ՀՀ նախագահը ծանոթացել է «Շանթ»-ի նոր ֆիլմի նկարահանման աշխատանքներին

Հանրապետության նախագահ Արմեն Սարգսյանը օրերս հերթական անգամ այցելել էր Գյումրի:  Քաղաքում շրջելիս նախագահը հանդիպել է «Շանթ» հեռուստաընկերության նոր ֆիլմի նկարահանման խմբին:

Արմեն Սարգսյանը նորից Գյումրիում էր: Այցերը հանրապետության երկրորդ քաղաք այնքան հաճախակի են դարձել, որ ոչ ոք այստեղ  այլևս չի զարմանում, երբ տեսնում է նախագահին հին Գյումրիի փողոցներով քայլելիս: Եվ կարծես օրինաչափություն է դարձել, որ  ամեն անգամ Գյումրի գալիս նախագահը մի նոր բան է տեսնում քաղաքում: Այս անգամ այդ նոր բանը «Շանթ» հեռուստաընկերության նոր ֆիլմի նկարահանումներն էին, որոնք այդ օրը քաղաքի հենց կենտրոնում՝ հայտնի Ալեքսանդրովսկի փողոցում էին կատարվում: Արմեն Սարգսյանի աչքից այս ամենը, իհարկե, վրիպել չէր կարող:

Նախագահը հետաքրքրվել է, թե ինչի մասին է ֆիլմը, զրուցել է երկու փոքրիկների հետ, ովքեր ֆիլմում գլխավոր դերակատարներից են:  Մանվելն ու Աննան նախագահին ոգևորված պատմել  են, որ թեև իրենք դեռ հայտնի դերասաններ չեն, բայց իրենց ամենալուրջ և ամենակարևոր դերերն են վստահված:
 
Ֆիլմի մասին ավելի մանրամասն զրուցելու համար նախագահը փոքրիկ դերասաններին հրավիրել է սրճարան:

Ֆիլմը հերթական հայկական սերիալը չէ, սա իրական պատմությունների վրա հիմնված բազմասերիանոց ֆիլմ է: Հեռուստադիտողների հիշողություններում դեռ թարմ է «Շանթ» հեռուստաընկերության 20-ամյակի առիթով իրականացված նախագիծը: 2014 թվականին  «Շանթ»-ը Գյումրիում փնտրում էր այնպիսի երեխաների, որոնք խելացի են, տաղանդավոր, բայց ընտանեկան և սոցիալական  պայմանները խոչընդոտ են հանդիսանում նրանց հետագա առաջխաղացման համար: Թղթի վրա համակարգիչ նկարած Հովիկի,  դագաղագործ Արսենի կամ քարերով դույլերը ծանրաձող դարձրած և սեփական հիվանդության հետ օր ու գիշեր կռիվ տվող Արթուրի պատմությունները այդ իրականության ընդամենը մի փոքր մասնիկն են: Ու պարզվեց, որ այդպիսի երեխաներ Գյումրիում շատ կան: 2014 թվականին մեկնարկած նախաձեռնության արդյունքում՝ հեռուստամարաթոններ կազմակերպվեցին Երևանում և Լոս Անջելեսում: Հավաքված հանգանակություններով արդեն հաջորդ տարի Գյուրիում կառուցվեց Թումո ստեղծարար տեխնոլոգիաների կենտրոն, որտեղ հիմա հազարից ավելի երեխա է հաճախում: Եվ այս ֆիլմը՝ հայտնի իրական հերոսների հավաքական պատմությունն է: Պատմություն կամքի, սեփական ուժերին ապավինելու մասին: Պատմություն մի տարածքի մասին, որը լինելով կարծես թե հայտնի՝ իրականում մնացել է անհայտ: Այդ տարածքը Գյումրին է ու գյումրեցիները:

Նախագահին ֆիլմի սյուժեն դուր է եկել: Մանվելը, որը ֆիլմում Հայկի կերպարն էր մարմնավորում, պատմել է, որ իրականում իր հայրիկը դարբին է, ուրեմն ուստա է, իսկ ֆիլմում նա հայրիկ չունի, երկրաշարժի ժամանակ է մահացել: Ընտանիքի ամբողջ բեռն ընկել է իր դեռ փոքր, բայց արդեն պինդ ուսերին, և նա պատվով է կրում այդ բեռը: Կրում է միայնակ, հասցնում է թիկունք լինել նաև մայրիկին, իսկ նրա մահից հետո ծնող է դառնում քույրերի համար: Եվ այսպիսի ու նման պատմություններ շատ կան Գյումրիում: