Ռուսաստանի Կալուգայի և Պերմի երկրամասերի շուրջ 20 գործարարներ հետաքրքրված են Հայաստանի և Շիրակի մարզի արտադրատեսակներով

Նոր գործարար կապերի ստեղծում, բիզնես գործունեության ընդլայնում, արտահանման ծավալների ավելացում: Այսպիսի հեռանկարով այսօր Գյումրիում մեկնարկել է արտահանման եռօրյա բիզնես մարաթոնը, որին մասնակցել են գործարարներ ոչ միայն Շիրակի մարզից, նաև Ռուսաստանի Դաշնության Կալուգայի և Պերմի երկրամասերից:

Նոր ձևաչափով միջոցառմանը տեղի և օտարերկրյա գործարարները բանակցել են, ներկայացրել այն, ինչն արտադրում են, քննարկել համագործակցության տարբերակներն ու ապրանքների արտահանման հնարավորությունները: Տեղի արտադրողներն ու գյուղմթերք վերամշակողները հանդիպել են Ռուսաստանի Դաշնության մոտ 20 ընկերությունների ներկայացուցիչների հետ:

Բիզնես մարաթոնի կազմակերպիչները նախ նշում են, որ Հայաստանից արտահանվող ապրանքների մեջ Շիրակի մարզի արտադրանքը շատ փոքր ծավալ է կազմում, հետո՝ գործարարները նախորդ տարիների բիզնես-համաժողովների ժամանակ Շիրակի մարզ չէին այցելում վատ ճանապարհների ու մայրաքաղաքից հեռու լինելու պատճառով: Այս տարի ռուսաստանցի գործարարները հետաքրքրված են Շիրակի մարզի արտադրանքով, ներկայացրին նաև իրենց ընկերությունների տեսականին:

Կալուգայի շրջանի բիզնեսի զարգացման գործակալության ներկայացուցիչ Անատոլի Սմիրնովի խոսքերով՝ մեզ մոտ հիմա ագրոսեկտորը որոշակի զարգացում է ապրում, իսկ իրենք ունեն կազմակերպություն, որը զբաղվում է կաթի արտադրությամբ և վերամշակմամբ, նաև սարքավորումների թողարկմամբ: Հուսով են, որ կկարողանան համագործակցել Շիրակի մարզի հետ:

Կալուգան ունի թափոնների վերամշակման արտադրություն, սա ևս Շիրակի մարզին կհետաքրքրի, քանի որ աղբի պրոբլեմը ամեն տեղ կա ու դրանից ազատվել է պետք: Գյուղոլորտի ներկայացուցիչներին հետաքրքրեցին նաև ռուսական թունաքիմիկատները, պարարտանյութերն ու սերմերը, որոնք կներկրվեն ու ֆերմերին կվաճառվեն։ Բիզնես մարաթոնի մասնակիցների մեծ մասը ֆերմերներ ու գյուղմթերք արտադրողներն էին, իսկ Պերմի և Կալուգայի երկրամասերի ընկերությունների բիզնես առաջարկները նաև արտադրության ոլորտում էին՝ մեքենաշինության, բարձր տեխնոլոգիաների:

Կալուգայից գործարար Նադեժդա Կաժուժկան ներկայացրեց իրենց արտադրանքը․ սարքավորումներ են արտադրում, որոնք հոսող ջրերի մաքրման համար են: Ջրամատակարարման ոլորտի մարզի ներկայացուցիչների հետ քննարկեցին, թե ինչպես կարելի է իրենց փորձը մեզ մոտ ներդնել, Հայաստանի բնակչությանը ևս մաքուր ջուր հասցնել, ինչը նաև բնապահպանական խնդիր է, հնարավոր է գետերի ակունքները մաքրելու հարցը ևս կարողանան լուծել: Մինչ այժմ Հայաստանի հետ չեն համագործակցել:

Պերմի երկրամասից գործարար Եկատերինա Օմելինան էլ ցուցադրեց իրենց արտադրանքը։ Ակտիվացված ածուխ են արտադրում, որն օգտագործվում է սպիրտի, ոչ ալկոհոլային խմիչքների մաքրման համար: Խմիչքների արտադրությունում պարտադիր է օգտագործվող տեխնիկական ջրի մաքրությունը՝ բնությունը չվնասելու համար: Հայաստան մինչ այժմ իրենց արտադրանքը փոքր ծավալներով են արտահանել:

Օտարերկրյա գործարարների առաջարկները շատ են, տեղի ընկերություններն էլ՝ դրանցով հետաքրքրված: Բայց փոխադարձ համագործակցության համար, պարզվում է, որ սա քիչ է: Մարզի շատ գործարարներ դեռ պատրաստ չեն իրենց արտադրանքը արտահանելու:

Շիրակի մարզպետ Տիգրան Պետրոսյանի խոսքերով՝ որակական չափանիշների հասնելու համար պետք է բիզնեսի որոշակի կայացվածության մակարդակ ունենալ, այս տեսանկյունից պարզ է, որ մարզը շատ աշխատանք ունի անելու և մեր շատ արտադրողների համար սեփական շուկայի մեջ տեղ գտնելու, ոտքի կանգնելու խնդիր կա։

ՀՀ առևտրաարդյունաբերական պալատի ԱՊՀ -ի պատասխանատու Կարեն Իվանովի խոսքերով՝ ԵԱՏՄ երկրները Հայաստանի համար լավ շուկա են, բայց արտահանման պահանջվող ծավալներն ապահովել չեն կարող, դրա համար, ըստ բիզնես մարաթոնի պատասխանատուի, ստիպված են տեղական փոքր արտադրողներից ապրանքները գնել, դրանք մեծ բեռների վերածել ու նոր կազմակերպել արտահանումը:

Այստեղ էլ գլխավոր խնդիրը մնում է ապրանքների տեղափոխման կազմակերպումը: Վերին Լարսի անցակետում մշտապես ի հայտ են գալիս խնդիրներ, որոնք լուծելու համար օրեցօր լոգիստիկայի գները թանկացնում են, ապրանքների ինքնարժեքը բարձրանում է, հայկական ապրանքներն էլ կամաց-կամաց դառնում են ոչ մրցունակ։

Հիմա, ըստ Կարեն Իվանովի, պայմանավորվածություն կա, Վրաստանը լուրջ աշխատանքներ է սկսել, մի քանի ամսում նոր ճանապարհ ու թունելներ է կառուցելու, որ բեռնափոխադրումներն ավելի արագ կատարվեն։ Տրանսպորտային հաղորդակցության այլընտրանքային ճանապարհները դեռ նախագծեր են: Շիրակի մարզի հետ ռուսաստանցի գործարարները վստահ են, որ տուրիզմի և սննդարդյունաբերության ոլորտում համագործակցության ծրագրերը հստակ իրագործելի են: