Ինչպես խուսափել աղիքային վարակներից

Աղիքային վարակներ արձանագրվում են տարվա ցանկացած ժամանակահատվածում, սակայն ամռանը ստեղծվում են առավել բարենպաստ պայմաններ աղիքային վարակների առաջացման և տարածման համար: Այս մասին տեղեկացնում են ՀՀ ԱՆ հիվանդությունների վերահսկման և կանխարգելման ազգային կենտրոնից:

Աղիքային վարակների համաճարակաբանական վերլուծությունները փաստում են, որ այսօր հանրապետությունում արձանագրված աղիքային վարակների գերակշիռ մասը բաժին է ընկնում սննդային գործոնին:

Հաճախ աղիքային վարակների դեպքերի առաջացմանը նպաստում են տնային խնջույքները, երբ սննդամթերքը պատրաստվում է սանիտարահիգիենիկ ոչ պատշաճ պայմաններում, սնունդ պատրաստելիս օգտագործվում է ոչ սառնարանային պայմաններում պահպանված սննդամթերք, կիրառվում են հում մթերքից պատրաստված սոուսներ, աղցաններ, որոնց շուտ փչացման ռիսկը մեծ է:

Սննդային գործոնով պայմանավորված աղիքային վարակների առաջացմանը նպաստում են նվազագույն սանիտարահիգիենիկ պայմաններ չունեցող հոսող ջուրը, սառնարանը, սննդի վաճառքի կետերը, կրպակներում պատրաստվող սնունդը, թարմ մրգերից պատրաստված հյութերը, փափուկ պաղպաղակները:

Ամռանը ձմերուկը և սեխը հրաշալի միջոց են զովանալու համար, սակայն միևնույն ժամանակ կարող են դառնալ աղիքային վարակների առաջացման պատճառ, եթե չպահպանվեն հիգիենայի կանոնները։

Ինչպես հայտնի է, ձմերուկը և սեխն աճում ու հասունանում են անմիջապես հողի վրա, որտեղ մշտապես առկա են աղիքային վարակների տարբեր հարուցիչներ, օրինակ՝ սալմոնելաներ: Ձմերուկի և սեխի մակերեսը կարող է աղտոտվել ինչպես դաշտում, այնպես էլ դաշտից մինչև սպառողին հասնելու ճանապարհին և վաճառքի վայրերում՝ խանութում, շուկայում, փողոցում:

Ձմերուկի և սեխի ոչ հիգիենիկ պայմաններում պահելու դեպքում կամ աղտոտված ջրով լվանալիս, աղիքային վարակների հարուցիչները կարող են թափանցել և աղտոտել պտղամիսը։

Հաշվի առնելով այն հանգամանքը, որ ներկայիս եղանակային պայմաններն առավել նպաստավոր են աղիքային վարակների, այդ թվում՝ բռնկումների առաջացման ու տարածման տեսանկյունից՝ աղիքային վարակներով չհիվանդանալու և դրանցով պայմանավորված բարդություններից խուսափելու նպատակով ևս մեկ անգամ խորհուրդ է տրվում.

մշտապես պահպանել անձնական հիգիենայի կանոնները, ձեռքերը լվանալ ուտելուց առաջ, զուգարանից հետո, տրանսպորտից օգտվելուց հետո՝ տուն վերադառնալուն պես, մրգերը և բանջարեղենը մանրակրկիտ լվանալ հոսող ջրով,

ձմերուկ կամ սեխ գնելիս երբեք թույլ չտալ, որպեսզի վաճառողը կտրվածք անի ձմերուկի վրա, իսկ տանը նախքան կտրելը լվանալ հոսող մաքուր ջրով,

սննդամթերքը միշտ պահպանել համապատասխան պայմաններում, արագ փչացող մթերքը պահել միայն սառնարանային պայմաններում և հետևել օգտագործման ժամկետներին,

ամռան սեզոնին, մասնավորապես՝ խնջույքների ժամանակ, չօգտագործել շուտ փչացող սննդամթերք, խուսափել աղցաններ պատրաստելուց, հատկապես՝ համեմված հում սննդամթերքից (ձու) պատրաստված սոուսների օգտագործմամբ,

խուսափել փողոցներում, ոչ պատշաճ պայմաններում վաճառվող սննդամթերք գնելուց,

նախընտրել գործարանային փաթեթավորված, համապատասխան ստուգումների ենթարկված մթերքներ,

բացառել կրեմային հրուշակեղենի օգտագործումը, չգնել տեղում պատրաստվող լցնովի փափուկ պաղպաղակ, զովացուցիչ ըմպելիքներ, կվաս, թարմ մրգերից պատրաստվող հյութեր,

սառնարանում հում սննդամթերքն առանձնացնել եփածից,

չլողալ կասկածելի ջրամբարներում,

եթե այնուամենայնիվ վարակվել եք, և կան հիվանդության ախտանշաններ, չզբաղվել ինքնաբուժմամբ, անտեղի չօգտագործեք հակաբիոտիկներ, որոնք կարող են հանգեցնել ինչպես հիվանդության քրոնիկական, այնպես էլ դեղակայուն ձևերի զարգացմանը: