24 մլն դրամը համարժեք շեմ է՝ բնութագրելու համար միկրոձեռնարկատիրության շեմը. Արման Պողոսյան

ԱԺ «Բարգավաճ Հայաստան» խմբակցության անդամ Միքայել Մելքումյանն ապրիլի 30-ին՝ «Հարկային օրենսգրքում փոփոխություններ և լրացումներ կատարելու մասին» նախագծի վերաբերյալ խորհրդարանական լսումների ժամանակ, դիմեց հիմնական զեկուցող, ֆինանսների նախարարի տեղակալ Արման Պողոսյանին:

Նախագծով առաջարկվում է շրջանառության հարկի շեմը թողնել անփոփոխ՝ 115 մլն դրամ: Նա հիշեցրեց՝ երկու անգամ օրենսդրական նախաձեռնություն է դրել շրջանառության մեջ, որ 115 մլն դրամի շեմը չիջեցվի, նախօրոք է ներկայացրել, որ այս տարվա հունվարի 1-ից չիջնի, ապա նշեց՝ այժմ՝ մեկ տարի անց, նույն բանը գրել է Կառավարությունը:

«Եթե երկու անգամ պնդում եք, որ 115 մլն դրամը պիտի իջնի 58 մլն-ի, հիմա ո՞նց է ստացվել, որ 115 մլն-ը բերում եք»,- հարց ուղղեց նա:

Ըստ օրենքի՝ «միկրոձեռնարկատիրության սուբյեկտ կարող է համարվել այն ռեզիդենտ առևտրային կազմակերպությունը և ֆիզիկական անձը, որի՝ նախորդ հարկային տարվա ընթացքում գործունեության բոլոր տեսակների մասով իրացման շրջանառությունը չի գերազանցել 24 միլիոն դրամը»: Անդրադառնալով այս կետին՝ Մելքումյանը նշեց՝ Երևանի խանութները պետք է ընդգրկել, առևտուրը ներառել, այդ շեմը բարձրացնել, քանի որ եթե ներառում են առևտուրը, այդ 24 մլն դրամը շատ ցածր է լինում:

Խոսելով եկամտահարկի մասին՝ պատգամավորն ասաց. «Եթե հարկերը տանում են դեպի սպառողական հարկեր, հաճախ կարող է խոշոր եկամուտ ստացողը, օրինակ՝ 2 մլն և ավելի, 18 000 դոլար ավելի շահի տարեկան, քան 150 հազար դրամ ստացողը»:

Պողոսյանն արձագանքեց, որ Մելքումյանն, իրոք, երկու առիթով առաջարկել է շրջանառության հարկի շեմը վերականգնել, կառավարությունը բացասական եզրակացություն է տվել նրա նախաձեռնությանը:

«Մենք միշտ հակված ենք եղել համակարգային նշանակության, ոչ տեղային փոփոխությունների: Եթե կատարում ենք փոփոխություններ, որ հանգեցնելու են պետբյուջեի հարկային եկամուտների կորստի և հարկային բեռի վերաբաշխումների, հնարավորություն ունենանք ընդհանուր պատկերը գնահատել և առաջարկել նաև հարակից փոփոխություններ, ինչը հնարավորություն կտա հասնել նպատակին»,- ասաց նա:

24 մլն դրամը, ըստ փոխնախարարի, բավական համարժեք շեմ է՝ բնութագրելու համար միկրոձեռնարկատիրության շեմը, իսկ առևտրի պարագայում գուցե այդ սահմանագիծը կարող է շատ ավելի շուտ լրացվել, քանի որ կապիտալը արագ է շրջանառվում, միջնորդավճարներն ավելի փոքր են:

«Ի սկզբանե ձեռնարկատիրության հարկման համակարգը նախատեսված չի եղել առևտրական գործունեության համար: Այս հնարավորությունն առաջարկվել է տրամադրել միայն մարզերին, Երևանին տրամադրելը ռիսկային է, քանի որ մեր 70 000 շրջհարկ վճարողներից 42-43 հազարը զբաղվում է առևտրային գործունեությամբ: Եթե նման փոփոխություն անենք, Երևանում առևտուրը նույնպես թողնենք այդ հարկման համակարգում, գուցե 90-95 տոկոսը հայտնվեն այդ համակարգում»,- նշեց փոխնախարարը:

Մելքումյանն իր հերթին նշեց.

«50 մլն-ից հետո ՀԴՄ-ներ չեն խփում, եթե նկատել եք, այսինքն՝ դրա վնասները շատ ավելի շատ են եղել խաղի կանոնների պահպանման առումով»: