկացել, առանց սուբսիդավորման, այսօր 6.5-7000-ով է վաճառվում ազատ շուկայում, իսկ դիզելային վառելիքից օգտվել է 1.6 տոկոսը, երբ ունենք 300 հազար գյուղացիական տնտեսություն: Իսկ երբ որ գրանտ տանք, անասնապահությամբ կզբաղվի, անասունը չի ծախի հարսանիք կազմակերպի, այլ կզարգացնի, ու սա կբերի զարգացման, այո՛, ճիշտ եք ասում, մենք «մատոռն» ենք փոխում, մենակ յուղը չենք տալիս»: