Հայաստանի նոր իշխանությունն առաջ է քաշում Արցախի` բանակցային սեղան վերադառնալու հարցը, ինչը միշտ եղել է արցախյան կողմի պնդումը. Մասիս Մայիլյան

Հայաստանի դիվանագիտական և հյուպատոսական ծառայությունների ղեկավարների տարեկան համահավաքը եզրափակվեց Արցախում: Հայկական երկու հանրապետությունների արտաքին գործերի նախարարությունների կենտրոնական ապարատների՝ իր ձևաչափով առաջին համատեղ խորհրդակցությունը, որին մասնակցել են արտերկրում Հայաստանի Հանրապետության դիվանագիտական և հյուպատոսական ծառայությունների ղեկավարները, փակ էր: Խորհրդակցության ավարտին երկու նախարարները հանդես են եկել մամուլի ասուլիսով, հայտնում է SHANTNEWS.am-ի թղթակիցը Ստեփանակերտից:

Հիշեցնենք` վերջին նման հանդիպումը կազմակերպվել է 2003 թվականին: Պաշտոնական տեղեկատվության համաձայն` խորհրդակցության ընթացքում մտքեր են փոխանակվել արտաքին քաղաքական ընդհանուր օրակարգի և միջազգային ասպարեզում հայկական երկու պետությունների առջև ծառացած խնդիրների լուծման համար նոր գաղափարների և մոտեցումների մշակման շուրջ։

Խորհրդակցությունից հետո հրավիրված մամլո ասուլիսի ժամանակ Հայաստանի արտգործնախարարը նշել է, որ այս հանդիպումը արդեն գործող փոխգործակցությունը խորացնելու, գործնական քայլերին ընդառաջ ծրագրեր մշակելու նպատակով է:

Երկու նախարարներն անդրադարձել են բանակցային ներկա փուլին ու այդ ասպարեզում ստացած ժառանգությանը: Հայաստանի արտաքին գործերի նախարարը ևս մեկ անգամ շեշտել է, որ բանակցություններում անկյունաքարայինը մարդկանց անվտանգության հարցն է ու դրանից բխող կարգավիճակի հարցը:

Արցախի արտաքին գործերի նախարարն էլ ընդգծել է, որ Հայաստանի նոր իշխանությունն այսօր առաջ է քաշում Արցախի` բանակցային սեղան վերադառնալու հարցը, ինչը միշտ էլ եղել է արցախյան կողմի պնդումը: Ինչ վերաբերում է բանակցային նախկին փուլերում թույլ տված սխալներին, ապա պետք է առաջ նայել ու շտկել դրանք:

Երկու նախարարները անդրադարձել են նաև երկու հայկական հանրապետությունների միջև հարաբերությունները ռազմաքաղաքական նոր դաշինքում տեղավորելու հեռանկարին:

Զոհրաբ Մնացականյանն ասել է, որ հարցը քննարկման փուլում է և վաղ է ինչ-որ բան հայտարարելու համար: Մասիս Մայիլյանն էլ, հիշեցնելով, որ դաշինքի հարցը քննարկվել է ՀՀ և Արցախի անվտանգության խորհուրդների համատեղ նիստի ընթացքում, դրական վերաբերմունք է հայտնել: