Շիրակի մարզում տնտեսական ակտիվության մեծ նախադրյալներ կան. Շիրակի մարզպետ

Տնտեսական առկա հնարավորություններն ու ներուժը մարզի զարգացման համար լիարժեք նախադրյալներ են ստեղծում: Պոտենցիալը գնահատել են ոչ միայն պետական կառույցները, նաև միջազգային կազմակերպությունները: Ուսումնասիրությունները եղել են բոլոր ոլորտների ուղղությամբ:

Մարզի զբոսաշրջային գրավչությունը հիմնական խթանը համարվեց նոր ներդրողների հետաքրքրությունները մեծացնելու համար: Իսկ ոլորտները կոնկրետացնելու դեպքում ստացվում է հետևյալ պատկերը` անհատները հետաքրքրված են պատմական կենտրոնի ճարտարապետական արժեք ունեցող տներով, մասնավոր ներդրողներն ու ընկերությունները` բնակարանային, հյուրատնային բիզնեսով ու տեքստիլ արդյունաբերության ճյուղերում արտադրություն հիմնելով կամ եղածը ընդլայնելով:

2 տարի է, ինչ Գյումրիում ծավալվող քննարկումներն ամենամեծ ներդրումային ծրագրի` լոգիստիկ կենտրոնի կառուցման շուրջ են: Հատկացված տարածքը կա՝ 335 հեկտար, որտեղ գործունեություն է ծավալելու իսրայելական արդյունաբերական պալատը։ Ծրագրով նախատեսվում է ազատ տնտեսական գոտի հիմնել էլեկտրոնային առևտրի ոլորտում գործող ընկերությունների համար։

Տարածքն ազատ տնտեսական գոտի է ճանաչվել կառավարության որոշմամբ: Տնտեսական աշխուժության սպասումներ կան թեթև արդյունաբերությունում, այն ներդրողներին հետաքրքրող հիմնական ճյուղերից մեկն է: Շիրակի մարզպետի խոսքերով` 2-3 ընկերություն կա, որոնք նպատակադրվել են ներդրումներ կատարել թեթև արդյունաբերության մեջ կամ ընդլայնել գործունեությունը:

Գումարներ ներդնելու, ձեռնարկատիրական գործունեություն սկսելու համար հարկային արտոնությունները հիմնական նախադրյալ էին, բայց Գյումրիում այն ծավալելու ցանկությունը շատերի մոտ քաղաքի զբոսաշրջային գրավչությունից սկսվեց: Ներդրողների համար այս քաղաքում շահութաբեր է համարվում նաև բնակարանային բիզնեսը: Մասնավոր ներդրումներով նոր բնակելի թաղամաս կառուցելու նախագիծ կա: Մասնավորն առաջարկում է բնակարանային համալիր կառուցել. խոսքն առայժմ 500 բնակարանի մասին է, որը հետագայում կարող է դառնալ մինչև 2500:

Մասնավորի առաջարկները բնակարանային ոլորտում միայն բիզնես նպատակներով չեն: Անօթևանության խնդիր ունեցող քաղաքին ազատված բնակարանները հետագայում անհրաժեշտ կլինեն բնակապահովման կարիքների լուծման համար։ Թե ինչ հնարավոր տարբերակներ կարող են կիրառվել, առաջարկները դեռ նոր են լսելու, քննարկելու և ներկայացնելու: Առնվազն 3 ներդրող հետաքրքրված է Գյումրիում վաճառքի բնակարանների շուկան ակտիվացնելու ուղղությամբ:

Ըստ մարզպետի` քաղաքի պատմական միջուկը բարեկարգելը բիզնես միջավայր է ստեղծել ներդրողների համար, 4 հյուրանոցային համալիրի շինարարությունը և 1 տասնյակից ավելի հյուրատների կառուցումն ընթացքի մեջ է Գյումրիում: Հաջորդ տարի տեղեկատվական տեխնոլոգիաների ոլորտի զարգացումը մարզում նոր տեմպեր է ունենալու։

Տնտեսական ակտիվությամբ, հակառակ սպասումների, պասիվ է գյուղատնտեսությունը: Այս տարին գյուղատնտեսության համար գնահատվեց ամենավատը վերջին 20 տարում։ Ըստ մարզպետի` սա ազդակ էր, որ ավանդական գյուղատնտեսությունից անցում կատարվի դեպի ոչ ավանդական մշակաբույսերի աճեցում:

Եվրամիության ֆինանսավորմամբ մարզում մեծ ծրագիր է մեկնարկելու փետրվար ամսից: Շիրակի, Լոռու և Տավուշի մարզերում գյուղատնտեսական նոր տեխնոլոգիաների ներդրման համար 11 մլն եվրո է հատկացվելու: Միջոցները կուղղվեն բերքի պաշտպանության նոր համակարգերի ներդրմանը և նոր բուսատեսակների մշակությանը: