Կստեղծվի գույքի բռնագանձման նոր ինստիտուտ՝ հիմնված կոնկրետ չափանիշների վրա

«Նոր ինստիտուտի ներդրումը ենթադրում է համալրում նոր կադրերով. դատախազության առանձին ստորաբաժանում է լինելու, որը համալրվելու է համապատասխան վերապատրաստված մասնագիտացված կադրերով, որոնց թվաքանակը որոշված է հակակոռուպցիոն ռազմավարությամբ»,- «Ապօրինի գույքի բռնագանձման մասին օրենքի նախագծի» վերաբերյալ լրագրողների հարցին ի պատասխան` ասաց ՀՀ արդարադատության նախարարի տեղակալ Սրբուհի Գալյանը:

Ինչ վերաբերում է դատախազության՝ որպես իրավասու մարմնի ընտրությանը, ապա Գալյանը նշեց, որ պետության շահերի պաշտպանությունը, այդ թվում և գույքային, դատախազության սահմանադրական լիազորություններից է բխում:

«Դատախազությունը հնարավորություն ունի համապատասխան հայց ներկայացնել դատարան՝ պաշտպանելու պետության գույքային շահերը: Ներկայիս իրավական կարգավորումների առկայության  պայմաններում ամենահարմար տարբերակը դատախազությանն իրավասու մարմին համարելն է»,- նշեց նա:

Անդրադառնալով այն հարցին, թե բռնագանձման ենթակա գույքի արժեքի 50 մլն-ի շեմն արդյո՞ք բարձր չէ՝ Ս. Գալյանն ասաց, որ 50 մլն-ն ընտրվել է՝ հիմք ընդունելով այն  կանխավարկածը, որ հասարակ քաղաքացին իրեն չզգա այդ օրենքի կարգավորման տիրույթում:

«Նախագծում ընտրված են հանցագործության ձևով կոնկրետ ազդակներ՝ պայմանավորված կոնկրետ կարգավիճակով, օրինակ՝ պաշտոնակատար հանդիսանալու դեպքում: Միևնույն ժամանակ ընտրվել է երկրորդ չափանիշը. դա որոշակի շեմն է»,- ասաց նա՝ ընդգծելով, որ ընտրվել է 50 մլն-ը՝ հիմք ընդունելով ներկայիս աշխատավարձերը և գույքի շուկայական արժեքը:

«Այս ընտրված արժեքը պայմանական է, և մենք կարող ենք քննարկել 60 մլն, 40 մլն շեմի հարցը»,- նշեց նախարարի տեղակալը:

Նա ավելացրեց, որ արտասահմանյան երկրներում գոյություն ունի երկու տարբեր ինստիտուտներ: Մեկն ուղղված է չհիմնավորված հարստացման դեմ, մյուսը հանցագործության արդյունքում ձեռք բերված գույքը բռնագանձելու հետ:

«Եթե մենք խոսում ենք հանցագործության արդյունքում ձեռք բերված գույքի մասին, ապա այդ դեպքում շեմն ընդհանրապես կարևոր չէ: Ցանկացած գույքի դեպքում, երբ հիմնավորվում է դրա և հանցագործության կապը, շեմը նշանակություն չի ունենում. այն միանշանակ ենթակա է բռնագանձման: Այս ինստիտուտը միանգամայն այլ խնդիրների լուծմանն է ուղղված, այդ իսկ պատճառով է ընտրված այդ շեմը»,- ասաց նա:

«Օրենքի նախագծում հստակ նշված են այն հիմքերը, որոնք կարող են ազդակ դառնալ ուսումնասիրության վարույթը սկսելու համար: Հիմքերը մեկ բացառությամբ կապված են հանցագործությունների հետ: Պետք է քրեական վարույթ նախաձեռնվի կամ քրեական վարույթի իրականացումն անհնար լինի, որպեսզի այս ուսումնասիրության վարույթը հարուցվի: Արդեն իսկ մենք ունենք հստակ ֆիքսված հանցագործությունների ցանկ, որոնց վերաբերյալ քրեական գործերի առկայության պարագայում քրեական գործ հարուցելու անհնարինության դեպքում մենք կարող ենք նախաձեռնել ուսումնասիրության վարույթը»,- նշեց Սրբուհի Գալյանը: