ԱԺ աշխատակազմի ղեկավարը պարզաբանել է մաքրուհիների հետ կապված խնդիրը

ԱԺ աշխատակազմի ղեկավար Տիգրան Գալստյանը ֆեյսբուքյան իր էջում անդրադարձել է ԱԺ մաքրուհիների հետ կապված խնդրին՝  թյուրըմբռնումներից խուսափելու համար:

«Դեռևս 2018 թվականի դեկտեմբերի 11-ին ԱԺ նախկին աշխատակազմի ու «Քլիներս» ՍՊԸ-ի կողմից կնքվել է պայմանագիր, ըստ որի` կատարող ընկերությունը ստանձնում է ներշենքային սանիտարական մաքրման ծառայությունների մատուցման պարտավորությունը:

Ազգային ժողովում աշխատում է 63 մաքրուհի, որից 40-ը`օրական 2 ժամ՝ 07:00-ից 09։00-ն՝ ստանալով 89950 դրամ աշխատավարձ: 23 մաքրուհի՝ 09:00-ից 18:00-ն՝ նույնաչափ աշխատավարձով:

Մաքրուհիների հետ կնքված ներկայիս պայմանագրերը լրանում է սույն թվականի մարտի 31-ին, որի մասին նրանք փետրվարի 19-ին պատշաճ ծանուցվել են։ Ինչպես նաև ծանուցվել են մասնավոր կազմակերպության հետ աշխատանքային պայմանագիր կնքելու մասին ։

«Քլիներս» ՍՊԸ-ն պարտավորվել է մաքրուհիներին վերցնել աշխատանքի և գործուղել Ազգային ժողով` ամսեկան դրույքաչափ սահմանելով 105,000 դրամ: Հաշվի առնելով, որ մաքրուհիների մեծ մասն աշխատում է օրական 2-3 ժամ` նշյալ ընկերությունը նրանց Ազգային ժողով կգործուղի կես դրույք աշխատավարձով։ Վերոնշյալ կազմակերպությունը` ԱԺ աշխատակազմի հետ համաձայնեցված, առաջարկում է օրվա մնացած ժամերին մաքրուհիներին ապահովել աշխատանքով այլ ընկերություններում, որի արդյունքում նրանց ամսական աշխատավարձը կարող է կազմել ավելին, քան անգամ պայմանագրով սահմանված է:

«Քլիներս» ՍՊԸ-ի հետ կնքված պայմանագիրն համարում եմ ավելի օպտիմալ տարբերակ, թե՛ պետական բյուջեի ծախսերի կրճատման, թե՛ կառավարչական ռեսուրսի խնայման, թե աշխատակիցներին աշխատանքային ու սոցիալական ապահովման առումով։ Կարծում եմ պետական միջոցների ռացիոնալ օգտագործումը, անարդյունավետ վատնումների բացառումը սկզբունքորեն չի կարող ունենալ այլընտրանք»,- գրել է նա:

Ավելի վաղ հայտնել էինք` ԱԺ-ում երեկ իրենց բողոքի ձայնն են բարձրացրել խորհրդարանում աշխատող մաքրուհիները, պատճառն աշխատավարձի կրճատումն է:

Բանն այն է, որ ԱԺ աշխատակազմը պայմանագիր է կնքել մասնավոր ընկերության հետ, որը ստանձնում է ներշենքային սանիտարական մաքրման ծառայությունների մատուցման պարտավորությունը: